Maharashtra News LIVE Updates : “हिंदू कोण? मुस्लिम कोण विचारत गोळ्या झाडल्या”, अतुल मोनेंच्या पत्नीने आणि मुलीने काय सांगितलं?

जम्मू काश्मीर येथील पहलगाम येथे झालेल्या हल्ल्याच्या निषेधार्थ शेवगाव तालुका सकल हिंदू समाजाच्या वतीने शेवगाव मधील क्रांती चौकामध्ये जाहीर निषेध व्यक्त करण्यात आला. पाकिस्तानचा ध्वज असलेला झेंडा जाळण्यात आला. यावेळी पाकिस्तानच्या निषेधार्थ घोषणा देण्यात आल्या.

काश्मीर मध्ये झालेल्या हल्ल्यात मृत्युमुखी पडलेल्या डोंबिवलीतील अतुल मोने यांच्या कुटुंबियांनी हल्ल्याविषयी माहिती दिली आहे. कुटुंबियांनी सांगितले की, आम्ही तिकडे फिरायला गेलो होतो. त्या ठिकाणी दहशतवादी आले, त्यांनी फायरिंग सुरू केली. त्यांनी विचारलं यामध्ये हिंदू कोण आहे ? आणि मुस्लिम कोण आहे ? सर्वात आधी संजय लेले यांनी हात वर केले. त्यांना लगेचच अतिरिक्यांनी गोळी मारली. त्यानंतर आमच्या समोरच लोकांवर गोळीबार सुरू केला. दहशतवाद्यांविरोधात सरकारने ठोस कारवाई केली पाहिजे, अशी मागणी कुटुंबियांनी केली आहे. माझ्या आईने वडिलांना कव्हर केलं पण वडिलांच्या पोटात दहशतवाद्यांनी गोळ्या चालवल्या असं अतुल मोनेंच्या मुलीने सांगितलं

जम्मू आणि काश्मीरमधील पहलगाममध्ये दोन दिवसांपूर्वी दहशतवादी हल्ला झाला होता. दहशतवाद्यांनी पर्यटकांना लक्ष्य करत केलेल्या या हल्ल्यात देशातील २५ आणि नेपाळमधील एका पर्यटकाचा मृत्यू झाला आहे. मृत्यू झालेल्या पर्यटकांमध्ये राज्यातील सहा पर्यटकांचाही समावेश आहे. या हल्ल्यानंतर महाराष्ट्रातून जम्मू आणि काश्मीरला पर्यटनासाठी गेलेले शेकडो नागरिक अडकले आहेत. हल्ल्यामुळे त्यांच्यामध्ये भीतीचे वातावरण आहे.

अशात महाराष्ट्र सरकारने या पर्यटकांना परत आणण्यासाठी आणखी एका विशेष विमानाची व्यवस्था केली आहे. या विशेष विमानातून १०० पर्यटकांना परत राज्यात आणले जाणार आहे. या १०० पर्यटकांची यादी जाहीर करण्यात आली आहे. याबाबत मुख्यमंत्री कार्यालयाच्या एक्स अकाउंटवरून माहिती देण्यात आली आहे. तत्पूर्वी, कालही सरकारने जम्मू आणि काश्मीरमधून परत आणल्या जाणाऱ्या ८३ पर्यटकांची यादी जाहीर केली होती.