Ajit Pawar: अजित पवार आज जयंत पाटलांना मागे टाकणार; अर्थसंकल्पाच्या यादीत दुसऱ्या स्थानी, पहिल्या स्थानी कोण?

अजित पवार ११व्यांदा सादर करणार अर्थसंकल्प

महाराष्ट्रात आजपर्यंत ७८ वेळा अर्थसंकल्प सादर झाले असून त्यात विद्यमान अर्थमंत्री अजित पवार हे दुसऱ्या स्थानी आहेत. अजित पवारांनी आजपर्यंत त्यांच्या अर्थमंत्रीपदाच्या कार्यकाळात १० वेळा अर्थसंकल्प सादर केले असून आज त्यात ११ व्या अर्थसंकल्पाची भर पडणार आहे. जयंत पाटील यांनी १० अर्थसंकल्प सादर केले असून काँग्रेसचे ज्येष्ठ नेते सुशीलकुमार शिंदे यांनी ९ वेळा अर्थसंकल्प सादर केले आहेत. हे दोघे नेते अनुक्रमे तिसऱ्या व चौथ्या स्थानी आहेत.

सर्वाधिक अर्थसंकल्प कुणी सादर केले?

स्वातंत्र्योत्तर महाराष्ट्राचा इतिहास पाहता आजपर्यंत सादर झालेल्या एकूण ७८ अर्थसंकल्पांपैकी सर्वाधिक १३ अर्थसंकल्प हे माजी अर्थमंत्री दिवंगत बॅ. शेषराव वानखेडे यांनी सादर केले आहेत. शेषराव वानखेडे सर्वप्रथम १९५७ साली मुंबई प्रांत निवडणुकीत तर १९६२ साली संपूर्ण महाराष्ट्र निवडणुकीत कमवेश्वर मतदारसंघातून सर्वप्रथम निवडून आले होते.

कुणी किती वेळा अर्थसंकल्प सादर केला?

बॅ. शेषराव वानखेडे – १३

अजित पवार – १० (आज ११व्यांदा)

जयंत पाटील – १०

सुशीलकुमार शिंदे – ९

बॅ. रामराव आदिक – ७

सुधीर मुनगंटीवार – ६

मधुकरराव चौधरी – ५

यशवंतराव मोहिते – ४

एकनाथ खडसे – ३

स. गो. बर्वे – २

महादेव शिवणकर – २

दिलीप वळसे पाटील – २

शंकरराव चव्हाण – १

देवेंद्र फडणवीस – १

गोपीनाथ मुंडे – १

सुनील तटकरे – १

डॉ. व्ही. सुब्रह्मण्यम – १

लाडक्या बहि‍णींसाठी आज कोणती घोषणा?

दरम्यान, अर्थमंत्री अजित पवार आज राज्यातील लाडक्या बहि‍णींसाठी कोणती घोषणा करणार? याकडे सगळ्यांचं लक्ष लागलं आहे. सत्ताधारी महायुतीनं विधानसभा निवडणुकीआधी लाडक्या बहि‍णींना मिळणारा निधी १५०० रुपयांवरून २१०० रुपये करण्याचं आश्वासन दिलं होतं. यासंदर्भात अजित पवार आज घोषणा करणार का? याची उत्सुकता लाभार्थी महिलांमध्ये दिसत आहे. याशिवाय ग्रामीण भागांत रस्त्यांचे काँक्रीटीकरण, सौरऊर्जेचा वापर करणाऱ्यांना सवलती देण्याचे सूतोवाचही करण्यात आले आहे.