Maharashtra Budget 2025 LIVE Updates: पुणे-मुंबईतील मेट्रो मार्गिकांसाठी अर्थसंकल्पात तरतूद, अजित पवार भाषणात काय म्हणाले?

मुंबई,. नागपूर. पुणे महानगरातील नागरिकांना पर्यावरणपूरक वाहतूक उपलब्ध करून देण्यासाठी १४३.५७ किमी लांबीचे मेट्रो मार्ग कार्यान्वित करण्यात आले आहेत. याचा फायदा रोज १० लाख प्रवासी घेत आहेत. येत्या वर्षात मुंबईत ४१.२ किमी, पुण्यात २३.२ किमी असे ६४.४ किमीचे मेट्रो मार्ग सुरू होणार आहेत. येत्या ५ वर्षांत राज्यात २३७.५ किमी लांबीचे मेट्रो मार्ग कार्यान्वित करण्यात येणार आहेत. नागपूर मेट्रोचा ४० किमीचा पहिला टप्पा पूर्ण झाला आहे. दुसऱ्या टप्प्यात ६७०८ कोटी किमतीच्या ४३.८० किमी लांबीचे काम प्रगतीपथावर आहे. ठाणे वर्तुळाकार मेट्रो मार्ग व पुण्यातील स्वारगेट ते कात्रज विस्तार मार्गिका या प्रकल्पाला केंद्रानं मान्यता दिली आहे. पुणे मेट्रो टप्पा २ अंतर्गत खडकवासला, स्वारगेट, हडपसर, खराडी व नळस्टॉप, वारजे, माणिकबाग या दोन मार्गिकांचा ९८९७ कोटी किमतीचा प्रस्ताव केंद्राकडे पाठवला आहे - अजित पवार

मुंबई उपनगरातील वाहतूक गतिमान व्हावी यासाठी वर्सोवा ते मढ, वर्सोवा ते भाईंदर किनारी मार्ग, मुलुंड ते गोरेगाव, ठाणे ते बोरीवली आणि ऑरेंज गेट ते मरीन ड्राईव्ह भुयारी मार्ग असे ६४ हजार ७८३ कोटी किमतीचे प्रकल्प हाती घेण्यात आले आहेत. ठाणे ते नवी मुंबई आंतरराष्ट्रीय विमानतळ असा उन्नत मार्ग बांधण्याचं नियोजन असून त्याद्वारे ठाणे, डोंबिवली, कल्याण व इतर महत्त्वाची शहरं विमानतळाशी जोडली जाणार आहेत. बाळकुंभ ते गायमुख या ठाणे किनारी मार्गाची लांबी १३.४५ किमी असून त्याचे ३३६४ कोटींचे खर्चाचे काम २०२८ पर्यंत पूर्ण करण्याचं नियोजन - अजित पवार

समृद्धी महामार्गाचं ९९ टक्के काम पूर्ण झालं असून त्यासाटी ६४ हजार ७५५ कोटी रुपये खर्च झाला आहे. इगतपुरी ते आमणे या ७६ किमी लांबीचा टप्पा लवकरच वाहतुकीसाठी खुला होईल - अजित पवार

पंतप्रधान ग्रामसडक योजना टप्पा तीन अंतर्गत ६५०० किमी लांबीची ५६७० कोटी किमतीची कामे मंजूर असून त्यापैकी ३७८५ किमी लांबीची कामे पूर्ण झाली आहेत. पुढील वर्षासाठी १५०० किमी लांबीच्या रस्त्याचं उद्दिष्ट ठेवण्यात आलं आहे - अजित पवार</p>

दिघी, वेंगुर्ला, डोंबिवली, मीरा भाईंदर, ठाणे येथील जेट्टीची कामं प्रगतीपथावर आहेत. हवामान बदल व इतर नैसर्गिक आपत्तींपासून बचाव करण्यासाठी किनारी जिल्ह्यांत ८ हजार ४०० कोटींचा बाह्र सहाय्य प्रकल्प राबवला जाणार आहे - अजित पवार</p>

गेट वे ऑफ इंडियाहून मांडवा एलिफंटापर्यंत सुरक्षित प्रवासासाठी अत्याधुनिक सुविधांनी युक्त बोटींना आर्थिक प्रोत्साहन देण्याचं धोरण जाहीर केलं जाईल - अजित पवार

बंदरांच्या करारांचा कालावधी वाढवून ९० वर्षे करण्यात आला आहे - अजित पवार

विमान चालन, रेल्वे, मेट्रो, महामार्ग, जलवाहतूक, बंदर विकास, सिंचन, उर्जा या क्षेत्रांत येत्या ५ वर्षांत विक्रमी गुंतवणूक करण्याचा विचार - अजित पवार

नव्या उद्योगांसाठी १७ ठिकाणहून घ्याव्या लागणाऱ्या १४१ सुविधा 'मैत्री' अंतर्गत एकाच ठिकाणी उपलब्ध करून देण्यात आल्या आहेत - अजित पवार

येत्या पाच वर्षांत वीज खरेदीत १ लाख १३ हजार कोटींची बचत होणं अपेक्षित आहे. त्यामुळे राज्यातील वीजेचे दर इतर राज्यांच्या तुलनेत कमी होतील - अजित पवार

देशाच्या एकूण निर्यातीत राज्याचं प्रमाण १५.४ टक्के आहे - अजित पवार</p>

उद्योग क्षेत्रातील गुंतवणुकीसाठी शासन प्रयत्नशील असल्याने मोठी गुंतवणूक राज्यात होत आहे - अजित पवार</p>

२०४७ पर्यंत भारत विकसित राष्ट्र व्हावे असा मोदींचा संकल्प आहे. त्यासाठी महाराष्ट्र अव्वल दर्जाची कामगिरी करेल - अजित पवार</p>

जनतेनं महायुतीला बहुमताचा कौल दिल्याबद्दल मी त्यांचे आभार मानतो. मतदारांचा विश्वास जबाबदारीची जाणीव करून देणारा असून त्यांचा सन्मान राखण्याचं काम महायुती सरकारकडून होईल - अजित पवार</p>

जानेवारी ते मे २०२४ या काळात अवकाळी पाऊस व गारपिटीमुळे झालेल्या नुकसानाची भरपाई जास्तीत जास्त ३ हेक्टर क्षेत्रासाठी मंजूर करण्यात आली. राज्यात त्याअंतर्गत ४ लाख ९५ हजार शेतकऱ्यांना २ लाख ८८ हजार हेक्टर बाधित शेतजमिनीसाठी ७९७.९४ कोटींची नुकसानभरपाई मंजूर करण्यात आली. जून ते सप्टेंबर काळातील या नुकसानभरपाईचा आकडा ५० लाख ३६ हजार शेतकऱ्यांना ३७ लाख ६७ हजार हेक्टर क्षेत्रासाठी १४७०.९२ कोटी नुकसानभरपाई मंजूर करण्यात आली.