Maharashtra News Updates : फेसबुक लाईव्हमध्ये तोच व्हिडीओ होता, मग तो डिलीट का केला? ठाकरे गटाच्या नेत्याचा शीतल म्हात्रेंना सवाल, वाचा प्रत्येक अपडेट एका क्लिकवर…

ही सगळी कामं, बाळासाहेबांची भूमिका याचा विचार करून भूषण देसाईंनी मला सांगितलं की, तुमच्यासोबत काम करायचं आहे. त्यांनी काम करणाऱ्या लोकांबरोबर राहायचं असा निर्णय घेतला. विकासाभिमूख निर्णय घेणारं सरकार असल्याने त्यांनी शिवसेनेत प्रवेश केला. मी त्यांचं मनापासून अभिनंदन करतो आणि शुभेच्छा देतो.

- एकनाथ शिंदे

आम्ही जेव्हा निर्णय घेतला तेव्हा ५० आमदार आणि १३ खासदार सोबत आले. तसेच हजारो नगरसेवक, जिल्हा परिषद सदस्य, पंचायत समिती सदस्य व इतर लोकप्रतिनिधी मोठ्या प्रमाणावर बाळासाहेबांच्या भूमिकेबरोबर काम करू लागले. सरकार स्थापन झाल्यानंतर हजारो कार्यकर्ते, लोकप्रतिनिधींनी आम्हाला पाठिंबा दिला.

- एकनाथ शिंदे

सुभाष देसाई यांचा मुलगा भूषण देसाई यांचा शिवसेनेशी काही संबंध होता असं मला वाटत नाही. कुणाला वॉशिंग मशिनमध्ये उडी मारायची असेल, तर ते कुठेही जाऊ शकतात. सुभाष देसाई दररोज शिवसेना पक्षप्रमुख उद्धव ठाकरे यांच्याबरोबर असतात. ते आजही शिवसेनेसाठी काम करत आहेत. त्यांनी कालही सांगितलं की, पद नसलं, मंत्रीपद नसलं, आमदारकी-खासदारकी नसली तरी त्यांनी पक्ष कार्यासाठी दिवसातील २४ तास दिले आहेत. त्यांच्यासारखी निष्ठा घेऊनच आम्ही काम करत असतो.

- आदित्य ठाकरे

४० आमदारांना सांभाळण्यासाठी निधीची उधळण सुरू आहे. २८८ आमदारांपैकी केवळ ४० आमदारांचंच सरकार आहे की काय अशाप्रकारची शंका येते. यामुळे भाजपाचेही १०५ आमदार नाराज झाले आहेत. ते बोलत नाहीत, मात्र मागून खूप धुसफूस सुरू आहे. त्यांना फार त्रास होत आहे. हे त्यांना सांगतात की, थांबा, दम काढा, विरोधी पक्षात बसण्यापेक्षा त्यांच्या नेतृत्वात आपलं काहीतरी बरं चाललं आहे. असं असलं तरी चांगलं चालावं म्हणून त्यांना २०२४ पर्यंत थांबा म्हणून सांगत आहेत. मार्गदर्शन तर असं सुरू आहे की, या नाराज आमदारांना काही बोलूच दिलं जात नाही.

- अजित पवार

आपण वेगवेगळ्या घरांच्या योजना तयार करतो. मात्र, त्याचा धनगर समाजाला पाहिजे तसा फायदा मिळत नाही. त्यामुळे हे स्पष्टपणे ठरवलं की, यातील २५ हजार घरं धनगर समाजाला मिळाली पाहिजेत. ही संख्या किमान आहे, कमाल नाही. त्यामुळे यापेक्षा अधिक घरंही मिळाली तर अधिक चांगलं आहे.

- देवेंद्र फडणवीस

राजकीय क्षेत्रात किंवा कोणत्याही क्षेत्रात काम करताना स्वतःचं चारित्र्य चांगलं ठेवणं खूप महत्त्वाचं असतं. कारण लोक आमच्याकडे 'पब्लिक फिगर' म्हणून पाहत असतात. त्यामुळे राजकीय मतं वेगवेगळी असू शकतात, मतमतांतरं असू शकतात. त्याबद्दल मला खोलात जायचं नाही. मात्र, कुठल्याही लोकप्रतिनिधीने काही केलं नसताना कुणी जाणीवपूर्वक असे प्रकार केले, त्यामागे कुणी मास्टरमाईंड असेल, तर आमचं स्पष्ट मत आहे की, याची चौकशी झाली पाहिजे. 'दूध का दूध, पाणी का पाणी' झालं पाहिजे. वस्तूस्थिती काय आहे हे लोकांना आणि सभागृहाला कळली पाहिजे.

- अजित पवार

एका आमदारासोबत महिला कार्यकर्तीचा व्हिडीओ मॉर्फ करून व्हिडीओ व्हायरल करण्यात आला. ही अतिशय निंदनीय बाब आहे. हा व्हिडीओ पहिल्यांदा कुणी मॉर्फ केला त्याला शोधून काढावं. आज हा प्रकार आज एका आमदार आणि पहिलेबरोबर झाला, उद्या ही वेळ तुमच्यावरही येऊ शकते. कारण कुठलाही माणूस कुठल्या स्तरावर जाऊ शकतो ते आम्ही व्हिडीओत बघितलं. त्या उद्घाटनाला मीही उपस्थित होते. महापालिकेचे अधिकारीही उपस्थित होते.

- आमदार यामिनी जाधव

शीतल म्हात्रेंच्या व्हिडीओची सखोल चौकशी करावी. नगरसेविका राहिलेल्या प्रतिष्ठीत महिलेबाबत रॅलीतील व्हिडीओची मॉर्फींग झाली आहे. एका महिलेने माध्यमासमोर येऊन मी चुकीची नाही असं कितीवेळा स्वतःला सिद्ध करायचं. यावर कधी कारवाई होणार? या मॉर्फिंगमुळे तिचं आयुष्य बरबाद होईल. ती विवाहीत महिला आहे. ज्याने हे केलं त्यावर कारवाईचे आदेश द्यावेत.

- मनिषा चौधरी