अंतिम वर्षाची परीक्षा; मुख्यमंत्री उद्धव ठाकरे यांची उद्या कुलगुरूंसोबत महत्त्वाची बैठक

राज्यातील विविध पदवी आणि पदव्युत्तर अभ्यासक्रमांच्या परीक्षा करोना आणि लॉकडाउनमुळे खोळंबल्या होत्या. विद्यापीठातील अभ्यासक्रमांच्या परीक्षेसंदर्भात विद्यापीठ अनुदान आयोगानं मार्गदर्शक सूचना जारी केल्या. त्यानुसार राज्य सरकारनं सर्व अभ्यासक्रमांच्या अंतिम वर्षांची अंतिम परीक्षा घेण्याचा निर्णय घेतला होता. आता विद्यापीठातील विविध अभ्यासक्रमांच्या अंतिम वर्षाच्या परीक्षा घेण्यासंदर्भात मुख्यमंत्री उद्धव ठाकरे यांनी उद्या (३० मे) कुलगुरूंची बैठक बोलावली आहे. या दुपारी बारा वाजता व्हिडीओ कॉन्फरसिंगद्वारे ही बैठक होणार आहे. यात परीक्षेसंदर्भात चर्चा करण्यात येणार आहे, अशी माहिती उच्च व तंत्र शिक्षणमंत्री उदय सामंत यांनी ट्विट करून दिली आहे.

अंतिम वर्षाच्या परीक्षा घेण्याचा निर्णय जाहीर केल्यानंतर काही दिवसांनी अंतिम वर्षाच्या परीक्षाही रद्द करण्यात याव्या, अशी मागणी सामंत यांनी विद्यापीठ अनुदान आयोगाकडं केली होती. राज्यात करोनाचा प्रादुर्भाव वाढत असून, परीक्षा घेणं विद्यार्थ्यांच्या आरोग्यांच्या दृष्टीनं शक्य नाही, अशी भूमिका त्यांनी आयोगाला पाठवलेल्या पत्रात मांडली होती. त्यामुळे उद्या होणाऱ्या बैठकीत काय निर्णय होतो? याकडे सगळ्यांचं लक्ष लागलं आहे.