पावसाळी अधिवेशन : अध्यक्षांच्या केबिनमध्ये नक्की काय घडलं?; समोर आला व्हिडीओ

अध्यक्षांच्या दालनात तालिका अध्यक्ष उपस्थित होते. तिकडे पीठासीन अधिकारी भास्कर जाधव जे काम करत होते, त्यांना जाऊन सगळ्यांनी घेरलं. त्यांच्याशी धक्काबुक्की केली आणि १५-१५ मिनिटं शिवीगाळ करत असताना, धक्काबुक्की केल्याचा आरोप नवाब मलिक यांनी पत्रकारांशी बोलताना केलाय. अशी घटना महाराष्ट्राच्या इतिहासात कधी घडलेली नाही. दुःखद हे आहे की हे घडत असताना याचा पुढाकार या राज्याचे विरोधी पक्षनेते करत होते. त्यांच्या नेतृत्वात अध्यक्षांच्या दालनात ही सर्व घटना घडली, असंही मलिक म्हणाले आहेत. प्रसारमाध्यमांशी बोलून झाल्यानंतर नवाब मलिक यांनी एक व्हिडीओही पोस्ट केलाय. अशाप्रकारे भाजपाचे नेते महाराष्ट्र विधानसभेच्या अध्यक्षांच्या केबिनमध्ये शिरले, अशी कॅप्शन मलिक यांनी या व्हिडीओ दिलीय.

नक्की वाचा >> भाजपा आमदारांनी शिव्या दिल्या, मी फडणवीसांना म्हणालो आवरा पण… ; अध्यक्षांनी सांगितलं काय घडलं

काय आहे व्हिडीओमध्ये?

या व्हिडीओमध्ये अनेक आमदार दाटीवाटीने अध्यक्षांच्या केबिनमध्ये शिरण्याचा प्रयत्न करत आहेत. करोनाच्या पार्श्वभूमीवर दोन दिवसांचे अधिवेशन ठेवण्यात आलेलं असतानाच या व्हिडीओत मात्र सोशल डिस्टन्सिंगचा फज्जा उडाल्याचं पहायला मिळत आहे. भाजपाचे आमदार जेव्हा या केबिनमध्ये शिरले तेव्हा आतमध्ये असणाऱ्या तालिका अध्यक्ष भास्कर जाधव यांचा आवाजही व्हिडीओमध्ये ऐकू येत आहे.

This is how it all started. BJP leaders stormed into #Maharashtra #Assembly #Speakers #Chamber. During first day of Assembly session pic.twitter.com/Z2NjIjwckv

— Nawab Malik نواب ملک नवाब मलिक (@nawabmalikncp) July 5, 2021

“गुंडगिरी करून सत्ता काबीज करता येत नाही…”

आता भाजपावाल्यांना गुंडगिरी करून विधानसभेचं कामकाज चालवायचं असेल, तर हे कधीही चालणार नाही,  असा इशाराही मलिक यांनी पत्रकारांशी या निलंबनाच्या कारवाईबद्दल बोलताना दिलाय. अध्यक्षांच्या दलनाजवळ झालेल्या गोंधळाच्या ठिकाणी असणाऱ्या प्रत्येक व्यक्तीवर कारवाई करण्यात आली पाहिजे, असंही मलिक म्हणाले. ज्या पद्धतीचा गुंडगिरीचा कारभार भाजपाकडून करण्यात आलेला आहे ते पाहता निश्चित रुपाने संसदीय कार्यमंत्र्याच्या माध्यमातून जे जे लोकं जिथे जिथे ज्या प्रकारे त्यांची वागणूक होती ती लक्षात घेऊन आमचा आग्रह राहील की त्यांच्यावर कारवाई झाली पाहिजे. आम्ही स्पष्टपणे सांगतोय गुंडगिरी करून सत्ता काबीज करता येत नाही. जनतेने तीन पक्षांचं सरकार दिल्यानंतर बहुमत आहे. बहुमाताच्या आधारावर सरकार चालत आहे. कधी धमक्या द्यायच्या, कधी सांगायचं की आम्ही तुरूंगात टाकू, त्याच्यातूनही काही होतं नसताना आता सरळ धमक्या, गुंडगिरी, मारामारी करण्याचं काम भाजपाची लोक करत आहेत. हे लोकशाहीच्या मार्गाला घातक आहे. महाविकासाघाडी सरकारचे तिन्ही पक्ष हे सहन करणार नाही. विधानसभेच्या नियमानुसार त्यांच्यावर जी कारवाई अपेक्षित असेल, आम्ही निश्चितपणे त्या कारवाईची मागणी अध्यक्षांकडे करणार आहोत, असंही नवाब मलिक यांनी स्पष्ट केलं आहे.

राजदंड पळवण्याचा प्रयत्न झाला…

आमदार संजय कुटे आणि गिरीश महाजन यांनी अध्यक्षांचा राजदंड पळवण्याचा प्रयत्न केला मात्र परिस्थितीचे भान ठेवतात आमदार आशिष शेलार यांनी संजय कुटे, गिरीश महाजन यांच्यासह सर्व आमदारांना वेलमधून आपल्या जागेवर नेलं. त्यानंतर थोडावेळ कामकाज तहकूब करण्यात आलं. मात्र राजदंड पळवण्यावरुन सुरु झालेल्या गोंधळातून नंतर अध्यक्षांच्या दालनाबाहेर धक्काबुक्कीही झाली. याच साऱ्या गोंधळानंतर कामकाज पुन्हा सुरु झाल्यावर १२ आमदारांना निलंबित करण्यात येत असल्याची घोषणा तालिका अध्यक्ष भास्कर जाधव यांनी केली. जाधव यांनी सविस्तरपणे आपली बाजू सभागृहासमोर मांडली.

नक्की वाचा >> समजून घ्या : राजदंड म्हणजे काय? सभागृहाच्या कामाकाजात राजदंड एवढा महत्वाचा का असतो?

“मी मगाशी फडणविसांना म्हटलं की ‘आवरा’. त्यावर…”

“मी विरोधकांना बोलू दिलं, पण जेव्हा मंत्री बोलणार तेव्हा त्यांनाही बोलू द्या अस फडणवीस यांना सांगितलं होतं. प्रस्ताव वाचा मग भाष्य करा असंगही मी सांगितलं होतं. भुजबळांनी प्रस्ताव वाचला आणि त्यांनी एक एक मुद्द्याचं स्पष्टीकरण दिलं. विरोधक म्हणाले राजकीय परतावा आहे पण तो राजकीय कसा नाही हे व्यवस्थित भुजबळांनी सांगितलं. त्यावर विरोधकांना मुद्दे उपस्थित कारायला हवे होते. मला खोटं बोलायला आणि दिलेली वेळ टाळायला आवडत नाही,” असं भास्कर जाधवांनी सांगितलं. “मी मगाशी फडणविसांना म्हटलं की ‘आवरा’. त्यावर फडणवीसांना, “नाही आवरणार, मी रागावलोय” असं उत्तर दिलं. फक्त आशिष शेलारांनी माझी ओरडून माफी मागितली. भास्करराव जाऊ द्या ना… असं शेलार म्हणाले होते,” असंही भास्कर जाधवांनी निलंबनाची कारवाई करताना सांगितलं.

नक्की वाचा >> “लोकशाहीची हत्या करणाऱ्या सरकारचा निषेध असो”, “हिटलरशाही नही चलेगी…”; भाजपाची विधानसभेच्या आवारातच घोषणाबाजी

सभागृहाबाहेर केबिनमध्ये नक्की काय घडलं?

त्यानंतर पुढे बोलताना, कदाचित वॉक आऊट करणं हा त्यांच्या योजनेचा भाग असेल असंही जाधव म्हणाले. सभागृह तहकूब झाल्यानंतर काय घडलं हे सुद्धा जाधव यांनी सांगितलं.  “वॉक आऊट करताना व्यासपीठावर काही सदस्य आले आणि माझा माईक ओढण्याचा प्रयत्न केला, राजदंड पाळवण्याचा प्रयत्न केला. मी त्यांना नेम करणार म्हणालो. नंतर सभागृह तहकूब झाल्यावर मी अध्यक्ष केबिनमध्ये अध्यक्ष खुर्चीवर नाही बसलो. मग फडणवीस रागावले होते. ते केबिनमध्ये आले. पण ते स्वतः शांत होण्याच्या मनस्थितीत नव्हते. फडणवीसांच्या मागून काही सदस्य माझ्या आई बहिणीवरुन शिव्या देत केबिनमध्ये घुसले होते. काही लोकप्रतिनिधी आमच्या अंगावर तुटून पडले. पण तुम्हाला राग आहे तर मग भास्कर जाधव ला राग कमी आहे काय? असे मी फडणवीसांना बोललो. तुम्ही सर्व असाल तर मी एकटा आहे. मी पाठ दाखवणार नाही असे बोललो,” असं जाधव यांनी सभागृह तहकूब झाल्यानंतरच्या घडामोडींबद्दल बोलताना सांगितलं.

नक्की वाचा >> …तेव्हा भास्कर जाधव, फडणवीस आणि नरहरी जिरवाळही झालेले निलंबित

“मी चूक केली असेल तर…”

“सभागृहातील लांच्छनास्पद परिस्थिती का निर्माण करण्यात आली?, इतका का राग यायला हवा?,” असे प्रश्न भास्कर जाधव यांनी भाजपाला विचारले. तसेच पुढे बोलताना, “आदेश वजा सूचना आहे की याचा योग्य निर्णय व्हायला हवा होता. आपण काय करत आहात. सिसिटीव्हीमध्ये आहे, असे मी चंद्रकांतदादांना बोललो. मी एकही चुकीचा शब्द चुकीचा बोललो नाही. जर मी चूक केली असेल तर मी पण शिक्षेला तयार आहे. पण आजचा दिवस हा काळा दिवस आहे. माझ्याबाबत हे घडले आहे ते तसेच आज ओबीसी समाजाच्या आरक्षणासंदर्भात घडलेली गोष्ट निंदनीय आहे. इथून बाहेर गेल्यावर आपण सर्वच मित्र असतो, मी माझा निर्णय दिलाय. आता सरकारने निर्णय घ्यावा,” असं भास्कर जाधव म्हणाले.