नाशिकमध्ये राष्ट्रवादी- भाजपा तोंडघशी; शिवसेनेचे नरेंद्र दराडे विजयी

शिवसेनेच्या नरेंद्र दराडे यांनी भाजप, मनसेचा पाठिंबा मिळालेल्या काँग्रेस आघाडीच्या अ‍ॅड. शिवाजी सहाणे यांचा १६७ मतांच्या फरकाने पराभव केला. विजयी होण्यासाठी पुरेसे संख्याबळ नसताना आणि सर्व विरोधक एकवटले असताना शिवसेना स्वबळावर हा चमत्कार घडविण्यात यशस्वी झाली. यानिमित्ताने विधान परिषदेच्या या मतदारसंघावरील राष्ट्रवादीचे वर्चस्व संपुष्टात आले. स्थानिक पातळीवर पक्षांतर्गत खदखद असूनही सेनेने निवडणुकीचे प्रारंभापासून सूत्रबद्ध नियोजन केले. दगाफटका होऊ नये म्हणून खुद्द पक्षप्रमुख उद्धव ठाकरे यांनी सदस्यांना तंबी दिली. आर्थिक ताकत जोखत जिल्हा बँकेचे माजी अध्यक्ष आणि कधी काळी भुजबळांचे निकटवर्तीय असणाऱ्या राष्ट्रवादीच्या दराडे यांना सेनेने रिंगणात उतरवले. राष्ट्रवादीने ही जागा राखण्यासाठी सेनेतून हकालपट्टी झालेल्या सहाणे यांना उमेदवारी देताना आर्थिक सक्षमता हाच निकष जपला. जवळपास १७८ (पुरस्कृत धरून) संख्याबळ असणाऱ्या भाजपची संदिग्ध भूमिका सेनेच्या पथ्यावर पडली. भाजपचे नेतृत्व पक्षाशी संबंधित अपक्ष उमेदवार परवेझ कोकणींना पाठिंबा द्यावा, राष्ट्रवादीला मदत करावी की सेनेला पाठिंबा द्यावा या संभ्रमात राहिले. पालघर लोकसभा पोटनिवडणुकीतील समीकरण लक्षात घेत भाजपने पावले उचलली. अखेरच्या क्षणी राष्ट्रवादीच्या पारडय़ात मतदान करण्याच्या सूचना दिल्या गेल्या. मात्र तोवर पुलाखालून बरेच पाणी वाहून गेले होते. दुसरीकडे पालकमंत्री गिरीश महाजन यांची सूचना भाजप नगरसेवकांनी धुडकावल्याचे निकालावरून लक्षात येते.

भाजपचे अनेक सदस्य आधीच सेनेच्या गळाला लागले होते. प्रारंभापासून उमेदवारीसाठी झुलवत अखेर डावलण्यात आल्याने अपमानित झालेल्या कोकणी यांनी सेनेशी संधान साधले. मतदारसंघात जवळपास १०० मुस्लीम सदस्य आहेत. मालेगाव महापालिका आणि नाशिक जिल्हा परिषदेत सेना-काँग्रेसची एकत्रित सत्ता आहे. राज्यमंत्री दादा भुसे आणि कोकणी यांची शिष्टाई मुस्लीम सदस्यांना सेनेकडे वळवण्यात महत्त्वाची ठरली. निकालावर परिणाम करणारा हा एक प्रमुख घटक ठरला. मराठा क्रांती मोर्चाच्या नियोजनात सहभागी असणाऱ्या सहाणे यांच्या विरोधात सेनेने मराठेतर घटकांची मोट बांधत जातीय समीकरणांवर मतांची बेगमी केली. सर्व पक्षातील ओबीसी नेते प्रत्यक्ष-अप्रत्यक्षपणे त्यांच्या मदतीला धावून आले. अर्थात, भाजप, राष्ट्रवादीदेखील त्यास अपवाद राहिली नाही. भाजपसह सर्वपक्षीयांची मते फुटण्यात हाच कळीचा मुद्दा ठरला. गतवेळी सेनेचे उमेदवार असताना सहाणे यांनी राष्ट्रवादी अर्थात खुद्द तत्कालीन पालकमंत्री छगन भुजबळांच्या नाकीनऊ आणले होते. सेनेशी सौहार्दपूर्ण संबंध ठेवणाऱ्या भुजबळांचे ओबीसी राजकारण सर्वश्रुत आहे. एकाच दगडात दोन पक्षी मारण्याचा प्रयोग त्यांनी यंदा केला नसेल असे म्हणता येणार नाही. भाजपच्या पाठिंब्यामुळे निर्धास्त राहिलेली काँग्रेस आघाडी आणि खुद्द भाजपवर गनिमीकाव्याने हल्ला चढवत शिवसेनेने लक्षणीय विजय प्राप्त केला आहे.