Mumbai Maharashtra News Updates, 11 September 2024: महाराष्ट्र विधानसभा निवडणुकीआधी भाजपाने अंतर्गत सर्व्हे केला असून त्यामध्ये अजित पवार गट आणि एकनाथ शिंदे यांच्या गटाला अतिशय कमी जागा मिळणार असल्याचा दावा, शरद पवार गटाचे आमदार रोहित पवार यांनी केला. त्यानंतर राज्यातील राजकारणात विविध चर्चा सुरू झाल्या आहेत. असा कोणताही सर्व्हे झालेला नसल्याचे भाजपाने सांगितले आहे. तर अमित शाह यांच्या मुंबई दौऱ्यानंतर महायुतीचा मुख्यमंत्री कोण? महाराष्ट्रात बिहार पॅटर्न राबविण्याची चर्चा झाली का? याबद्दल अटकळ बांधली जात आहे. तसेच मैत्रीपूर्ण लढतीसंदर्भातही महायुतीमध्ये चर्चा झाल्याची माहिती सूत्रांनी दिली आहे. या सर्व घडामोडींवर राजकीय क्षेत्रातून काय प्रतिक्रिया येतात, याकडे लक्ष असणार आहे.
