Mumbai Maharashtra News Today : हिंदवी स्वराज्याचे संस्थापक आणि महाराष्ट्राचं आराध्य दैवत छत्रपती शिवाजी महाराज यांची आज जयंती आहे. यानिमित्त किल्ले शिवनेरी येथे मोठ्या दिमाखदार सोहळ्याचं आयोजन करण्यात आलं आहे. तसेच राज्यभरात ठिकठिकाणी वेगवेगळ्या कार्यक्रमांचं आयोजन करण्यात आलं आहे. या कार्यक्रमांविषयीच्या बातम्यांवर आपलं लक्ष असेल. तसेच राज्यात मराठा आरक्षणाचा विषय तापला आहे. यासंबंधीच्या बातम्या वाचकांना इथे वाचायला मिळतील.
Maharashtra News Today, 19 February 2024 : महाराष्ट्रासह देशभरातील महत्त्वाच्या बातम्यांचा आढावा एकाच क्लिकवर.
पुणे : भारती विद्यापीठ परिसरामधून एका शाळकरी मुलाचे ५० लाखांच्या खंडणीसाठी अपहरण करण्यात आल्याची धक्कादायक घटना उघडकीस आली. पोलिसांनी तातडीने तपास करून मुलाची सुटका केली.
भाईंदर : मिरा रोड येथे पोलीस आयुक्तांना आणि राजकीय पुढाऱ्यांना भेटण्यासाठी येणाऱ्या वारीस पठाण यांना पोलिसांनी शहराच्या वेशीवरच रोखून परत पाठवले आहे.
पुणे : राष्ट्रीय अंधत्व व दृष्टी क्षीणता नियंत्रण कार्यक्रमांतर्गत राज्यभरात आजपासून (१९ फेब्रुवारी) ४ मार्चपर्यंत विशेष मोतीबिंदू शस्त्रक्रिया मोहीम राबवण्यात येत आहे. या मोहिमेत १ लाख रुग्णांच्या मोतीबिंदू शस्त्रक्रिया करण्याचे उद्दिष्ट सार्वजनिक आरोग्य विभागाने ठेवले आहे.
सविस्तर वाचा...
अमरावती : शहरातील वर्दळीच्‍या एका चौकात एक युवक हाती एक बाटली घेऊन येतो. काहीही न बोलता शांतपणे अंगावर पेट्रोल ओतून घेतो. लोकांना काही कळण्‍याआधीच तो स्‍वत:ला पेटवून घेतो. क्षणात तो होरपळून जातो.
सांगली : प्रक्रिया न करता सांडपाणी सोडून कृष्णा नदी प्रदुषित केल्याबद्दल सांगली महापालिकेला ९० कोटी रूपयांचा दंड प्रदुषण नियंत्रण मंडळाने ठोठावला असल्याची माहिती अ‍ॅड. ओंकार वांगीकर, सुनील फराटे व तानाजी रूईकर यांनी सोमवारी पत्रकार बैठकीत दिली.
वाशिम : लग्नावर होणारा अवाजवी खर्च टाळून मालेगाव तालुक्यातील शिरपूर जैन येथे गवळी समाजाच्या वतीने रविवारी, १८ फेब्रुवारीला सामूहिक विवाह सोहळ्याचे आयोजन करण्यात आले होते. या सामुहिक विवाह सोहळ्यामध्ये एकाच मंडपात अवघ्या ३० ते ३५ मिनिटात २६ जोडप्यांचा विवाह सोहळा पार पडला.
नागपूर : वर्धा येथील महात्मा गांधी आंतरराष्ट्रीय हिंदी विश्वविद्यालयाच्या विद्यार्थ्याला विश्वविद्यालयाविरोधात समाज माध्यमावर पोस्ट टाकणे चांगलेच अंगलट आले आहे. विश्वविद्यालयाने बडतर्फ केल्याने परिक्षेपासून मुकण्याची वेळ आल्याने विद्यार्थ्याने मुंबई उच्च न्यायालयाच्या नागपूर खंडपीठात याचिका दाखल केली आहे.
नागपूर : नागपूरच्या विदर्भ क्रिकेट संघाच्या मैदानावर झालेल्या रणजी सामन्यात विदर्भाच्या संघाने हरयाणाचा ११५ धावांनी पराभव केला. विदर्भ संघासाठी दीड दशकाहून अधिक काळापासून फलंदाजीचा कणा असलेला व संघाचा सर्वात यशस्वी कर्णधार फैज फजलने रविवारी देशांतर्गत क्रिकेटमधून निवृत्ती जाहीर केली होती.
शरद पवार यांना त्यांच्या पक्षाला राष्ट्रवादी काँग्रेस पार्टी - शरदचंद्र पवार हे नाव वापरण्याचा अधिकार देणारा निवडणूक आयोगाचा ७ फेब्रुवारीचा आदेश कायम राहील, असं सर्वोच्च न्यायालयाने म्हटलं आहे. शरद पवार नवीन चिन्हासाठी निवडणूक आयोगाकडे जाऊ शकतात. तसेच अर्ज केल्यानंतर एका आठवड्याच्या आत त्याची नोंद करणे आवश्यक आहे.
नागपूर : पंतप्रधान मोदींनी देशाला विकसित भारताची गॅरंटी दिली आहे. त्यामुळे राहुल गांधी जिथे यात्रा काढतील तिकडे त्यांना मोदी आणि भाजपचा जयघोष पाहायला आणि ऐकायला मिळेल, असे मत भारतीय जनता पक्षाचे प्रदेशाध्यक्ष चंद्रशेखर बावनकुळे यांनी व्यक्त केले.
शरद पवार यांना त्यांच्या पक्षाला राष्ट्रवादी काँग्रेस पार्टी - शरदचंद्र पवार हे नाव वापरण्याचा अधिकार देणारा निवडणूक आयोगाचा ७ फेब्रुवारीचा आदेश कायम राहील, असं सर्वोच्च न्यायालयाने म्हटलं आहे. शरद पवार नवीन चिन्हासाठी निवडणूक आयोगाकडे जाऊ शकतात. तसेच अर्ज केल्यानंतर एका आठवड्याच्या आत त्याची नोंद करणे आवश्यक आहे.
कल्याण : क्रिकेट स्पर्धा महाविद्यालयाच्या आहेत. आरोपी हा महाविद्यालयात विद्यार्थी नसताना, तो दुसऱ्या गटाकडून का क्रिकेट खेळत आहे, असा प्रश्न एका तरूणाने उपस्थित केला. या वादातून एका महाविद्यालयीन विद्यार्थ्याला बनावट महाविद्यालयीन विद्यार्थी म्हणून खेळणाऱ्या तरुणाने बेदम मारहाण केली.
पुणे : पुणे पोलिसांच्या गुन्हे शाखेने मोठी कारवाई करून साडेतीन कोटी रुपयांचे मेफेड्रोन जप्त केले. या प्रकरणी सोमवार पेठेतील गुंड वैभव उर्फ पिंट्या माने याच्यासह तिघांना अटक करण्यात आली असून, अमली पदार्थ तस्करीमागे आंतरराष्ट्रीय तस्कर असल्याचा संशय आहे.
पिंपरी : काही वर्षांपूर्वी भारताला रॉकेट, गोळी, बंदुकीसाठी दुसऱ्या देशावर अवलंबून रहावे लागत होते. पंतप्रधान नरेंद्र मोदी यांनी आत्मनिर्भर भारत ही संकल्पना आणली. भारतीय बनावटीची आयएनएस विक्रांत ही विमानवाहू युद्धनौका, स्वदेशी बनावटीचे ‘तेजस’ लढाऊ विमान, ‘प्रचंड’ हेलिकॉप्टर संरक्षण दलात दाखल झाले आहे.
पनवेल : राज्य सरकार देशातील पहिले भव्य प्रशिक्षण केंद्र कळंबोली येथील सहा एकर भूखंडावर उभारत आहे. हे केंद्र उभारण्यासाठी सरकारने उद्योग विभागाला १७०० कोटी रुपयांच्या वित्त मंजूरी दिली आहे. २३ फेब्रुवारीला या केंद्राच्या बांधकामाची निविदा प्रसिद्ध होणार असून निविदा प्रक्रीया पुर्ण झाल्यावर पुढील ३ वर्षात हे केंद्र बांधून त्यामधून कौशल्यपुर्ण शिक्षण घेतलेले प्रशिक्षणार्थी राज्याला मिळतील. उद्योगमंत्री उदय सामंत यांचा हा महत्वकांक्षी प्रकल्प असून या प्रकल्पामुळे पनवेल व कळंबोलीचे महत्व राज्यात वाढणार आहे.
पनवेल : नवी मुंबईतील उलवे किनारपट्टीवरील तिरुपती बालाजी मंदिराला किनारपट्टी नियमन क्षेत्राची परवानगी मिळाली आहे. या परवानगीविषयी स्पष्टीकरण राष्ट्रीय हरित लवादाने महाराष्ट्र सागरी किनारा व्यवस्थापन प्राधिकरणाकडे मागीतले आहे. यामुळे पुन्हा एकदा उलवे येथील बालाजी मंदीर भूखंड प्रकरण चर्चेत आले आहे.
नाशिक : जिल्ह्यात तीन मार्च रोजी राष्ट्रीय पल्स पोलिओ लसीकरण मोहीम राबविण्यात येणार असून त्याअनुषंगाने जिल्हाधिकारी जलज शर्मा यांच्या अध्यक्षतेखाली जिल्हा शीघ्र कृती दलाची बैठक घेण्यात आली.
आरोग्य विभागाच्या वतीने आयोजित बैठकीत संबंधित सर्व विभागांचे खातेप्रमुख उपस्थित होते. या मोहिमेत शून्य ते पाच वर्ष वयोगटातील चार लाख, ३५ हजार, ३५६ बालकांना पल्स पोलिओची मात्रा देण्यात येणार आहे. जिल्हा परिषदेच्या मुख्य कार्यकारी अधिकारी आशिमा मित्तल यांनी मोहीम प्रभावीपणे राबविण्याबाबत व शंभर टक्के लाभार्थी मोहिमेत पूर्ण करण्याबाबत सूचना दिल्या. जिल्हा आरोग्य अधिकारी डॉ. सुधाकर मोरे यांनीही नियोजनाची माहिती दिली. ११२ प्राथमिक आरोग्य केंद्र, ५९२ उपकेंद्र, पाच हजार अंगणवाडी केंद्राच्या माध्यमातून आरोग्य कर्मचारी, अंगणवाडी कार्यकर्ती, आशा कर्मचारी, ६०० पर्यवेक्षक यांच्या सहकार्याने नियोजन केले असल्याचे माता बाल संगोपन अधिकारी डॉ. हर्षल नेहते यांनी सांगितले. तीन मार्च रोजी मात्रा घेण्यापासून राहणाऱ्या बालकांना पाच ते सात मार्च या कालावधीत घरोघरी जाऊन मात्रा देण्यात येणार आहे
बैठकीस अतिरिक्त जिल्हा आरोग्य अधिकारी डॉ. राजेंद्र बागुल, सहायक जिल्हा आरोग्य अधिकारी डॉ. दीपक लोणे, डॉ. युवराज देवरे आदी उपस्थित होते.
पुणे : अपमानास्पद वागणूक दिल्याने वाघोली पोलीस चौकीच्या आवारात पेटवून घेणाऱ्या तरुणाचा उपचारादरम्यान सोमवारी सकाळी मृत्यु झाला. रोहिदास अशोक जाधव (वय ३२, रा. वाघोली) असे मरण पावलेल्या तरुणाचे नाव आहे.
पुणे : शिक्षक भरती प्रक्रिया पूर्णपणे संगणकीकृत असल्याने त्यात हस्तक्षेपाला वाव नाही. त्यामुळे अभियोग्यताधारकांमध्ये संभ्रम निर्माण करण्याचा खोडसाळपणा करणाऱ्यांवर पोलिसांमार्फत स्वतंत्रपणे देखरेख करण्यात येत आहे , अशी माहिती शिक्षण आयुक्त सूरज मांढरे यांनी दिली.
मुंबई : कुलाबा-वांद्रे-सीप्झ म्हणजेच मेट्रो ३ मार्गिकेतील आरे ते बीकेसी अशा पहिल्या टप्प्याची चाचणी (ट्रायल रन) फेब्रुवारीच्या मध्यावर केली जाणार असल्याचे मुंबई मेट्रो रेल कॉर्पोशन (एमएमआरसी) कडून जाहीर करण्यात आले होते. मात्र अद्याप ही चाचणी रखडली आहे.
वाई: पाचगणी खिंगर (ता महाबळेश्वर) येथील पाचगणी टेन्ट हाऊस या रिसॉर्टमध्ये बारबाला नाचवून पैसे उधळल्या प्रकरणी बारा बारबालांसह सोलापूर जिल्ह्यातील २४ खते औषधे बी बियाणे विक्रेते व इतर असे एकूण ४८ जणांवर सातारा पोलीस अधीक्षक समीर शेख व अप्पर पोलीस अधीक्षक आंचल दलाल यांनी रिसॉर्टवर छापा टाकून कारवाई केली.
ठाणे : ठाकरे गटाचे खासदार राजन विचारे यांनी छत्रपती शिवाजी महाराज यांना जयंती निमित्ताने एक पत्र लिहीले आहे. महाराज खरंच येऊन बघा.. चाकू, सुरे, कोयते, तलवारी, बंदूका घेऊन गुंड सर्रास फिरत आहेत. कोण आमचा मुडदा पाडेल याची भिती स्त्यावरून चालताना वाटत आहे. हे आमच्या जीवावर उठले आहेत. तुमच्या राज्यात रयतेला अभय होते. आता आम्हाला कोण वाचविणार ? ती माती कुठे गेली महाराज? हे स्वराज्य नाही महाराज असे विचारे यांनी पत्रात म्हटले आहे.
नागपूर : देशातील अनेक भागातून थंडीने आता पूर्णपणे काढता पाय घेतला असला तरी अवकाळी पाऊस मात्र पाठ सोडायला तयार नाही. फेब्रुवारी महिन्याच्या दुसऱ्याच आठवड्यात देशातील अनेक भागांमधून थंडी गायब झाली असून उन्हाच्या झळा बसण्यास सुरुवात झाली आहे.
पुणे : एकतर्फी प्रेमातून तरुणीच्या नकळत तिच्या दुचाकीला जीपीएस यंत्र लावून तिचा पाठलाग करण्यात आल्याचा प्रकार उघडकीस आला आहे. या प्रकरणी विश्रामबाग पोलिसांनी बारामतीतील एका तरुणाविरुद्ध गुन्हा दाखल केला आहे.
डोंबिवली : महाविद्यालयीन शिक्षण पूर्ण करणाऱ्या एका २० वर्षाच्या विद्यार्थ्याला मद्याच्या धुंदीत असलेल्या आठ ते १० जणांनी काही दिवसापूर्वी ठाकुर्ली उड्डाण पुलाजवळ रात्रीच्या वेळेत बेदम मारहाण केली. मारहाण करणारी आठ ते १० मुले गरीबाचापाडा भागातील रहिवासी आहेत. ती मोकाट फिरत असुनही पोलीस त्यांना अटक करत नसल्याची तक्रार पीडित मुलाच्या वडिलांनी ठाणे पोलीस आयुक्तांकडे केली आहे.
इतर पक्षांमधून भाजपात चालू असलेल्या इनकमिंगबाबत भाजपा प्रदेशाध्यक्ष चंद्रशेखर बावनकुळे म्हणाले, कुणीही आमच्या पक्षात आले तरी भाजपाचा कार्यकर्ता व्यथित होत नाही. कारण भाजपाचा कार्यकर्ता राष्ट्रप्रथम या भूमिकेतून काम करतो. भाजपा विचारधारेवर चालणारा पक्ष आहे, त्यामुळे फार चिंता करण्याची गरज नाही.
पनवेल : मागील आठवड्यात खांदेश्वर आणि नवीन पनवेल वसाहतीनंतर सोनसाखळी चोरट्यांनी पनवेल शहरातील पायी चालणा-यांना लक्ष्य करण्यास सूरुवात केली. पनवेल शहरात रविवारी सायंकाळी साडेसात वाजता पायी चालणा-या ७१ वर्षीय वृद्ध महिलेला सोनसाखळी चोरट्यांनी लुटल्याची घटना घडली.
धुळे : जिल्ह्यातील लोणखेडी येथे झोपडीला अचानक लागलेल्या आगीत चिमुकल्या भाऊ- बहिणीचा होरपळून मृत्यू झाला. रेणू (चार वर्षे) आणि अमोल (सात वर्षे ) नाना पवार अशी दोघांची नावे आहेत.
धुळे : शहरासह जिल्ह्यात पोलिसांपुढे दररोज गुंडांचे आव्हान उभे राहत असून गुंडांकडे बंदुका येतात तरी कुठून, असा प्रश्न धुळेकरांना पडला आहे. दहशत माजवण्याच्या उद्देशाने गावठी बंदुका घेऊन फिरणाऱ्या अशाच एका गुंडास स्थानिक गुन्हे अन्वेषण शाखेच्या पथकाने ताब्यात घेतले असून त्याच्याकडून दोन गावठी बंदुका आणि दोन जिवंत काडतुसे जप्त करण्यात आली आहेत.
नागपूर : भारतीय आयुर्विज्ञान परिषदेच्या निकषानुसार खासगी वैद्यकीय महाविद्यालयातील निवासी डॉक्टरांनाही शासकीय वैद्यकीय महाविद्यालयातील निवासी डॉक्टरांप्रमाणे विद्यावेतन मिळायले हवे. परंतु, राज्यातील खासगी वैद्यकीय महाविद्यालये कमी विद्यावेतन देऊन निवासी डॉक्टरांची बोळवण करत आहे. यामुळे खासगी वैद्यकीय महाविद्यालयातील निवासी डॉक्टर संतप्त आहेत.
उदयनराजे भोसले
छत्रपती शिवाजी महाराज हे लोकशाहीचे जनक : उदयनराजे भोसले
छत्रपती शिवाजी महाराजांचे १३ वे वंशज उदयनराजे भोसले यांनी आज (१९ फेब्रुवारी) सकाळी नागपूर येथे शिवजयंती साजरी केली आणि सर्व शिवभक्तांना शुभेच्छा दिल्या. यावेळी ते म्हणाले, छत्रपती शिवाजी महाराजांचा विचार पुढच्या पिढीपर्यंत पोहोचवण्याचं काम सर्वांनी केलं पाहिजे. महाराजांचा लोक कल्याणाचा विचार होता आणि शिवराय हे लोकशाहीचे जनक आहेत. भारतीय जनता पार्टीच्या नेतृत्वाखालील सरकार महाराजांचा हा विचार पोहोचवण्याचं काम करत आहेत. त्या जोडीने राज्यासह देशाचा विकास करत आहे.
