Mumbai News Update : लोकसभा निवडणुकीचे पडघम वाजू लागले आहेत. या पार्श्वभूमीवर देशभरात उमेदवाऱ्या, युत्या-आघाड्यांमध्ये जागावाटपावर चर्चा होत आहेत. महाराष्ट्रातही अशीच परिस्थिती आहे. यासंदर्भातील राजकीय बातम्यांचा आढावा आपण घेणार आहोत. तसेच जम्मू-काश्मीरला विशेष दर्जा देणारं कलम ३७० हटवल्यानंतर पंतप्रधान नरेंद्र मोदी पहिल्यांदाच काश्मीर दौऱ्यावर गेले आहेत. आज ते श्रीनगरमध्ये जनतेला संबोधित करतील. मोदींच्या या दौऱ्यावरही आपलं लक्ष असेल. दुसऱ्या बाजूला पश्चिम बंगालमधील संदेशखाली प्रकरण आणि दिल्लीच्या सीमेवर ठाण मांडून बसलेल्या शेतकऱ्यांच्या आंदोलनाबाबतच्या बातम्याच्यां आढावा आपण घेणार आहोत.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
Maharashtra Live News Today 07 March 2024 : राज्यासह देशभरातील महत्त्वाच्या बातम्या
मंगळागौरीच्या पारंपरिक खेळाचे सूत्र घेऊन स्त्रीच्या भावविश्वात डोकावणाऱ्या ‘बाईपण भारी देवा’ या केदार शिंदे दिग्दर्शित चित्रपटाने अतुलनीय यश मिळवले. प्रेक्षकपसंती आणि आर्थिक कमाई दोन्ही बाबतीत वरचढ ठरलेल्या या चित्रपटानंतर केदार शिंदे यांनी त्यांच्या ‘आईपण भारी देवा’ या आगामी चित्रपटाची घोषणा केली आहे.
नागपूर : भारतात यंदा ७१ व्या ‘मिस वर्ल्ड स्पर्धे’चे आयोजन केले जात आहे. मुंबई येथे होणाऱ्या या स्पर्धेत नागपूरकर डिझायनरचा पोशाख झळकणार आहे. शहरातील फॅशन डिझायनर प्रेरणा गुप्ता यांनी मिस वर्ल्ड स्पर्धेसाठी विशेष पोशाखाची निर्मिती केली आहे.
बुलढाणा: नांदुरा येथे करण्यात आलेल्या अज्ञात युवकाच्या खून प्रकरणाचा उलगडा झाला असून यातून धक्कादायक कारण बाहेर आले आहे. या युवकाचा त्याच्या तिघा घनिष्ठ मित्रांनी पैशांच्या कारणावरून खून केल्याचे निष्पन्न झाले.
शिल्पकार खटावकर यांच्या स्टुडिओत छत्रपती शिवाजी महाराजांच्या पुतळ्याचे पूजन करून हा पुतळा आसामकडे रवाना करण्यात आला.
बारा ज्योर्तिलिंगापैकी एक असलेल्या त्र्यंबकेश्वर येथे महाशिवरात्रीनिमित्त भाविकांची मोठ्या प्रमाणावर गर्दी होणार आहे. या पार्श्वभूमीवर, राज्य परिवहन महामंडळाच्या वतीने नाशिक, भगूर, सिन्नर येथून त्र्यंबकेश्वरसाठी जादा बससेवेचे नियोजन करण्यात आले आहे.
शिवसेना नगरसेवक कमलाकर जामसांडेकर यांच्या हत्येप्रकरणी शिक्षा झाल्यानंतर पॅरोलवर (अभिवचन) बाहेर आलेला शिक्षाबंदी नरेंद्र गिरी कारागृहात परतला नव्हता. अखेर गुन्हे शाखेच्या अधिकाऱ्यांनी त्याला अटक केली. सविस्तर वाचा…
पंचवटीतील मखमलाबादजवळील वडजाईमाता नगरात एकाच वेळी तीन बिबट्यांचा मुक्त संचार सुरू असल्याचे उघड झाल्याने नागरिकांमध्ये भीतीचे वातावरण आहे. काही दिवसांपूर्वी बिबट्याने घोड्याच्या शिंगरुला मारले होते. सविस्तर वाचा…
या घोटाळ्याचा यापूर्वी तपास करणाऱ्या विष्णुनगर पोलीस ठाण्यातील अधिकाऱ्यांची बदली झाली आहे.
लग्नाचे अमिष दाखवून ३४ वर्षीय महिलेवर एका तरुणाने अनेकदा बलात्कार केल्याची घटना विक्रोळीत घडली होती. या प्रकरणातील पीडित महिलेने स्वतःला जाळून घेत आत्महत्या केली असून विक्रोळी पोलिसानी याप्रकरणी गुन्हा दाखल करून तपास सुरू केला आहे.
शहरात गोदाकाठावरील कपालेश्वर मंदिरात महाशिवरात्रीनिमित्त होणारी गर्दी पाहता वाहतूक शाखेच्या वतीने मंदिर परिसराकडे येणारे रस्ते वाहतुकीसाठी बंद ठेवण्यात येणार आहेत.
वर्धा : गाव करी ते राव न करी, असे म्हणतात. त्याचाच प्रत्यय आचार्य विनोबा भावे यांच्या पवनार गावात आला. गांधी, विनोबा भावेंच्या जिल्ह्यात दारूबंदी असली तरी येथे दारूचा महापूर वाहू लागल्याने गावकरी त्रस्त झाले होते. त्या अनुषंगाने मग ग्रामपंचायत सभागृहात बैठक घेण्यात आली. विषारी दारू पिल्याने गावात गेल्या पाच महिन्यांत चार युवकांचा बळी गेल्याबद्दल संताप व्यक्त करण्यात आला.
नागपूर : विदर्भ वैधानिक विकास महामंडळाच्या मुदतवाढीसाठी राज्य शासनाने मंजुरी दिली आहे. परंतु, याबाबत अधिसूचना काढण्याचा अधिकार केंद्र शासनाच्या गृहविभागाला आहे. राज्य शासनाने तसेच राज्यपालांनी याबाबत वारंवार केंद्राशी पत्रव्यवहार केला. मात्र केंद्राने काहीच प्रतिसाद दिला नाही, अशी माहिती राज्य शासनाने उच्च न्यायालयात दिली. यावर न्यायालयाने केंद्राला अंतिम संधी देत चार आठवड्यात निर्णयाबाबत माहिती सादर करण्याचे आदेश दिले.
राज्याच्या उच्च व तंत्रशिक्षण विभागाचे सुमारे चौदा हजार कोटी रुपयांचे वार्षिक अंदाजपत्रक आहे. त्यातील जवळपास १३ हजार कोटी रुपये वेतन आणि पेन्शन यावर खर्च होतात.
भोसरी परिसरातून महिलांच्या गळ्यातील मंगळसूत्र हिसकावणाऱ्या दोन सख्या भावांना आणि चोरीचे दागिने विकत घेणा-याला पोलिसांनी अटक केली. त्यांच्याकडून आठ तोळे सोने, दुचाकी असा चार लाख १५ हजारांचा ऐवज जप्त करण्यात आला. सविस्तर वाचा…
मुंबईकरांच्या वैद्यकीय उपचारावरील खर्च कमी करण्यासाठी आमचा प्रयत्न आहे. आरोग्य आपल्या दारी मोहीम सुरू करण्यात आली असून या मोहिमेतून घरोघरी जाऊन वैद्यकीय तपासणी करण्यात येणार आहे. तसेच एप्रिलपासून शून्य औषध चिठ्ठी योजनेची अमलबजावणी करण्यात येणार असल्याचे मुख्यमंत्री एकनाथ शिंदे यांनी सांगितले. सविस्तर वाचा…
शहरातील रस्त्यावरील वाहतुकीचा भार कमी व्हावा आणि वाहतूक कोंडी टळावी यासाठी उड्डानपुलाची निर्मिती केल्या जाते. मात्र, उड्डानपुलाच्या चढ आणि उतार अशा दोन्ही बाजुंना वाहतूक कोंडीची नवीन समस्या उद्भवल्यामुळे नागरिक त्रस्त झाले आहेत.
वसंत ॠतूतील मनमोहक बदल व विविध प्रकारच्या सण, उत्सवातून मिळणाऱ्या आनंद, उत्साहात या वेळी आकाशही सहभागी होणार आहे. वसंतात आसमंतातही मनमोहक घडामोडींचा बहर होणार असून ग्रहांची युती व अवकाश केंद्राच्या दर्शनाची पर्वणी आकाशप्रेमींना लाभणार आहे, सविस्तर वाचा…
नक्षली चळवळीशी संबंध असल्याचा आरोप असलेल्या प्रा. गोकलकोंडा नागा साईबाबा ऊर्फ जी.एन. साईबाबा व त्याच्या साथीदारांची आजन्म कारावासासह इतर शिक्षा मुंबई उच्च न्यायालयाच्या नागपूर खंडपीठाने रद्द केली व सर्व आरोपींची निर्दोष मुक्तता केली होती.
शहर हे पुणेरी पाट्यांसाठी प्रसिद्ध असून मागील काही वर्षांत निवडणुकीच्या काळात अनेक वेळा फ्लेक्सबाजीमधून नेत्यांना सुनावल्याचे पाहण्यास मिळाले आहे.
भुसावळ येथील तक्रारदार तरुणाने रेल्वे प्रशिक्षण संस्थेत (झेडटीआरआय) भाडेतत्त्वावर वाहने लावली आहेत.
आरतीचा अधिकार कुणाचा यावरून संघर्ष सुरू असून दोन्ही संघटनांकडून समांतरपणे गोदाआरती केली जात आहे.
मनसेच्या १८ व्या वर्धापन दिन सोहळ्याच्या निमित्ताने पक्षाने अध्यक्ष राज ठाकरे यांचा ‘भावी मुख्यमंत्री‘ म्हणून उल्लेख करत राज्याच्या राजकारणात पुन्हा आपली पकड मजबूत करण्याची धडपड चालवली आहे.
वाशिम : लोकसभा निवडणुकीची आचारसंहिता तोंडावर असताना शिवसेना शिंदे गटातील विद्यमान खासदार भावना गवळी व पालकमंत्री संजय राठोड यांच्यातील अंतर्गत गटबाजी चव्हाट्यावर आली आहे.
अंधेरी पश्चिमेतील डी. एन. नगर अष्टविनायक सहकारी गृहनिर्माण संस्थेच्या गेल्या १९ वर्षांपासून सुरू असलेल्या पुनर्विकासाचा मार्ग अखेर उच्च न्यायालयाच्या हस्तक्षेपामुळे मोकळा झाला आहे.
मावळ लोकसभा मतदारसंघात विद्यमान खासदार श्रीरंग बारणे आणि शिवसेना- उद्धव बाळासाहेब ठाकरे पक्षाचे उमेदवार संजोग वाघेरे यांच्यात चांगलीच जुंपली आहे.
बुलढाणा : बुलढाणा लोकसभा मतदारसंघावरून शिंदे गट व भाजपात चांगलीच जुंपली असताना आणि जागावाटप व उमेदवारीचा गुंता कायम असतानाच अजित पवारांच्या नेतृत्वातील राष्ट्रवादी काँग्रेसने बुलढाणा लोकसभा मतदारसंघाचा सविस्तर आढावा घेतला. यामुळे माजीमंत्री राजेंद्र शिंगणे तिसऱ्यांदा मैदानात उतरतात काय, याकडे जिल्हावासीयांचे लक्ष लागले आहे.
चंद्रपूर : विधानसभेचे विरोधी पक्षनेते आमदार विजय वडेट्टीवार म्हणतात, आमदार प्रतिभा धानोरकर भाजपमध्ये जाणार, तर आमदार धानोरकर सांगतात, वडेट्टीवार भाजपमध्ये जाणार. प्रदेश काँग्रेसच्या बैठकीला आज दोन्ही नेते हजर आहेत. त्यामुळे कोण कुठे जाणार, हे दोघांनाही विचारून घ्या व एकदाचा सोक्षमोक्ष लावून टाका. उगाच संभ्रम निर्माण करू नका, अशी मागणी जिल्हा काँग्रेस अध्यक्ष तथा राजुराचे आमदार सुभाष धोटे यांनी केली.
नागपूर : उपराजधानीतील राज्य शासनाच्या प्रादेशिक अंडी उबवणी केंद्रात हजारो कोंबड्यांना बर्ड फ्लूचे संक्रमण झाल्याची धक्कादायक माहिती पुढे आली आहे. येथील व जवळपासच्या सुमारे साडेआठ हजार कोंबड्यांना मारण्याचे आदेश प्रशासनाने दिले आहेत.
यवतमाळ – जिल्ह्याचे पालकमंत्री संजय राठोड आणि यवतमाळ-वाशिमच्या खासदार भावना गवळी यांच्यातील राजकीय वैमनस्य ऐन लोकसभा निवडणुकीच्या तोंडावर हमरीतुमरीवर आले आहे. पंतप्रधान नरेंद्र मोदी यांच्या दौऱ्यापासून या दोन्ही नेत्यांत सुरू झालेले शीतयुद्ध आता थेट रस्त्यावर पोहोचले आहे.
आपली बाजू न ऐकताच सत्र न्यायालयाने पोलीस कोठडी सुनावल्याचा दावा करून सावंत यांनी पत्नी आदिती यांच्या माध्यमातून उच्च न्यायालयात धाव घेतली होती.
“प्रसिद्धीसाठी शिंदे सरकारची दिवसाला २.८० कोटींची उधळपट्टी”, काँग्रेसचा आरोप
महाराष्ट्रात एकीकडे कर्मचाऱ्यांना वेळेवर वेतन नाही. आशा सेविका तुटपुंज्या मानधनासाठी संपावर जात आहेत. पण सरकार मात्र प्रसिद्धीला हपापले आहे, अशा शब्दांत काँग्रेसचे विधानपरिषदेचे सदस्य सतेज पाटील यांनी एकनाथ शिंदे सरकारवर हल्लाबोल केला आहे. यासाठी पुराव्यादाखल सतेज पाटील यांनी ४ मार्च रोजी राज्य सरकारने काढलेल्या अधिसूचनेची प्रतच सोबत जोडली आहे. आपल्या अधिकृत एक्स अकाऊंटवर केलेल्या पोस्टमध्ये सतेज पाटील यांनी यासंदर्भातली आकडेवारी दिली आहे. “महाराष्ट्र शासनाने लोकसभेच्या प्रचाराच्या हेतूने एका महिन्याच्या प्रसिद्धीसाठी ‘विशेष माध्यम आराखडा’ मंजूर केला आहे. यामध्ये ३० दिवसांसाठी तब्बल ८४ कोटी रुपये म्हणजेच दिवसाला २ कोटी ८० लाख रुपये माध्यमांतील प्रसिद्धीवर उधळले जाणार आहेत”, अशी पोस्ट सतेज पाटील यांनी केली आहे. सतेज पाटील यांनी सविस्तर आकडेवारी दिली आहे. “या खर्चाची आकडेवारी पुढीलप्रमाणे विभागलेली आहे: वर्तमानपत्रे – २० कोटी रुपये, वृत्तवाहिन्या – २० कोटी ८० लाख रुपये, डिजिटल होर्डिंग-एलईडी – ३७ कोटी ५५ लाख रुपये, सोशल मीडिया – ५ कोटी रुपये”, असं या पोस्टमध्ये म्हटलं आहे.
