Maharashtra News : “तर आपली सोयरीक मोडलीच म्हणून समजा”, उपोषण मागे घेण्याची तयारी दाखवत जरांगे पाटलांचा सरकारला इशारा

मराठा आरक्षणाचा तिढा सोडवण्यासाठी राज्य सरकारने मनोज जरांगे यांच्याकडे एक महिन्याचा अवधी मागितला होता. मनोज जरांगे यांनी त्यासाठी अनुकूलता दर्शवली आहे. तसेच ते म्हणाले, सरकारला एक महिन्याचा वेळ दिला तरी मी ही जागा सोडणार नाही. तुमच्या हातात प्रमाणपत्र मिळत नाही तोवर मागे हटणार नाही. समाजाने सरकारला ४० वर्ष दिली आहेत, आता एक महिना देऊ. यावर जरांगे पाटलांनी सर्व आंदोलकांना विचारलं की आपण या सरकारला एक महिना द्यायचा का? त्यावर सर्व आंदोलकांनी होकार दिला. मनोज जरांगे यांनी माच मागण्या मांडल्या.

१) अहवाल कसाही आला तरीही महाराष्ट्रातल्या मराठ्यांना सरसकट प्रमाणपत्र द्यावं लागणार.

२) महाराष्ट्रात जेवढे गुन्हे दाखल झाले आहेत तेवढे सगळे गुन्हे मागे घेतले जावेत

३) जे अधिकारी दोषी आहेत त्यांचं निलंबन करा.

४) उपोषण सोडण्यासाठी मुख्यमंत्री आणि दोन उपमुख्यमंत्री आणि सगळं मंत्रिमंडळ तसंच छत्रपती उदयनराजे भोसले, छत्रपती संभाजीराजे भोसले हे सगळे तुमच्याबरोबर आले पाहिजेत.

५) मुख्यमंत्री, उपमुख्यमंत्री म्हणजेच सरकार हे सगळं आम्हाला लेखी हवं आहे वेळेची मर्यादा घालून दिली आहे हे त्यात नमूद करावं.

या पाच मागण्या मांडून मनोज जरांगे म्हणाले, हे पाच मुद्दे पसंत असतील तर सांगू नाहीतर त्यांची आणि आपली सोयरीक मोडलीच म्हणून समजा.

सरकारचं मत आहे की मराठ्याला टिकणारं आरक्षण आम्ही देऊ, कोणीही आव्हान देणार नाही असं आरक्षण देऊ, फक्त एक महिन्याचा वेळ द्या. आम्ही एक महिनाही देऊ पण ती प्रक्रिया कशी राबवणार ते सांगा. आपलं आरक्षण अंतिम टप्प्यात आलंय, हे ४० वर्षांत आलं नव्हतं, तोंडाचा घास जवळ आला आहे. कितीही विरोध करूद्यात, आरक्षण मिळाल्याशिवाय राहणार नाही.

गेल्या १५ दिवसांपासून मराठा आरक्षणाच्या मुद्द्यावर उपोषण करणाऱ्या मनोज जरांगे पाटील यांनी आपली भूमिका कायम ठेवली आहे. राज्य सरकारकडून वारंवार मनोज जरांगे पाटील यांची मनधरणी करण्याचा प्रयत्न केला जात आहे. या पार्श्वभूमीवर झालेल्या बैठकीत राज्य सरकारने महत्त्वाचा ठराव पारित केल्याचंही बोललं जात आहे. त्यामुळे आता मनोज जरांगे पाटील उपोषण मागे घेणार असल्याचंही सांगितलं जात आहे. मात्र, जोपर्यंत हातात प्रमाणपत्र पडत नाही, तोपर्यंत मी हटणार नाही, अशी ठाम भूमिका मनोज जरांगे यांनी मांडली आहे. दरम्यान, मनोज जरांगे यांनी काही वेळापूर्वी प्रसारमाध्यमांना सांगितलं की मी आता आमच्या ग्रामस्थांशी आणि समाजाशी चर्चा करून पुढचा निर्णय घेईन. जरांगे पाटलांची समाजबांधवांबरोबरची बैठक सध्या सुरू आहे. या बैठकीतच ते त्यांचा निर्णय जाहीर करतील. पुढच्या अर्ध्या तासात जरांगे पाटलांच्या उपोषणाबाबतचा निर्णय जाहीर होईल.

शिवप्रतिष्ठानचे संस्थापक संभाजी भिडे यांनी आज जालन्यातील अंतरवाली सराटी गावात जाऊन मनोज जरांगे पाटील यांची भेट घेतली. जरांगे पाटील हे गेल्या १५ दिवसांपासून मराठा आरक्षणासाठी उपोषण करत आहेत. भिडे यांनी उपोषणस्थळी जाऊन जरांगे पाटलांची विचारपूस केली. यावेळी संभाजी भिडे म्हणाले, “मराठा समाजाला आरक्षण मिळालंच पाहिजे या निश्चयानं आम्ही तुमच्या पाठिशी उभे आहोत. तुम्ही करताय ते योग्य आहे. आत्ता सत्तेत असणारे एकनाथ शिंदे अजिबात लबाडी करत नाहीत. देवेंद्र फडणवीस लुच्चेपणा करणार नाहीत. अजित पवार जरी राष्ट्रवादीचे असले, तरी काळजी करणारा माणूस आहे, असं माझं मत आहे. तुमच्या यां आंदोलनाला तपश्चर्येला यश मिळणार. ते राजकारणी आहेत म्हणून उगीच भीती बाळगू नका. ते जो शब्द देतील तो त्यांच्याकडून पूर्ण करून घ्यायचं काम माझ्याकडे लागलं.”