Maharashtra Updates Today, 04 October 2024 : लोकसभेचे विरोधी पक्ष नेते खासदार राहुल गांधी हे आजपासून दोन दिवसीय महाराष्ट्र दौऱ्यावर आहे. त्यांच्या हस्ते आज (शुक्रवार ४ ऑक्टोबर) कोल्हापुरातील कसबा बावडा येथील भगवा चौकात छत्रपती शिवाजी महाराज यांच्या पूर्णाकृती पुतळ्याचे नावरण करण्यात येणार आहे. याशिवाय ते शनिवारी होणाऱ्या संविधान सन्मान संमेलनाला उपस्थित राहणार असल्याची माहिती विधान परिषदेतील काँग्रेसचे गटनेते आमदार सतेज पाटील यांनी दिली आहे. तसेच गुरुवारी रात्री केंद्र सरकारने मराठी भाषेला अभिजात भाषेचा दर्जा दिला आहे. यावरून आता विविध राजकीय प्रतिक्रिया येत आहेत. याशिवाय मध्यरात्री मंत्री संजय राठोड यांच्या गाडी गाडीचा अपघात झाला आहे. या अपघातात गाडीचा चालक गंभीर असल्याची माहिती आहे. यासह इतर घडामोडींकडेही आपलं लक्ष असणार आहे.
Maharashtra Breaking News Today, 04 October 2024 : मराठी भाषेला अभिजात भाषेचा दर्जा देण्याच्या निर्णयाचं शरद पवारांकडून स्वागत
लोकसभेतील विरोधी पक्ष नेते राहुल जी गांधी यांच्या विमानात तांत्रिक बिघाड झाल्याने त्यांचा आजचा कोल्हापूर दौरा रद्द झाला आहे. राहुलजी गांधी उद्या शनिवार दि. ५ ॲाक्टोबर रोजी कोल्हापूर दौ-यावर येत असून सकाळी ९.३० वा. कसबा बावडा येथे छत्रपती शिवाजी महाराजांच्या पुर्णाकृती पुतळ्याचे अनावरण करणार आहेत. त्यानंतर कोल्हापूर येथे संविधान सन्मान संमेलनाला उपस्थित राहणार आहेत.
ब्लाॅक कालावधीत अप आणि डाऊन जलद लोकल ठाणे - कल्याणदरम्यान अप आणि डाऊन धीम्या मार्गावर वळवण्यात येणार आहेत. या लोकल नियमित थांब्यासह कळवा, मुंब्रा आणि दिवा स्थानकांवर थांबतील.
परदेशी शिक्षण शिष्यवृत्तीसाठी निवड झालेल्या चार विद्यार्थ्यांनी सादर केलेली माहिती खोटी असल्याने त्यांची निवड रद्द करण्यात आली आहे.
कुदळ व फावडे हातात घेऊन निसर्ग निर्मितीचे पवित्र काम कर्जत देतील सर्व सामाजिक संघटना करत आहे असे प्रतिपादन पाणी फाउंडेशन चे प्रमुख मार्गदर्शक व सामाजिक कार्यकर्ते डॉक्टर अविनाश पोळ यांनी कर्जत येथे शारदाबाई सभागृह याठिकाणी बोलताना प्रतिपादन केले.
कर्जत येथील सर्व सामाजिक संघटना यांनी सलग १४६० दिवस पर्यावरणामध्ये काम करीत आहेत.या कार्याला चार वर्षे पूर्ण झाले. या निमित्ताने पर्यावरणामध्ये काम करणाऱ्या सर्व नागरिक संघटना यांच्या सन्मान सोहळ्याचे आयोजन करण्यात आले होते. या कार्यक्रमासाठी प्रसिद्ध मराठी सिने अभिनेत्री प्राजक्ता गायकवाड, सुनंदा पवार, प्राचार्य डॉक्टर संजय नगरकर, मोहनराव शेळके, नगराध्यक्ष उषा राऊत उपनगराध्यक्ष रोहिणी घुले, माजी नगराध्यक्ष नामदेव राऊत, त्यांच्यासह अनेक मान्यवर उपस्थित होते.
कर्जत येथे वनविभागाच्या जैवविविधता अभयारण्यामध्ये सर्व सामाजिक संघटना यांच्या पुढाकाराने शहरातील सर्व शाळा कॉलेज व महाविद्यालयातील विद्यार्थी यांनी एकत्र येत १४६० झाडे लावून या थोर विभूतींची जयंती साजरी केली.
या घटनेचा निषेध करण्यासाठी आलेल्या वंचित बहुजन आघाडीच्या कार्यकर्त्यांनी गाडीवर दगडफेक करून नुकसान केले.
दीड हजार द्यायचे आणि बहिणीकडून अप्रत्यक्षपणे पाच हजार उकळायचे, असा हा गोरखधंदा आहे, असे त्या म्हणाल्या.
महिला सुरक्षित नाहीत हे सातत्याने होत असलेल्या घटनांवरून दिसत आहे, अशी टीका प्रदेश काँग्रेसचे अध्यक्ष नाना पटोले यांनी केली.
आदिवासी आमदारांच्या आंदोलनावरून वर्षा गायकवाड यांचे शिंदे सरकारवर टीका केली आहे. कायद्या, सुव्यवस्थेचा सर्वत्र बोजवारा उडाला आहे. समाजा-समाजात तेढ निर्माण करण्याचे कुकर्म खुद सत्ताधारीच करताहेत. सत्ताकारणात आणि इव्हेंटबाजीतच मग्न असलेल्या या भंपक सरकारकडे सर्वसामान्य जनतेचे प्रश्न सोडवण्यासाठी, त्यांच्या मागण्यांना न्याय मिळवून देण्यासाठी अजिबात वेळ नाही. गोरगरीब, वंचित, आदिवासी, अल्पसंख्याक, महिला, युवा.. प्रत्येक समाजावर या सरकारकडून सातत्याने अन्याय होत आहे, अशी टीका त्यांनी केली.
सविस्तर वाचा -
ठाणे : राज्यातील ट्रीपल इंजीनच्या सरकारची तिजोरी पुर्णपणे रिकामी झालेली असतानाही केवळ प्रकल्पांच्या घोषणा करून लाडका ठेकेदार आणि पदाधिकाऱ्यांची पुढची सोय करण्यासाठी लाखोकरोडो रुपयांच्या निविदा काढल्या जात आहेत. प्रकल्प कंत्राटदार आधीच ठरवला जातो आणि त्यानंतर कंत्राट काढले जाते, असा गंभीर आरोप राष्ट्रवादी (शरद पवार गट) चे नेते जितेंद्र आव्हाड यांनी शुक्रवारी केला.
पुण्यात महिलांवरील अत्याचाराच्या घटनांमध्ये मोठ्या प्रमाणात वाढ झाली आहे. काही दिवसांपूर्वीच वानवडी भागातील एका नामांकित शाळेतील ६ वर्षांच्या दोन मुलींवर चालत्या व्हॅनमध्ये चालकाने लैंगिक अत्याचार झाल्याची घटना घडली होती. ही घटना ताजी असतानाच आता कोंढव्यातील बोपदेव घाटात मित्रांबरोबर फिरायला गेलेल्या तरुणीवर तिघांनी बलात्कार केल्याचं पुढे आलं आहे. या घटनानंतर आता सर्वत्र संताप व्यक्त केला जातो आहे. यावरून राजकीय प्रतिक्रियाही उमटू लागल्या आहेत. राष्ट्रवादी काँग्रेसचे ( शरद पवार ) आमदार रोहित पवार आणि खासदार सुप्रिया सुळे यांनीही या घटनांवरून राज्य सरकारला लक्ष्य केलं आहे.
ताथवडे येथे शुक्रवारी (४ ऑक्टोबर) चिंचवडमधील राष्ट्रवादीच्या सर्व माजी नगरसेवकांची बैठक झाली.
ठाणे येथील वर्तकनगर भागातील रेमंड कंपनीच्या जागेवर ठाणे महापालिकेची नवीन प्रशासकीय इमारत उभारण्यात येणार असून या कामाचे भुमीपुजन पंतप्रधान नरेंद्र मोदी यांच्या हस्ते शनिवारी करण्यात येणार आहे. परंतु इमारत उभारणीसाठी बगीचा आरक्षण बदलण्यास रहिवाशांचा विरोध असून त्याचबरोबर ही जागा अद्याप पालिकेच्या ताब्यात आलेली नाही.
बेलोरा विमानतळाचे लोकार्पण करणे म्हणजे अमरावतीकरांची सपशेल फसवणूक करणे होय, अशी टीका माजी राज्‍यमंत्री डॉ. सुनील देशमुख यांनी केली आहे.
समृद्धी महामार्गावर १ जुलै २०२३ ला भीषण अपघात झाला होता. या अपघातात दोन वर्षीय चिमुकलीसह २५ जणांचा होरपळून मृत्यू झाला होता.
मनसे अध्यक्ष राज ठाकरे यांचे मुख्यमंत्र्यांना पत्र
महाराष्ट्र नवनिर्माण सेनेचे अध्यक्ष राज ठाकरे यांनी महाराष्ट्रात सुरु असलेल्या चिकनगुनिया, मलेरिया व डेंगू या आजारासंदर्भातील पत्र मुख्यमंत्री एकनाथ शिंदे, आरोग्य मंत्री तानाजी सावंत व सर्व महानगरपालिका, नगरपरिषद, जिल्हा परिषद यांच्या प्रमुख यांना पत्र दिले आहे.
पनवेल ः पनवेल मुंब्रा महामार्गावर रोडपाली सिग्नलजवळ गुरुवारी दुपारी तीन वाजता एका अनोळखी ट्रकने ठोकर मारल्याने तृतीयपंथी व्यक्तीचा जागीच मृत्यू झाला. या घटनेची नोंद कळंबोली पोलीस ठाण्यात करण्यात आली असून पोलीस संबंधित ट्रकचालकाचा शोध करीत आहेत.पनवेल मुंब्रा महामार्गावरील रोडपाली सिग्नल परिसरात मोठ्या प्रमाणात वाहतूक कोंडी असते. सिग्नल सुटल्यानंतर एकाच वेळी अनेक वाहनांची धावण्याची स्पर्धा लागल्याप्रमाणे बेशीस्त वाहनचालक येथून वाहने दामटवतात. गुरुवारी दुपारी तीन वाजता ३० वर्षीय तृतीयपंथी व्यक्तीला ठोकर मारुन ट्रकचालक घटनास्थळावरुन पसार झाला.
रत्नागिरी : रिळ -उंडी औद्योगिक वसाहत (एमआयडीसी)ची घोषणा राज्य शासनाकडून करण्यात आली असली तरी रत्नागिरीतील मी-या एमआयडीसी पाठोपाठ आता रिळ - उंडी औद्योगिक वसाहतीला देखील विरोध करण्यात येत आहे.
...तर लगेच संयुक्त परीक्षेची जाहिरात त्वरित प्रसिद्ध होऊ शकते - रोहित पवार
देवेंद्र फडणवीस यांनी एपीएससीच्या अध्यक्षांना फोन करून पीएसआय भरतीसंदर्भात जाहीरात काढण्याची मागणी केली आहे. त्यावर रोहित पवार यांनी प्रतिक्रिया दिली आहे. संयुक्त परीक्षेची जाहिरात प्रसिद्ध करण्यासाठी आयोगाची कुठलीच हरकत नाही, केवळ गृहविभागाकडून पीएसआय पदाचे मागणीपत्रक आयोगाकडे गेले नसल्याने जाहिरात प्रसिद्ध होऊ शकलेली नाही. त्यामुळे आपल्या विभागाने तत्काळ रिक्त पदांचे मागणी पत्रक आयोगाला पाठवून सहकार्य केल्यास जाहिरात त्वरित प्रसिद्ध होऊ शकते, असे ते म्हणाले.
डोंबिवली - ऐन सणासुदीच्या काळात डोंबिवली पूर्व, पश्चिमतेतील बहुतांशी मुख्य वर्दळीचे रस्ते सिमेंट काँक्रीट कामांसाठी खोदून ठेवण्यात आले आहेत. हे रस्ते खोदताना कोणताही पूर्वसूचना किंवा फलक मुख्य रस्त्याच्या प्रवेशाच्या ठिकाणी लावला जात नाही. त्यामुळे या खोदकामांमुळे रस्तोरस्ती वाहन कोंडी असे चित्र डोंंबिवलीत आहे.
जाहिरातीची स्पर्धा परीक्षार्थी चातकाप्रमाणे वाट बघत असताना वर्ष उलटूनही अद्याप पदभरतीची चिन्हे दिसत नसल्याने उमेदवारांची चिंता वाढली आहे.
ठाणे : मैत्रिणीचे काही खासगी छायाचित्र मोबाईलमधून डिलीट केले नाही म्हणून ठाण्यातील स्वयंम परांजपे याची मयुरेश धुमाळ या तरूणाने कोयत्याने वार करून हत्या करण्यात आल्याचा प्रकार उघडकीस आला आहे. याप्रकरणी पोलिसांनी मयुरेश धुमाळ (२४) आणि त्याच्या मैत्रिणीला ताब्यात घेतले आहे.
कल्याण - अमेरिकेत नोकरीनिमित्त स्थायिक असलेला एका नागरिक आपल्या विवाहानिमित्त भारतात परतला आहे. तो कर्जत परिसरात राहतो. त्याने विवाहानिमित्त खरेदी केलेल्या वस्तू, अमेरिकन चार हजार डाॅलर असा एकूण चार लाख ७५ हजाराचा ऐवज असलेली पिशवी हा विदेशी नागरिक कर्जत लोकलमधून उतरून घेण्यास विसरला.
तहान लागल्यामुळे व्याकूळ झालेल्या पोलिसांना अखेर जलवाहिनीच्या ‘व्हॉल्व’मधून गळणाऱ्या पाण्याचा आधार घ्यावा लागला.
महाराष्ट्र विधानसभा निवडणुकीला अवघा महिन्याभराचा कालावधी उरला असताना आता मंत्रिमंडळ बैठकीत निर्णयांचा धडाका लावण्यात येत आहे. महाराष्ट्राच्या सर्व भागाला आणि सर्व घटकांना काही ना काही देण्याचा प्रयत्न या माध्यमातून होताना दिसत आहे.
महाज्योतीने राज्यातील ओबीसी, व्हीजेएनटी आणि एसबीसी प्रवर्गातील युवकांना वैमानिकाचे प्रशिक्षण देण्यासाठी योजना सुरू केली.
उरण : शारदोत्सवाला सुरुवात झाली असून तालुक्यातील आदिशक्तीचा जागर सुरू झाला आहे. यासाठी अनेक गावातील देवीची मंदिरे सजली आहेत.
महामेट्रोने पार्किंगचे दर कमी करावे - सुप्रिया सुळे
पुणे मेट्रोने आपल्या प्रवाशांसाठी पार्किंगची उत्तम सोय केली आहे. परंतु त्यांचे पार्किंगचे दर अवास्तव आहे. एका दुचाकीसाठी हे दर तासाला १५ रुपये तर चार चाकी वाहनांसाठी हे दर तासाला ३५ रुपये आहेत. कोर्टाच्या कामासाठी येणाऱ्या नागरीकांना सिव्हील कोर्ट स्टेशनला वाहन पार्क करायचे झाल्यास दिवसाला मोठा भुर्दंड फक्त पार्किंगसाठी सोसावा लागतो. तरी महामेट्रोला विनंती आहे की, सर्व स्टेशनच्या पार्कींगचे दर नागरीकांना परवडणारे ठेवण्याबाबत योग्य ती कार्यवाही करावी.
आपण सुखरूप आहोत. अपघात केवळ वाहनाचा झाला, आपला नाही, असे संजय राठोड म्हणाले.
उरण : शहरातील वाहतूक कोंडीवर महत्त्वपूर्ण उतारा असलेल्या उरण बाह्यवळण (बायपास) मार्गात नगर परिषद हद्दीतील जमिनीच्या भूसंपादनाचा अथडळा निर्माण झाला आहे.
मराठी भाषेला अभिजात भाषेचा दर्जा देण्याच्या निर्णयाचं शरद पवार यांनी स्वागत केलं आहे. सांगलीत माध्यमांशी बोलताना त्यांनी यासंदर्भात प्रतिक्रिया दिली. प्रत्येक मराठी माणसांचं मनापासून समाधान व्हावं, असा हा निर्णय आहे. गेली अनेक वर्षे केंद्र सरकारकडे मराठी भाषेला अभिजात दर्जा द्यावा म्हणून मागणी होती. ती मागणी महाराष्ट्र सरकारने केली. ती मागणी साहित्यीक संस्थांनी केली. ती मागणी साहित्य परिषदेमध्ये, अधिवेशनात ठराव करून केली. माझ्यासारख्या अनेक सहकारी, ज्यांना या प्रश्नामध्ये आस्था आहे. आम्ही लोकांनी सुद्धा व्यक्तिगत पातळीवर केंद्र सरकारला या सबंधीचा आग्रह केला, असं शरद पवार म्हणाले.
