Mumbai Maharashtra Breaking News Live Today, 05 December 2023: महात्मा फुले आणि सावित्रीबाई फुले यांनी पुण्यातील भिडेवाड्यात मुलींची पहिली शाळा सुरू केली होती. पुणे महानगरपालिकेनं हा भिडेवाडा सोमवारी रात्री पोलीस बंदोबस्तात जमीनदोस्त केला. आता त्या ठिकाणी राष्ट्रीय स्मारक होणार आहे. पण यावरून महाराष्ट्रातील राजकीय वातावरण तापण्याची शक्यता आहे. तसेज आज बीड जिल्ह्यातील परळी येथे राज्य सरकारचा ‘शासन आपल्या दारी’ या कार्यक्रमाचं आयोजन केलं आहे. या कार्यक्रमातून मुख्यमंत्री शिंदेसह उपमुख्यमंत्री देवेंद्र फडणवीस आणि अजित पवार काय बोलणार? याकडे सर्वांचं लक्ष लागलं आहे.
शिवाय दक्षिण भारतात धुमाकूळ घातलेलं मिचौंग चक्रीवादळ पुढे सरकलं असून अनेक राज्यांमध्ये मुसळधार पावसाचा इशारा देण्यात आला आहे. तसंच, महाराष्ट्रातही पावसाचा अंदाज व्यक्त करण्यात आला आहे. विदर्भात मुसळधार पावसाची शक्यता आहे. यांसह विविध महाराष्ट्रातील विविध घडामोडींचा एकत्रित आढावा…
Today’s Breaking News Updates: राज्यातील राजकारणासह हवामान आणि इतर महत्त्वाच्या घडामोडी एका क्लिकवर…
पालघर नगरपरिषदेने ५६ कॅमेरे बसवण्यासाठी तब्बल ८३ लाख रुपये खर्चून कार्य आदेशाला मंजुरी दिली आहे.
जगण्यासाठी आवश्यक असलेल्या प्राणवायूसाठीच सह्याद्री देवराईची स्थापना आपण केली असे प्रतिपादन अभिनेते सयाजी शिंदे यांनी केले.
अधिवेशनाच्या तोंडावर आमदार निवासाचीच वीज खंडित झाल्याने सगळ्यांनी आश्चर्य व्यक्त केले.
रिझर्व्ह बँकेने नूतन बँकेसाठी सर्व प्रकारचे व्यवहार तात्काळ बंद करण्याचे आदेश दिले असल्याने भाजप, संघ परिवाराशी निगडित या बँकेचे अस्तित्व कायमचे लयाला गेले आहे.
ही घटना पलायन की अपहरण या कात्रीत सापडलेली असली तरी पाच मुले एकाचवेळी बेपत्ता झाल्याने निरीक्षण गृहाच्या सुरक्षा व्यवस्थेवर प्रश्नचिन्ह उपस्थित झाले आहे.
सांगली : म्हैसाळ योजनेच्या टप्पा तीन व चारमध्ये पाण्याचे व्हॉल्व बसविण्यासाठी शासन मान्य दूरसुचीपेक्षा चार पट दराने खरेदी करून कोट्यावधी रुपये हडप करण्याचा डाव असल्याचा आरोप एमआयएम पक्षाचे जिल्हाध्यक्ष डॉ. महेश कांबळे यांनी मंगळवारी पत्रकार बैठकीत केला. निविदा मॅनेज करण्यासाठी वरिष्ठ अधिकार्‍यांकडून दोन महिन्यांत चार कार्यकारी अधिकार्‍यांच्या बदल्या केल्या असल्याचेही त्यांनी सांगितले.
पालघर जिल्ह्यात सर्वाधिक शेतकरी भात हे एकमेव पीक खरिप हंगामात घेत असतात. येथील ८० टक्के शेतकरी हे निव्वळ भात या पिकातून मिळाणाऱ्या उत्पादनातून वर्षभर आपला संसाराचा गाडा चालवत असतात, मात्र भाताचे पीक हाती येऊन दोन महिन्यांचा कालावधी झाला तरी या भाताची आदिवासी विकास महामंडळाकडून खरेदी केली जात नसल्याने येथील शेतकरी अर्थिक अडचणीत आला आहे.
सकल ओबीसी समाज बांधवानी मनोज जरांगे पाटील यांना काळे झेंडे दाखवीत, रस्त्यावर गोमूत्र शिंपडून निषेध व्यक्त केला.
वाहक व चालकाला विचारले असता, ‘गाडी गरम झाल्याने बंद पडली’ असे उत्तर त्यांनी दिले.
नागपूर: नागपूर विभागाचे आरोग्य उपसंचालक यांना मुंबई उच्च न्यायालयाच्या नागपूर खंडपीठात हजर राहण्याचे आदेश न्यायालयाने दिले आहे.
पनवेल: चोर चालत आला. त्याने पायी चालणाऱ्या महिलेच्या गळ्यातील सोनसाखळी खेचली अन् कोणतीच भिती न बाळगता स्वतःच्या दुचाकीपर्यंत चालत गेला. काही क्षणात महिलेला काही समजण्याआत तो उभ्या केलेल्या दुचाकीवरुन फरार झाला. या चोरीत चोरट्याने महिलेचे एक लाख २० हजार रुपयांचे सोन्याचे मंगळसूत्र लांबविले. ही घटना सोमवारी साडेसात वाजता खारघरमधील सेक्टर २१ येथील सेंट्रल पार्कजवळच्या रस्त्यावर घडली.
नागपूर: नागपूरला दरवर्षी विधिमंडळाचे हिवाळी अधिवेशन घेतले जाते. त्यासाठी येथे मुख्यमंत्री, उपमुख्यमंत्री आणि अन्य मंत्र्यांसाठी स्वतंत्र निवास व्यवस्थेची सोय आहे.
अलिबाग- सगळे प्रयत्न करून दमलो, आता देवाला कौल लावून विचारायचे राहिले आहे. काय अडचण आहे ते बघावे लागेल, मानपान राहिला असेल तर तोही करावा लागेल, असे वक्तव्य शिवसेना शिंदे गटाचे पक्ष प्रतोद आमदार भरत गोगावले यांनी केले. ते महाड येथे पत्रकारांशी बोलत होते. मला अजूनही मंत्रीपदाची आशा असून मुख्यमंत्री आणि दोन्ही उपमुख्यमंत्र्यांनी त्यात लक्ष घालावे अशी विनंती त्यांनी केली.
येत्या वर्षभरात विविध गृहनिर्माण योजनांअंतर्गत तब्बल एक लाख कुटुंबांना हक्काचे घर उपलब्ध करून देऊ, असे गृहनिर्माण मंत्री सावे यांनी म्हटले आहे.
नागपूर: विविध पायाभूत सुविधा निर्माण करण्यासाठी सरकारी यंत्रणेला विविध ठिकाणी खोदकाम करावे लागते. ते करताना त्या ठिकाणी अस्तित्वात असलेल्या इतर सुविधांना हानी पोहोचते.
राज्याचे इतर मागास व बहुजन कल्याण मंत्री अतुल सावे यांनी पुण्यात मराठा आरक्षण आणि राज्य मागासवर्ग आयोगाबाबत मोठे विधान केले आहे.
मुंबई : दहिसर येथील हरेम टेक्स्टाईलसमोर टोल नाक्याजवळ मंगळवारी सकाळी ३०० मिमी व्यासाची जलवाहिनी फुटली. यामुळे टोलनाका परिसरात पाणी साचले असून हजारो लिटर पाण्याचा अपव्यय झाला
पुणे : राज्यातील दूध उत्पादक शेतकऱ्यांना गाईच्या दुधाला ४० आणि म्हशीच्या दुधाला ८० रुपये दर मिळाला पाहिजे, या मागणीसाठी रयत क्रांती संघटनेचे अध्यक्ष आणि माजी आमदार सदाभाऊ खोत यांनी पुण्यातील लाल महाल ते कुमठेकर रोडवरील दुग्ध व्यवसाय विकास अधिकारी कार्यालयावर कावड मोर्चा काढला. या मोर्चात दूध उत्पादक शेतकरी मोठ्या संख्येने सहभागी होते. राज्य सरकार विरोधात जोरदार घोषणाबाजीदेखील केली.
भंडारा: प्रसुतीपश्चात बाळंतीण मृत्यू प्रकरणी सोमवारी जिल्हा सामान्य रूग्णालयात नातेवाईकांनी ठिय्या आंदोलन केले. डॉक्टरांच्या निष्कळजीपणामुळे मृत्यू झाल्याचा आरोप करण्यात आला आहे. मध्यरात्रीपर्यंत आंदोलन सुरू होते.
सकाळी मोर्चा काढून झाल्यानंतर आळंदी बंदचा निर्णय मागे घेण्यात आला आहे. आळंदी ग्रामस्थ हे त्यांच्या मागणीवर ठाम आहेत.
तत्कालीन तीन विश्वस्तांच्या शिफारशीमुळे नवीन तीन विश्वस्तांची नेमणूक करण्यात आल्याचा आरोप करत स्थानिकांनी आज बंदचे आवाहन केले.
मागासवर्ग आयोगाचे अध्यक्ष निवृत्त न्यायाधीश आनंद निरगुडे हे राजीनामा देण्याच्या तयारीत असल्याची जोरदार चर्चा सुरू झाली आहे.
बुलढाणा: भरधाव मालवाहू वाहन व महामंडळाच्या बसची समोरासमोर धडक झाल्याने दोन्ही चालक गंभीर जखमी झाले. तसेच बसमधील विद्यार्थी व प्रवासी जखमी झाले.
यवतमाळ: कत्तलीसाठी चारचाकी वाहनासह पायदळ होत असलेल्या आंतरराज्यीय जनावर तस्करीचा पर्दाफाश करण्यात आला. स्थानिक गुन्हे शाखेच्या पथकाने केलेल्या दोन कारवाईत ३३ जनावरांची सुटका करून १० गुन्हा दाखल करण्यात आला.
पालघर जिल्हा परिषदेच्या समाज कल्याण विभागाच्या वतीने विशेष शाळांतील अपंग विद्यार्थ्यांच्या जिल्हास्तरीय क्रीडा स्पर्धा पालघर येथे आज आयोजित करण्यात आल्या होत्या. यामध्ये पालघर जिल्ह्यातील १६ शाळांतील २९३ अपंग विद्यार्थी सहभागी झाले होते.
पोलिसांनी चार जणांकडून चार पिस्तुल व दहा काडतुसे जप्त केली आहेत.
डहाणू : चिंचणी आंबेवाडी येथे वृद्ध महिलेच्या घरात शिरून गळ्यातली सोन्याची चैन पळवणाऱ्या चोरट्याला वाणगाव पोलिसांनी अटक केली आहे. आरोपी एकाच गावातील रहिवासी असल्याचे स्पष्ट झाले असून आरोपीकडून मुद्देमाल ताब्यात घेण्यात आला आहे.
मनमाड : पालखेड धरणातील पिण्याच्या पाण्यासाठीचे आवर्तन मनमाड शहराला कधी मिळते, याकडे मनमाडकरांचे लक्ष लागले आहे. दोन-तीन दिवसांत ते अपेक्षित आहे. त्यामुळे शहराची पाणी टंचाई काही प्रमाणात तरी कमी होईल, असा अंदाज व्यक्त होत आहे.
उरण : विकासाच्या नावाने उरणच्या परिसरातील नैसर्गिक पाणथळीची ठिकाणे नष्ट होऊ लागल्याने नोव्हेंबर ते एप्रिल, मे या कालावधीत विविध देशातून हजारो किलोमीटरचा प्रवास करून येणाऱ्या फ्लेमिंगोसह इतरही जातींच्या पक्ष्यांच्या संख्येत ही घट झाली आहे. ही घट लक्षणीय असून या परिसरात येणाऱ्या दोन ते अडीच लाख पक्ष्यांपैकी आता त्यांची संख्या शेकड्यावर आली आहे. असा दावा पर्यावरवाद्यांनी केला आहे.
नागपूर: सोन्याची कुऱ्हाड असलेला विदर्भ गरीब का झाला, असा प्रश्न विचारून पालकमंत्री तथा सर्व पक्षीय खासदार, आमदारांना ७ डिसेंबरपासून गावबंदी करण्यात येत आहे, अशी घोषणा विदर्भ राज्य आंदोलन समितीचे अध्यक्ष व माजी आमदार ॲड. वामनराव चटप यांनी सोमवारी पत्रपरिषदेत केली.
मिचौंग चक्रीवादळामुळे दक्षिणेतील अनेक राज्यांमध्ये मुसळधार पावसाचा इशारा देण्यात आला आहे. महाराष्ट्रातही पावसाचा अंदाज व्यक्त करण्यात आला आहे.
