ठाणे : जिल्ह्यात राबविली जाणार बालकामगार शोधमोहीम ;बालकामगारांची माहिती देण्यासाठी प्रशासनाकडून संपर्क क्रमांक जाहीर

जिल्हा प्रशासनातर्फे १३ जून ते २० जून या आठ दिवसांच्या कालावधीत संपूर्ण जिल्ह्यात बालकामगार शोधमोहीमी तसेच बालमजुरी विरोधात जनजागृती उपक्रम राबविण्यात येणार आहेत. यामध्ये कल्याण, उल्हासनगर, भिवंडी, ठाणे या शहरांतून बालमजुरी कायद्यासंदर्भात माहिती देण्यासाठी प्रभातफेरीचे आयोजन करण्यात आले आहे. या प्रभातफेरीद्वारे फलक आणि घोषवाक्यांद्वारे बालमजुरी संदर्भातील कायदे, शिक्षा याबाबत नागरिकांना माहिती देण्यात येणार आहे. या प्रभातफेरीबरोबरच ठाणे, कल्याण, डोंबिवली या शहरांमधील गर्दीच्या ठिकाणांवर बालकामगार या विषयावर जनजागृती करणारे अनेक पथनाट्य सादर केली जाणार आहेत. तसेच ठाणे रेल्वे स्थानकात बालमजुरी विरोधात स्वाक्षरी मोहीम राबविण्याबरोबरच स्थानक परिसरातील रिक्षा चालकांमध्ये या विषयी जनजागृती करण्यात येणार आहे.

बालकामगारांची होणार सुटका
जिल्हा प्रशासनातर्फे कल्याण, डोंबिवली, उल्हासनगर आणि ठाणे शहरात ज्या ठिकाणी बालकामगार आढळून येण्याची दाट शक्यता आहे अशा काही ठिकाणांची यादी तयार करण्यात आली आहे. त्या ठिकाणी जिल्हा बालसंरक्षण अधिकाऱ्यांकडून धाडी टाकून कारवाई करण्यात येणार असून यामध्ये आढळून आलेल्या बालकांची सुटका करण्यात येणार आहे. तसेच नागरिकांना विविध आस्थापना, कारखाने, उपहारगृह, वाहन दुरुस्तीची दुकाने, वीटभट्टी यांसारख्या विविध ठिकाणी बालकामगार आढळून आल्यास त्याची माहिती देण्यासाठी ०२२-२६५७२९२९ हा क्रमांक जाहीर करण्यात आला आहे.