Saif Ali Khan Health Updates : सैफ अली खानवर हल्ला करणाऱ्या आरोपीस अटक; एकनाथ शिंदेंची माहिती

उपमुख्यमंत्री एकनाथ शिंदे म्हणाले, झालेली घटना अतिशय दुर्दैवी व दुर्भाग्यपूर्ण आहे. अशा प्रकारे कलावंतांवर हल्ला होणं अतिशय चुकीचं आहे. ज्याने हा ल्ला केला त्याला अटक करण्यात आली आहे. प्राथमिकदृष्ट्या चोरीच्या उद्देशाने ही घटना घडल्याचं समोर आलं आहे. आमचं सरकार सैफ अली खान व त्यांच्या कुटुंबाची काळजी घेत आहे. राज्यातील जनतेच्या सुरक्षेची जबाबदारी आमचीच आहे. अशा घटनांची पुनरावृत्ती होऊ नये याची आम्ही काळजी घेऊ.

कर्जत स्थानकावरील पायाभूत सुविधा वाढविण्यासाठी शुक्रवारी दुपारी १.५० ते ३.३५ वाजेपर्यंत वाहतूक ब्लॉक घेण्यात आला आहे. पळसदरी ते कर्जत स्थानकांदरम्यान ब्लॉक असेल. ब्लॉक कालावधीत बदलापूर ते खोपोली दरम्यान लोकल सेवा रद्द असतील. सीएसएमटी येथून दुपारी १२.२० वाजता सुटणारी खोपोली लोकल आणि दुपारी १.१९ वाजता सीएसएमटी येथून कर्जत लोकल अंबरनाथ स्थानकापर्यंत चालविण्यात येईल. तर, सीएसएमटी येथून दुपारी १.४० वाजता सुटणारी कर्जत लोकल बदलापूर स्थानकापर्यंत चालविण्यात येईल. तसेच कर्जत येथून दुपारी १.५५ वाजता आणि खोपोली येथून दुपारी १.४८ वाजता सुटणारी सीएसएमटी लोकल अंबरनाथ स्थानकातून चालविण्यात येईल. तर, कर्जत येथून दुपारी ३.२६ वाजता सुटणारी सीएसएमटी लोकल बदलापूर स्टेशनवरून सुटेल, अशी माहिती मध्य रेल्वेने दिली.

लीलावती रुग्णालयाचे मुख्य कार्यकारी अधिकारी नीरज उत्तामणी म्हणाले, काल रात्री सैफ अली खान रक्तबंबाळ अवस्थेत रुग्णालयात आला होता. त्याच्याबरोबर त्याचा मुलगा तैमूर तिथे होता. तो जखमी असला तरी रुग्णालयात सिंहासारखा वावरला. चित्रपटात तो हिरोची भूमिका साकारतो. मात्र तो खऱ्या आयुष्यातही एखाद्या हिरोसारखाच वागत होता. त्याची प्रकृती आता बरी आहे.

दरम्यान, सैफवर शस्त्रक्रिया करणारे डॉक्टर नितीन डांगे म्हणाले, सैफवरील शस्त्रक्रिया यशस्वी झाल्या आहेत. त्याची प्रकृती आता बरी आहे. दुखणं देखील कमी झालं आहे. आम्ही त्याला सध्या विश्रांतीचा सल्ला दिला आहे. आज त्याला अतिदक्षता विभागातून विशेष विभागात हालवलं आहे. आज शक्यतो लोकांना न भेटण्याचा सल्ला दिला आहे. कारण त्याच्या जखमा ताज्या असून संसर्गाचा धोका आहे. पुढील आठवडाभर त्याला जास्तीत जास्त विश्रांती घेण्यास सांगितलं आहे.

सैफ अली खानच्या भेटीसाठी मंत्री आशिष शेलार गुरुवारी रात्री लीलावती रुग्णालयात दाखल झाले. रुग्णालयात जाऊन त्यांनी सैफच्या कुटुंबियांची विचारपूस केली. त्यानंतर त्यांनी प्रसारमाध्यमांशी बातचीत केली. शेलार म्हणाले, आयसीयूमध्ये अभिनेते सैफ अली खान यांना बघून आलो, ते आराम करत आहेत. त्यांच्यावर सहा वार त्यांच्यावर झाले होते. दोन जखमा खोलवर झाल्या होत्या. जवळजवळ पाच तास त्यांच्यावर शस्त्रक्रिया पार पडली. आपण सर्वजण मिळून प्रार्थना करुया की ते लवकरात लवकर बरे व्हावेत. मी सकाळपासून पोलिसांच्या संपर्कात आहे, जो आरोपी आहे त्याला पकडण्याचा पोलीस प्रयत्न करत आहे. पोलिसांची १० पथकं आरोपीच्या शोधात आहेत.सैफ अली खान यांना सध्या विश्रांतीची गरज आहे. मुंबई सगळ्यात सुरक्षित शहर आहे, वांद्रेवासियांनी घाबरुन जाऊ नये.