Maharashtra News Updates : “शक्य असतं तर विशाल गवळीचा चौरंग…”, कल्याण बलात्कार आणि हत्या प्रकरणी भाजपाच्या महिला आमदाराची संतप्त प्रतिक्रिया

"शक्य असतं तर विशाल गवळीचा चौरंग केल्याशिवाय गप्प बसलो नसतो मात्र संविधानिक पद्धतीने विशाल गवळीला कठोरात कठोर म्हणजेच फाशीची शिक्षा दिल्याशिवाय आम्ही शांत बसणार नाही… इथे देवाभाऊंची प्रत्येक बहिण आणि तिच्या लेकी सुरक्षित राहाव्या यासाठी आपले देवाभाऊ दिवस रात्र झटत आहे. त्यामुळे गवळीसारख्या नराधमांच्या नुसत्या मुसक्याच आवळल्या नाही जाणार तर त्यांना फासावर लटकवलं जाणार हे नक्की…! आज त्या चिमुकलीच्या कुटुंबीयांच्या पाठीशी आम्ही सगळेचं खंबीरपणे उभे आहोत. आणि आमचा सर्वांचा समस्त महाराष्ट्रातल्या बहिणींचा विश्वास आहे की विशाल गवळी सारख्या विकृतांना गाडल्याशिवाय आमचा देवा भाऊ शांत बसणार नाही…", अशी पोस्ट सोशल मिडियावर भाजपाच्या नेत्या चित्रा वाघ यांनी केली आहे.

देशाचे लोकप्रिय पंतप्रधान व विश्व नेते नरेंद्र मोदी यांची आज नवी दिल्लीतील त्यांच्या निवासस्थानी भेट घेतली. महाराष्ट्रात विक्रमी जनादेश मिळाल्यानंतर महायुतीचे सरकार राज्यात स्थापन झाले आहे. या पार्श्वभूमीवर, 'विकसित भारताच्या वाटचालीत राज्याचा योगदानाबाबत मोदी यांच्याशी चर्चा करता आली. त्यावेळी खासदार डॉ. श्रीकांत शिंदे आणि स्नुषा वृषाली शिंदे हे दोघेही उपस्थित होते, अशी पोस्ट एकनाथ शिंदे यांनी सोशल मिडिया प्लॅटफॉर्म एक्सवर घेतली आहे.

बीडच्या मस्साजोग गावचे सरपंच संतोष देशमुख हत्या प्रकरणावर मंत्री धनंजय मुंडे यांनी प्रतिक्रिया दिली आहे, ते म्हणाले की, "ज्या देशमुखांची निर्घृण हत्या झाली, ज्यांनी कोणी हत्या केली त्यांना शासन झालं पाहिजे, ते फासावर गेले पाहिजेत या मताचा पहिल्या दिवसापासून मी आहे. शेवटी तो माझ्या जिल्ह्यातील सरपंच आहे. आता जे कोण गुन्हेगार आहेत त्या सर्वांना फाशीची शिक्षा करा, मग तो कोणीही असो, कोणाच्याही-कितीही जवळचा असो, अगदी माझ्याही जवळचा कोणी असो तरीही त्याला सोडायचं नाही असं म्हणत असताना, फक्त राजकारणासाठी माझ्यावर आरोप करणं यामागे काय राजकारण असू शकतं हे तुम्ही समजू शकता", असे धनंजय मुंडे म्हणाले.

महायुती सरकारमध्ये पहिल्यांदाच संजय शिरसाट यांची मंत्रि‍पदावर वर्णी लागली आहे. त्यानंतर ते आजपासून पदभार स्वीकारणार आहेत. यापूर्वी त्यांनी बाळासाहेब ठाकरे यांच्या स्मृतीस्थळावर जाऊन अभिवादन केले. शिरसाट यांच्याकडे सामाजिक न्याय खाते देण्यात आले आहे.

राज्य महिला आयोगाच्या आध्यक्ष रुपाली चाकणकर यांनी सोशल मिडिया प्लॅटफॉर्मवर कल्याणमधील घटनेचा पोलिसांनी तातडीने तपास पूर्ण करावा असे आदेश महिला आयोगाकडून देण्यात आल्याची माहिती दिली आहे. त्यांनी सांगितले की, "कल्याणमध्ये अल्पवयीन मुलीवर अत्याचार करून हत्या केल्याप्रकरणी आरोपी विशाल गवळी तसेच त्याला मदत करणारी त्याची पत्नी साक्षी हिला पोलिसांनी अटक केलेली आहे. या दुर्दैवी घटनेचा पोलिसांनी संवेदनशीलतेने तसेच तातडीने तपास पूर्ण करावा असे निर्देश राज्य महिला आयोगाकडून देण्यात आले आहेत. हा खटला फास्ट ट्रॅक कोर्टात चालावा तसेच आरोपीला लवकरात लवकर फाशीची शिक्षा व्हावी यासाठी आयोग पाठपुरावा करेल".