Maharashtra News Updates : “वैभव नाईकांना दबक्या आवाजात माहिती होती, त्यामुळे मृतदेहाची माहितीही असेल”; बिडवलकर हत्याप्रकरणात निलेश राणेंचा पलटवार

सोलापूर : अक्कलकोट तालुक्यातील कुरनूर धरणातून पिण्यासाठी आणि शेतीसाठी पाण्याचे दुसरे आवर्तन सोडण्यात आले आहे. मात्र, सध्याच्या तीव्र उन्हाळ्यात धरणातील अपुरा पाणीसाठा लक्षात घेता सोडण्यात आलेले पाणी अत्यल्प असून, ते शेवटच्या बंधाऱ्यापर्यंत पोहोचण्याबाबत साशंकता वर्तविण्यात येत आहे.

मागील वर्षीच्या पावसाळ्यात समाधानकारक पाऊस झाल्याने, तसेच उजनी धरणातून पाणी सोडल्याने सुमारे अडीच टीएमसी क्षमतेचे कुरनूर धरण भरले होते. या धरणावर अक्कलकोट शहरासह लगतची काही गावे पिण्याच्या पाण्यासाठी अवलंबून आहेत. धरणातून यापूर्वी गरजेनुसार पिण्यासाठी आणि शेतीसाठी पाण्याचे पहिले आवर्तन सोडण्यात आले होते. त्यानंतर आता उन्हाळ्याची तीव्रता वाढली असताना, शेतातील पिके पाण्याअभावी धोक्यात आहेत, तर दुसरीकडे पिण्याच्या पाण्याचाही प्रश्न भेडसावत चालला आहे.

सध्या कुरनूर धरणात फक्त एकूण २८ टक्के पाणीसाठा असून, २० टक्क्यांच्या खाली मृत पाणीसाठा मानला जातो. पाणीसाठा मृत पातळीत गेल्यास धरणातील पाणी शेतीसाठी सोडता येणार नाही. केवळ पिण्याच्या पाण्यासाठी हा पाणीसाठा राखून ठेवण्यात येणार आहे. सोलापूरचे जिल्हाधिकारी कुमार आशीर्वाद यांनी तसे आदेश यापूर्वीच दिले आहेत.

या पार्श्वभूमीवर धरणातून पाण्याचे दुसरे आवर्तन सोडण्यात येत असून, त्यामुळे आठ ते दहा टक्के पाणी संपणार आहे. म्हणजेच धरणातील पाणी मृतसाठ्यात जाणार आहे.

तथापि, सध्या ४३ अंशांपर्यंत तापमानाचा पारा वाढलेला असताना धरणातील पाण्याचे बाष्पीभवन मोठ्या प्रमाणात होत आहे. धरणातून सर्व आठ कोल्हापुरी पद्धतीचे बंधारे भरले जाण्याची शक्यता दिसून येत नाही. दुसरीकडे प्रखर उन्हाळ्यामुळे काही गावांत पाणीटंचाई प्रकर्षाने जाणवत आहे. तेथे ग्रामस्थांची तहान भागवण्यासाठी टँकरद्वारे पाणीपुरवठा करावा लागणार आहे. यातच धरणातून सोडलेले पाण्याचे आवर्तन शेवटपर्यंत पोहोचण्याची शक्यता धूसर दिसत असल्यामुळे शेतकरी वर्गात अस्वस्थता निर्माण झाली आहे.

कोल्हापूर : वादग्रस्त विधान केल्याने निलंबित करण्यात आलेले कोल्हापूर महापालिकेचे सहायक शिक्षक गिरीश फोंडे यांच्यावरील कारवाई मागे घ्यावी या मागणीसाठी गुरुवारी इंडिया आघाडीच्या वतीने मोर्चा काढण्यात आला.

शक्तिपीठ महामार्ग रद्द करण्यासाठी व कर्जमाफीसाठी फोंडे यांनी उपमुख्यमंत्री एकनाथ शिंदे यांच्या दौऱ्यावेळी चित्रफीत अग्रेषित केली होती. त्यामध्ये प्रक्षोभक विधान असल्याचा ठपका ठेवून महापालिकेने फोंडे यांना तडकाफडकी निलंबित केले होते. ही कारवाई राजकीय अकसातून केल्याची टीका विधान परिषदेचे गटनेते सतेज पाटील, शिक्षक आमदार जयंत आसगावकर यांनी केली होती.

आज इंडिया आघाडीतील घटक पक्ष, शक्तिपीठ महामार्गविरोधी संघर्ष समिती, कोल्हापूर जिल्हा शैक्षणिक व्यासपीठ, स्वाभिमानी शेतकरी संघटना, कामगार संघटना कृती समिती, विद्यार्थी संघटना कृती समिती आदींच्या वतीने कारवाई मागे घेण्याच्या मागणीसाठी कोल्हापूर महापालिकेवर मोर्चा काढला. मुस्कटदाबी करणाऱ्या शासनाचा निषेध असो, शक्तिपीठ महामार्ग रद्द झालाच पाहिजे अशा घोषणा देण्यात आल्या.

माजी खासदार राजू शेट्टी, माजी आमदार संपत पवार पाटील, ठाकरे सेनेचे जिल्हाप्रमुख विजय देवणे, शैक्षणिक व्यासपीठाचे अध्यक्ष एस. डी. लाड आदींचे भाषण झाले. शिष्टमंडळाने अतिरिक्त आयुक्त राहुल रोकडे यांना निवेदन देऊन निलंबन कारवाई रद्द न केल्यास महापालिकेचे शिक्षक संपावर जातील, असा इशारा दिला.

कोल्हापूर : इचलकरंजी येथे गावभाग पोलीस ठाण्यातच आर्थिक देवाणघेवाणीतून महिला एकमेकांना भिडल्या. पोलिसांनी जमावबंदी आदेशाबाबत कल्पना देऊनही त्या ऐकण्याच्या मन:स्थितीत नव्हत्या. याप्रकरणी गावभाग पोलीस ठाण्यात ७ महिलांच्या विरोधात गुरुवारी सायंकाळी गुन्हा दाखल झाला आहे.

पद्मजा इंगवले आणि सुदर्शना ऊर्फ गंगा कांबळे यांच्यात आर्थिक देवाणघेवाणीतून वाद झाला होता. तो पोलीस ठाण्यात पोहचला. कांबळे - इंगवले यांच्यासह अन्य महिला ठाण्यातच शिवीगाळ करत एकमेकींच्या अंगावर हातात चपला घेऊन धावून गेल्या. पोलिसांनी त्यांना जमावबंदी आदेश लागू असल्याची कल्पना देऊनही त्या एकमेकांना चोप देत राहिल्या.

या घटनेप्रकरणी पोलीस रामा पाटील यांनी दिलेल्या फिर्यादीनुसार पद्मजा इंगवले, गंगा कांबळे, अश्विनी कुबडगे, यास्मिन सनदी, जोस्ना भिसे, सावित्री हजारे, सपना भिसे या महिलांच्या विरोधात गुन्हा दाखल करण्यात आला आहे.

नांदेड : नांदेड शहरालगत असलेल्या विष्णुपुरी परिसरातील एका पाणीपुरीच्या ठेल्यावर पाणीपुरी खाल्ल्याने तब्बल ३० ते ३२ विद्यार्थ्यांना विषबाधा झाल्याचा प्रकार बुधवारी रात्री उघडकीस आला. सर्व विद्यार्थ्यांची प्रकृती स्थिर असल्याचे रुग्णालयातून सांगण्यात आले.

नांदेड शहरालगत विष्णुपुरी येथे स्वामी रामानंद तीर्थ विद्यापीठ शासकीय अभियांत्रिकी महाविद्यालय, वैद्यकीय महाविद्यालय, ग्रामीण तंत्रनिकेतन महाविद्यालय यासह काही खासगी काॅलेज व शिकवणी वर्ग मोठ्या प्रमाणावर आहेत. शैक्षणिक केंद्र म्हणून या परिसराची ओळख झाली आहे. राज्यातील वेगवेगळ्या भागांतील विद्यार्थी येथे शिक्षणासाठी राहतात.

या भागात छोटे-मोठी हाॅटेल, खानावळ, वेगवेगळे चाट भांडार, तसेच अनेक उपाहारगृह आहेत. काल, बुधवारी काही विद्यार्थ्यांनी एका पाणीपुरीच्या ठेल्यावर पाणीपुरीचा आस्वाद घेतला. पण काही वेळाने त्यांना उल्टी व जुलाबाचा त्रास सुरू झाला. सहकारी विद्यार्थ्यांच्या मदतीने या सगळ्यांना विष्णुपुरीच्या शासकीय रुग्णालयात दाखल करण्यात आले. एकाच वेळी मोठ्या प्रमाणावर रुग्ण आल्याने तारांबळ उडाली होती. पण उपस्थित डाॅक्टरांनी योग्य उपचार केल्याने सर्वांची प्रकृती स्थिर झाली. काही विद्यार्थ्यांना उपचारानंतर घरी पाठविण्यात आले, तर काही विद्यार्थ्यांवर उपचार सुरू असल्याचे अधिष्ठाता डाॅ. सुधीर देशमुख यांनी सांगितले. या प्रकरणात अद्याप कोणताही गुन्हा दाखल झाला नाही. संबंधित पाणीपुरीचालकावर गुन्हा दाखल करून अन्न व औषध प्रशासनाने सर्व नमुने तपासावेत, अशी मागणी करण्यात आली आहे.