Lok Sabha Election 2024 Updates : लोकसभा निवडणुकीच्या पार्श्वभूमीवर महाराष्ट्रातील महायुती आणि महाविकास आघाडीचे जागावाटप जवळपास निश्चित झाले आहे. पहिल्या टप्प्यातील उमेदवारी अर्ज भरण्याची शेवटची मुदत ४ एप्रिल रोजी संपल्यानंतर आता १९ एप्रिल रोजी होणाऱ्या पहिल्या टप्प्यात होणाऱ्या निवडणुकीचे चित्र स्पष्ट झाले आहे. त्यामुळे आता तरी जागावाटपाची चर्चा संपून जनतेच्या प्रश्नावर राजकीय पक्ष बोलणार का? हे पाहणे महत्त्वाचे ठरणार आहे. ९ एप्रिल रोजी मनसेचा गुढीपाडवा मेळावा पार पडणार आहे. त्यादिवशी राज ठाकरे मनसेची भूमिका स्पष्ट करण्याची शक्यता आहे. तसेच शिंदे गटाने दोन खासदारांचा पत्ता कापल्यानंतर आता नाशिक, मुंबई उत्तर पश्चिम आणि कल्याण लोकसभेसाठी काय निर्णय घेणार याकडे सर्वांचे लक्ष लागले आहे.
Maharashtra News Updates 05 April 2024
सोलापूर : सोलापूर राखीव लोकसभा निवडणुकीत काँग्रेस व भाजपच्या तुल्यबळ लढतीत वंचित बहुजन आघाडीपाठोपाठ आता एमआयएम पक्षाचाही उमेदवार उभा करण्याच्या दृष्टीने हालचाली वाढल्या आहेत. मात्र उमेदवार उभा करण्यावरून एमआयएम पक्षात मतभेद निर्माण झाले असले तरी या पक्षाचा निवडणूक लढण्याचा निर्णय पक्का असल्याचे पक्षाचे जिल्हाध्यक्ष फारूख शाब्दी यांनी स्पष्ट केले आहे.
यंदा सोलापूर लोकसभा जागेसाठी एमआयएम पक्षाकडे चार संभाव्य उमेदवार विचाराधीन असून त्याबाबतचा अहवाल हैदराबाद येथे पक्षश्रेष्ठींकडे पाठविण्यात आला आहे. संभाव्य चार उमेदवार कोण, हे गूपित असल्याचे जिल्हाध्यक्ष फारूख शाब्दी यांनी सांगितले. लोकशाहीर आण्णाभाऊ साठे विकास महामंडळाच्या आर्थिक घोटाळ्ळात अडकलेले तत्कालीन राष्ट्रवादी काँग्रेसचे मोहोळ येथील माजी आमदार रमेश कदम यांचेही नाव एमआयएमकडून संभाव्य उमेदवार म्हणून चर्चेत आहे. त्यांच्याशी लवकरच चर्चा होऊन पुढील निर्णय घेण्यात येणार असल्याची माहितीही शाब्दी यांनी दिली.
तथापि, एमआयएम पक्षाकडून सोलापुरात उमेदवार उभा करण्यावरून पक्षात मतभेद निर्माण झाले असून पक्षाचे सरचिटणीस कोमारो सय्यद यांनी, एमआयएम पक्षाचा प्रथम क्रमांकाचा शत्रू भाजप असताना मतविभागणीचा फायदा पुन्हा भाजपला मिळू नये. त्यासाठी भाजपविरोधी मतविभागणी टाळण्यासाठी एमआयएमने उमेदवार उभा करू नये, अशी आग्रही मागणी केली आहे.
पुणे लोकसभा निवडणूक लढविण्यासाठी मनसेतून बाहेर पडलेले वसंत मोरे यांनी आज प्रकाश आंबेडकर यांच्या उपस्थितीत वंचित बहुजन आघाडीत प्रवेश केला. अकोला येथे हा पक्षप्रवेश सोहळा संपन्न झाला. पक्षप्रवेशाआधी वसंत मोरे यांनी एक्सवर याची माहिती दिली होती.
पुणे : राष्ट्रवादी कांग्रेस शरदचंद्र पवार पक्षाचे आमदार रोहित पवार यांनी नुकत्याच घेतलेल्या एका पत्रकार परिषदेमध्ये एका खेकड्याला लटकवून त्याचा गैरवापर केल्याचा निषेध दर्शवत ‘पेटा इंडिया’ने (पीपल फाॅर द एथिकल ट्रीटमेंट ऑफ ॲनिमल्स) कारवाईची मागणी केली आहे. यासंदर्भात संघटनेने पक्षाचे राष्ट्रीय अध्यक्ष शरद पवार आणि जिल्हा निवडणूक अधिकारी मीनल कळसकर यांना पत्र पाठविले आहे.
कोल्हापूर : संत बाळूमामा भंडारा उत्सवाअंतर्गत शुक्रवारी रथोत्सव मिरवणुक हजारो भाविकांच्या उपस्थितीत उत्साही वातावरणात पार पडली. बाळूमामाच्या नावानं चांगभलंचा जयघोष, भंडाराच्या मुक्तहस्ते उधळण, ढोलकैताळाच्या निनादात दीड किलोमीटर अंतरावर रथोत्सव चार तास सुरु होता.
कोल्हापूर : रंकाळा टॉवर परिसरात काल सायंकाळी दोन गटातील वर्चस्वातून खून केल्याप्रकरणी ८ संशयित आरोपींना स्थानिक गुन्हेने शाखेच्या पथकाने तासात जेरबंद केले आहे.
सोलापूर : सोलापुरात उन्हाळा अधिकच तीव्र होत असून यंदाच्या हंगामातील आतापर्यंतचे उच्चांकी कमाल तापमान शुक्रवारी ४३.१ अंश सेल्सिअस नोंदले गेले. सरासरीच्या तुलनेत त्यामध्ये चार अंशांनी वाढ झाली आहे.
चालू एप्रिल महिन्यात आतापर्यंत ४१ ते ४२ अंशापर्यंत तापमानाची नोंद झाली होती. आता पारा ४३ अंशांच्या पुढे गेला आहे. सकाळपासूनच उन्हाची तलखी जाणवत आहे. वाढत्या उष्म्यामुळे दुपारी रस्त्यावरील वर्दळ रोडावली असून डोक्यावर परिधान केलेल्या टोप्याही गरम होत आहेत.
गेल्या वर्षी ५ एप्रिल २०२३ रोजी सोलापूरचे ४०.३ अंश सेल्सियस इतके तापमान नोंदले गेले होते. परंतु आज हे तापमान ३.१ अंशांनी म्हणजेच ४३.१ पर्यंत वाढले आहे. ही माहिती हवामान विभागाने दिली आहे.
सोलापूर : सोलापूर राखीव लोकसभा निवडणुकीत काँग्रेसच्या आमदार प्रणिती शिंदे आणि भाजपचे आमदार राम सातपुते या दोन्ही तुल्यबळ उमेदवारांनी एकमेकांवर स्थानिक विकासाच्या मुद्यांपासून ते राष्ट्रीय पातळीवरील मुद्यांपर्यंत एकमेकांवर आरोप-प्रत्यारोप चालविले असतानाच या दोन्ही उमेदवारांनी भल्या सकाळी 'मॉर्निग वॉक'च्या माध्यमातून मतदारांना थेट भेटून आणि संवाद साधून मतांची पेरणी केली.
सोलापुरात सकाळचा पायी चालत फेरफटका मारण्यासाठी सिध्देश्वर तलाव परिसरासह हुतात्मा बाग, होम मैदान, नेहरू नगर शासकीय मैदान, कर्णिक नगर शासकीय मैदान, जुळे सोलापूर आदी भागात नागरिकांची मोठी वर्दळ असते. यापैकी सिध्देश्वर तलाव परिसरात काँग्रेसच्या उमेदवार, आमदार प्रणिती शिंदे यांनी फेरफटका मारून पादचारी नागरिकांशी मुक्त संवाद साधला.
उमेदवारांची घोषणा करताना, जागा मिळविताना त्यांची होणारी तगमग आता जनता पाहत आहे, असे वरुण सरदेसाई यांनी सांगितले.
पुणे : यवतमाळ वाशीम लोकसभा मतदारसंघाच्या सलग पाच वेळा शिवसेनेच्या खासदार भावना गवळी या राहिल्या आहेत. मात्र यंदाच्या लोकसभा निवडणुकीत भावना गवळी यांना तिकीट नाकारून, पक्षाने जिल्हा परिषद आणि विधानसभेला पराभूत झालेल्या राजश्री पाटील यांना उमेदवारी देण्यात आली आहे.
नागपूर: उपमुख्यमंत्री देवेंद्र फडणवीस यांच्या गृह शहर असलेल्या नागपुरात एका महिलेने न्यायालयात एका विनयभंगाच्या आरोपीविरोधात साक्ष देऊ नये म्हणून तिला घाबरवण्यासाठी आरोपीने महिलेचा चक्क वेगवेगळ्या पद्धतीने विनयभंग केल्याची धक्कादायक माहिती आहे.
पुणे : अजित पवार यांचे सुपुत्र पार्थ पवार यांचा विद्यमान खासदार श्रीरंग बारणे यांनी पराभव केला होता. या पराभवाचे खापर तेव्हाच्या राष्ट्रवादी काँग्रेस पक्षाने मोदी लाटेवर फोडले होते. अजित पवारांसाठी ही लढाई अत्यंत महत्त्वाची आणि प्रतिष्ठेची होती. मात्र त्यात बारणे यांनी पार्थ पवार यांचा मोठा मताधिक्याने पराभव केला. तेच विद्यमान खासदार श्रीरंग बारणे मावळ लोकसभा महायुतीचे उमेदवार आहेत.
भाईंदर : गेल्या सव्वा महिन्यांपासून फरार असणारे मिरा भाईंदर राष्ट्रवादी पक्षाचे अध्यक्ष मोहन पाटील यांना शुक्रवारी मिरा भाईंदर वसई विरार पोलीस आयुक्तालयाच्या आर्थिक गुन्हे शाखेने शुक्रवारी अटक केली आहे. अटकपूर्व जामिन फेटाळल्यानंतर अटक करण्यात आली आहे. मोहन पाटील यांना ८ एप्रिल पर्यंत पोलीस कोठडी सुनावण्यात आली आहे
वसई: वसई पूर्वेच्या भागात तुंगारेश्वर अभयारण्यातील संरक्षित वनक्षेत्र व इको सेन्सेटिव्ह झोन मध्ये मागील काही वर्षापासून अतिक्रमण, बेकायदेशीरपणे उभे राहत असलेले प्रदूषणकारी कारखाने याचा मोठा परिणाम या वनक्षेत्रावर होऊ लागला आहे. या वाढत्या अतिक्रमणामुळे संरक्षित वन धोक्यात आले आहे.
नाशिक : जिल्ह्यात दोन वेगवेगळ्या ठिकाणी गुटख्याची होणारी वाहतूक आणि विक्री करण्यासाठी होणारे प्रयत्न पोलिसांनी हाणून पाडले. दोन्ही घटनांमध्ये एकूण २१ लाख रुपयांचा गुटखा जप्त करण्यात आला. चौघांविरुध्द गुन्हा दाखल करण्यात आला.
चंद्रपूर : भाजपाचे स्थानिक उमेदवार लक्ष्मीदर्शन करून काँग्रेसच्या पदाधिकारी व कार्यकर्त्यांना सोबत घेत आहे.तेव्हा निवडणुकीत येणारी लक्ष्मी स्वीकारा आणि मतदान करा असे वादग्रस्त वक्तव्य काँग्रेस उमेदवार आमदार प्रतिभा धानोरकर यांनी केले.
दहिसर येथे १८ वर्षांच्या विवाहित महिलेने गळफास घेऊन आत्महत्या केली.
चंद्रपूर : वंचित बहुजन आघाडीचे नेते ॲड.प्रकाश आंबेडकर सातत्याने माझा अपमान करित असले तरी संविधान वाचविण्यासाठी व मतविभाजन टाळण्यासाठी दोन जागा वाढवून देण्याचा प्रस्ताव दिला आहे. मात्र या प्रस्तावावर ॲड.आंबेडकर यांच्याकडून अजूनही उत्तर आलेले नाही अशी माहिती काँग्रेस प्रदेशाध्यक्ष नाना पटोले यांनी येथे दिली.
पुणे : जागतिक पातळीवर सरासरी आयुर्मानात दिवसेंदिवस वाढ होताना दिसून येत आहे. एका नव्या संशोधनानुसार १९९० ते २०२१ या कालावधीत जागतिक पातळीवर सरासरी आयुर्मान ६.२ वर्षांनी वाढले. याचवेळी भारतीयांचे सरासरी आयुर्मान ८ वर्षांनी वाढल्याचेही समोर आले आहे.
यवतमाळ : वंचित बहुजन आघाडीने यवतमाळ-वाशीम लोकसभा मतदारसंघासाठी गाजावाजा करत जाहीर केलेला उमेदवार ऐनवेळी बदलविला. मात्र, नामांकनाच्या अखेरच्या दिवशी वंचितकडून ज्या उमेदवाराने अर्ज दाखल केला, त्यात त्रुटी निघाल्याने तो बाद झाला. त्यामुळे ‘वंचित’ निवडणुकीपासून वंचित राहणार आहे.
नागपूर : भीमा कोरेगाव प्रकरणातील आरोपी आणि नागपूर विद्यापीठातील माजी प्राध्यापिका शोमा सेन यांचा सर्वोच्च न्यायालयाने शुक्रवारी अटींसह जामीन मंजूर केला आहे. नक्षलवादांशी संबंध असल्याचा आरोप करत त्यांना बेकायदेशीर कारवाई प्रतिबंधक कायदा (युएपीए) अंतर्गत अटक करण्यात आली होती. न्या.अनिरुद्ध बोस आणि न्या.ऑगस्टिन जॉर्ज मसीह यांच्या खंडपीठाने हा निर्णय दिला आहे.
अल्पवयीन गतिमंद मुलीवर लैंगिक अत्याचार करणाऱ्या १९ वर्षीय तरुणाला अंधेरी पोलिसांनी शुक्रवारी अटक केली.
रायगड जिल्ह्यात शिधा वाटप केंद्रांवर, मोफत धान्याची उचल करणारे १ हजार ६५६ नोकरदार सापडले आहेत.
अमरावती : लोकसभा निवडणुकीतील अमरावतीच्‍या लढतीने सर्वांचे लक्ष वेधून घेतले आहे. येथून भाजपच्या उमेदवार नवनीत राणा रिंगणात आहेत, काँग्रेसने आमदार बळवंत वानखडे यांना तर प्रहार जनशक्‍ती पक्षाने दिनेश बुब यांना नवनीत राणांच्‍या विरोधात उमेदवारी दिली आहे. नवनीत राणा यांनी नुकताच भाजपमध्‍ये प्रवेश केला आहे.
नवीन आर्थिक वर्षाच्या पहिल्या तीन-चार दिवसांतच सोन्याने यापूर्वीचे सर्व उच्चांक मोडले असून, चांदीच्या दरानेही विक्रमी पातळी गाठली आहे.
पुणे : मध्य रेल्वेच्या पुणे विभागाने पुणे विभागात सरलेल्या आर्थिक वर्षात ५ कोटी ५७ लाख प्रवाशांनी प्रवास केला. आधीच्या वर्षाच्या तुलनेत प्रवासी संख्येत १८ टक्के वाढ नोंदविण्यात आली आहे. दरम्यान, गेल्या वर्षभरात विभागात तिकीट तपासणी मोहिमेअंतर्गत फुकट्या प्रवाशांकडून २७ कोटी रुपयांहून अधिक दंड वसूल केला आहे.
एक पर्यावरणपूरक देखणी गुढी पंतप्रधान नरेंद्र मोदी यांना नवी दिल्ली येथील त्यांच्या घरी चैत्र पाडव्याच्या दिवशी उभारण्यासाठी पाठविली आहे.
पुणे : व्यवस्थापनशास्त्र पदवी (बीबीए, बीएमएस), संगणक उपयोजन पदवी (बीसीए) अभ्यासक्रम आपल्या अखत्यारित घेण्याचा निर्णय अखिल भारतीय तंत्रशिक्षण परिषदेने (एआयसीटीई) कोणतीही चर्चा न करता घेतला. यंदा निवडणूक वर्ष असल्याने या काळात विद्यार्थी, शिक्षक आणि अन्य घटकांच्या नाराजीचा मोठा फटका बसू शकतो, अशा सूचक शब्दांत इशारा देऊन निर्णय किमान एक वर्ष स्थगित करण्याची मागणी प्रोग्रेसिव्ह एज्युकेशन सोसायटीने केंद्रीय शिक्षणमंत्री धर्मेंद्र प्रधान यांच्याकडे केली.
सहाय्यक प्राध्यापक पदासाठीची राज्यस्तरीय पात्रता परीक्षा अर्थात ‘सेट’ परीक्षा रविवार, ७ एप्रिल रोजी आयोजित करण्यात आली आहे.
काँग्रेसने अकोल्यात प्रकाश आंबेडकर यांच्या विरोधात डॉ. अभय पाटील यांना उमेदवारी दिली आहे. त्यानंतर आता वंचितकडून काँग्रेसचे प्रदेशाध्यक्ष नाना पटोले यांच्यावर टीका करण्यात आली आहे. डॉ. अभय पाटील आणि त्यांच्या वडिलांची पार्श्वभूमी राष्ट्रीय स्वयंसेवक संघाची असून त्यांना उमेदवारी दिल्यामुळे काँग्रेसचा चेहरा उघडा पडला आहे, अशी टीका वंचितने केली आहे.
स्काय वॉकला लावण्यात आलेला पत्रा कोसळून खालून जाणारी एक तरुणी गंभीर जखमी झाली आहे.
सर्वपक्षीय खदखद! प्रमुख सहा पक्षांमध्ये उमेदवारीवरून नाराजीनाटय़, अनेक मतदारसंघांत बंडखोरी
