Maharashtra Political Crisis, Eknath Shinde Live : महाराष्ट्रातील राजकीय संकट गंभीर होताना दिसत आहे. शिवसेना बंडखोर नेते एकनाथ शिंदे यांना शिवसेनेच्या आमदारांचा पाठिंबा वाढत आहे. या पार्श्वभूमीवर पक्षप्रमुख उद्धव ठाकरे यांनी मुख्यमंत्रीपदाचा आणि पक्ष प्रमुख पदाचा राजीनामा देण्याची तयारी दर्शवली. तसेच वर्षा हा मुख्यमंत्री निवास सोडून मातोश्रीवर जाण्याचा निर्णय घेतला. यानंतर शिवसेनेत घडामोडींना वेग आलाय. एकनाथ शिंदे गटाकडून आज भाजपाला समर्थनाचं पत्र देण्यात येणार असल्याच्याही चर्चा आहेत. त्यामुळे आज दिवसभरात नेमक्या काय घडामोडी घडतात त्याची प्रत्येक अपडेट देणारा हा लाईव्ह आढावा…
Maharashtra Political Crisis Live News Update : शिवसेनेचे नेते एकनाथ शिंदे यांनी बंडखोरी केल्यानंतर महाराष्ट्रात राजकीय संकट निर्माण झालं आहे. Read In English
शिवसेनेचे नेते एकनाथ शिंदे यांनी पुकारलेल्या बंडाच्या पार्श्वभूमीवर राष्ट्रवादी काँग्रेसचे अध्यक्ष शरद पवार यांनी नुकतीच पत्रकार परिषद घेतली आहे. शिवसेनेच्या बंडखोर आमदारांनी घेतलेला निर्णय अँटी डिफेक्शन कायद्याच्या विरोधात आहे, त्यामुळे त्याचे परिणाम त्यांना भोगावे लागतील, असं शरद पवार म्हणाले. शरद पवारांच्या या वक्तव्यानंतर शिवसेनेचे बंडखोर नेते एकनाथ शिंदे यांनी ट्वीटरच्या माध्यमातून प्रत्युत्तर दिलं आहे. सविस्तर बातमी
शिवसेना नेते एकनाथ शिंदे यांची पक्षातील ताकद आणखी वाढताना दिसत आहे. आणखी तीन आमदार शिंदे गटात सामील झाले आहेत. शिवसेनेचे आमदार कृषी मंत्री दादा भुसे, आमदार संजय राठोड आणि आमदार रवींद्र फाटक हे गुवाहाटी येथील रेडीसन ब्लू हॉटेलमध्ये पोहोचले आहेत. याठिकाणी शिंदे गटातील नेत्यांकडून त्यांचं स्वागत झालं.
काँग्रेस प्रदेशाध्यक्ष नाना पटोले यांनीही शिवसेनेच्या बंडखोर आमदारांच्या आरोपाला दुजोरा देताना उपमुख्यमंत्री व अर्थमंत्री अजित पवार यांनी काँग्रेसच्या मंत्र्यांनाही त्रास दिल्याचा गंभीर आरोप केला. यावर आता स्वतः अजित पवार यांनी नाना पटोले यांचं नाव न घेता प्रत्युत्तर दिलं आणि तीव्र नाराजी व्यक्त केली आहे. तसेच मंत्र्यांना, आमदारांना त्रास दिल्याचे आरोप फेटाळून लावले. मित्र पक्षातील लोकांनी माध्यमांशी बोलण्यापेक्षा बैठकीत विषय मांडला असता तर तेव्हाच गैरसमज दूर केले असते, असंही नमूद केलं.
एकीकडे शिवसेनेचे नेते एकनाथ शिंदे आणि अनेक आमदारांनी बंड केल्याने महाविकासआघाडी सरकार अस्थिर झालंय. दुसरीकडे आता काँग्रेसचे प्रदेशाध्यक्ष नाना पटोले यांनी राज्याचे अर्थमंत्री अजित पवार यांच्यावर गंभीर आरोप केले आहेत. "शिवसेनेच्या आमदारांनी अजित पवार त्रास देत असल्याचा आरोप केला. तीच बाब आमच्यासमोर देखील येत होती. अजित पवार यांनी आमच्या मंत्र्यांनाही त्रास दिला होता," असा आरोप नाना पटोले यांनी केला. ते गुरुवारी (२३ जून) एबीपी माझाशी बोलत होते.
ईडीच्या दबावामुळे ते तिकडे गेले, असा एकदम निष्कर्ष काढणं योग्य नाही. याबाबत माझ्याकडे खात्रीशीर माहिती नाहीये. पण ही गोष्ट खरी आहे, की त्यातील काही लोकांची वेगवेगळ्या केंद्रीय तपास यंत्रणांकडून चौकशी सुरू आहे किंवा होती. त्यामुळे त्यांच्यावर तपास यंत्रणांचा दबाव नाही, असं म्हणता येणार नाही. - शरद पवार
बंडखोर आमदारांना इथे यावेच लागेल, राज्यपालांच्या समोर किंवा विधानसभेत तरी त्यांना यावेच लागेल. विधानसभेच्या प्रांगणात आल्यानंतर मला माहीत नाही की आसाम, गुजरातमधील भाजपाचे नेते इथे येऊन, त्यांना मार्गदर्शन करू शकतील- शरद पवार
सुरतला आणि आसामला आमदारांची व्यवस्था करणारे लोक अजित पवार यांच्या परिचयाचे असतील, असं मला वाटत नाही. पण माझ्या परिचयाचे आहेत. उदा- सुरतमध्ये भाजपाचे राज्याचे अध्यक्ष बंडखोर आमदारांना जाऊन भेटणं, याचा अर्थ काय घ्यायचा.- शरद पवार
अजित पवारांनी महाराष्ट्रातील, मुंबईतील स्थिती पाहून त्यांनी विधान केलं असावं. अजित पवारांना इथली माहिती जरूर आहे, परंतु गुजरात आणि आसाम इथली परिस्थिती आम्हा लोकांना अधिक माहीत आहे. - शरद पवार
अशी स्थिती यापूर्वी मी महाराष्ट्रात अनेकदा बघितली आहे. या परिस्थितीवर मात करून हे सरकार व्यवस्थित उभारेल. आणि उद्धव ठाकरे यांच्या नेतृत्वाखालील सरकार चालू आहे. हे संपूर्ण देशाला कळेल. - शरद पवार
सरकार अल्पमतात आहे की नाही, हे ठरवण्याचं ठिकाण विधानसभा आहे. विधानसभेत अविश्वास ठराव घेतल्यानंतर लक्षात येईल की हे सरकार बहुमतात आहे. - शरद पवार
गेल्या अडीच वर्षात महाविकास आघाडीने अनेक महत्त्वाचे निर्णय घेतले. करोना संकटावर मात करण्यासाठी आरोग्य खात्यानं उत्तम कामगिरी केली, हे सर्व पाहिल्यानंतर हा प्रयोग फसलाय म्हणणं, याचा अर्थ राजकीय अज्ञान आहे. विधानसभेचे सभासद इथे आल्यानंतर, त्यांना ज्या पद्धतीनं नेलं ती सर्व वस्तुस्थिती लोकांना सांगतील, त्यानंतर बहुमत सिद्ध होईल - शरद पवार
शिवसेनेचे आमदार नितीन देशमुख यांनी अंगावर काटा उभा राहील अशी आपल्या गुवाहाटी येथून सुटकेची 'आपबिती' सांगितली आहे. यात त्यांनी रात्री १२.३० वाजता रस्त्यावर चालायला सुरुवात केली तेव्हा मागे १५० पोलिसांचा ताफा असल्याचं सांगितलं. तसेच मला कोणताही आजार नसताना २०-२५ जणांना पकडून मला जबरदस्तीने इंजेक्शन दिल्याचा गंभीर आरोप केला. ते मुंबईत वर्षा निवासस्थानासमोर घेतलेल्या पत्रकार परिषदेत बोलत होते. यावेळी शिवसेनेचे खासदार संजय राऊत देखील उपस्थित होते.
शिवसेनेचे बंडखोर नेते एकनाथ शिंदे आणि समर्थकांनी नवा गट स्थापन करण्याबाबत पाठिंबा असलेल्या आमदारांचं पत्र पाठवलं आहे. यावर विधानसभा उपाध्यक्ष नरहरी झिरवळ यांनी आपली भूमिका स्पष्ट केली. "शिंदे गटाने पाठवलेल्या पत्रात काही अपक्ष आमदारांची नावंही आहेत. त्यामुळे अपक्ष आमदारांना तो अधिकार आहे की नाही हे तपासलं जाईल," असं मत नरहरी झिरवळ यांनी व्यक्त केलं. तसेच अपक्ष आमदारांची मतं गृहीत धरली जाणार नाही, असंही स्पष्ट केलं. ते गुरुवारी (२३ जून) मुंबईत पत्रकारांशी बोलत होते.
राज्यात शिवसेनेतील बंडखोरीनंतर राजकीय संकट निर्माण झालं आहे. कोण शिवसेनेचा विधीमंडळातील गटनेता, कोण प्रतोद याविषयी ठाकरे गट आणि एकनाथ शिंदे गटाकडून वेगवेगळे दावे केले जात आहेत. या पार्श्वभूमीवर महाराष्ट्र विधानसभा उपाध्यत्र नरहरी झिरवळ यांनी पत्रकार परिषद घेत त्यांची भूमिका स्पष्ट केली. यात त्यांनी कायद्यानुसार पक्षाचा गटनेता निवडण्याचा अधिकार संबंधित पक्षाच्या प्रमुखाला असतो, असं सूचक वक्तव्य केलंय. त्यामुळे एकनाथ शिंदे यांच्या गटाकडून गटनेतेपदाबाबत होणाऱ्या दाव्यावर प्रश्नचिन्ह निर्माण झालंय.
अजित पवार म्हणाले, "आजपर्यंत शिवसेनेत जेव्हा जेव्हा बंड झाला तेव्हा नेते एका बाजूला गेले, शिवसैनिक त्यांच्यामागे गेले नाही. मी राजकारणात आल्यानंतर हे तिसरं बंड आहे. एक छगन भुजबळ यांनी केलेलं बंड, दुसरं नारायण राणे यांनी केलेलं बंड आणि तिसरं एकनाथ शिंदे यांचं बंड आहे. यावरून असं दिसतं की बंड करणारा प्रमुख नेता एकवेळ टिकतो, पण बंड करणारे इतर सहकारी नंतर निवडून देखील येत नाहीत अशापद्धतीने शिवसैनिक कष्ट घेतात."
"शिवसेना आमदारांच्या बंडामागे भाजपाचा हात आहे असं दिसत नाही. आतापर्यंत भाजपाचा कोणताही मोठा चेहरा या आमदारांना भेटल्याचं समोर आलेलं नाही," असं मत अजित पवार यांनी नमूद केलं.
अजित पवार म्हणाले, "राष्ट्रवादी काँग्रेसचा शेवटपर्यंत मुख्यमंत्री उद्धव ठाकरे यांना पाठिंबा राहील. माझं दुपारी उद्धव ठाकरे व आदित्य ठाकरेंशी बोलणं झालं आहे. मी माध्यमांना विनंती करतो की आमची वेगळी भूमिका नाही. शिवसेनेत काय सुरू आहे ते वेगवेगळे नेते सांगत आहेत. काही आमदार परत आले आहेत. त्यांनी तिथं काय झालं ते सांगितलं आहे."
"मित्र पक्षातील काही लोक निधीबाबत आरोप करत आहेत. मात्र, राज्यात प्रत्येक पक्षाला १/३ पालकमंत्रीपदं दिले. सर्वांना निधी दिला, कधीही दुजाभाव केला नाही. त्यामुळे त्यांनी तसा आरोप का केला हे माहिती नाही. त्यांनी माध्यमांशी बोलण्यापेक्षा आमच्या बैठकीत विषय मांडला असता तर तिथल्या तिथं गैरसमज दूर झाले असते. अशा काळात तिन्ही पक्षांनी आघाडी टिकेल आणि आत्ताची परिस्थिती हाताळता येईल याचा प्रयत्न केला पाहिजे," असं मत अजित पवार यांनी व्यक्त केलं.
https://twitter.com/NANA_PATOLE/status/1539916566413733889
नाना पटोले म्हणाले, "शिवसेना आमदार कैलास पाटील यांनी सांगितलेला अनुभव धक्कादायक आहे! सत्तेसाठी भाजपा खालच्या पातळीवर जाऊन हवी तशी गुंडगिरी करत सुटले आहे! जिथे हे आमदारांची अशी अवस्था करतात तिथे सर्व सामान्य जनतेचे काय हाल करतील?"
अपक्ष आमदार विनोद अग्रवाल यांचा देवेंद्र फडणवीसांच्या उपस्थितीत भाजपात प्रवेश, सत्तांतरासाठी राजकीय हालचालींना वेग, फडणवीसांच्या मुंबईतील बंगल्यावर पक्षप्रवेश
बंडखोरी करून गुवाहाटीत गेलेल्या शिवसेना आमदारांना २४ तासात ते परत मुंबईत आल्यास महाविकासआघाडीमधून बाहेर पडू, असं वक्तव्य संजय राऊत यांनी केलं आहे.
राज्याचे नगरविकास मंत्री एकनाथ शिंदे यांच्या बंडानंतर ठाणे जिल्ह्यातील शिवसेनेत उभी फुट पडण्याची शक्यता वर्तविली असतानाच, गुरुवारी शिवसेना ठाणे जिल्हाप्रमुख नरेश म्हस्के यांच्यासह माजी नगरसेवक आणि पदाधिकाऱ्यांनी शिंदे यांनाच समर्थन असल्याचे जाहीर केले. याशिवाय, ठाणे शहरभर शिंदे समर्थनाचे मोठे फलक लागले असून असेच काहीसे चित्र जिल्ह्याच्या इतर शहरांमध्ये आहे. यामुळे जिल्ह्यात शिंदे समर्थकांच्या शक्तीप्रदर्शनाला सुरुवात झाल्याचे चित्र आहे.
एकनाथ शिंदेंसोबत असणारे ३७ शिवसेना आमदार व ९ अपक्ष आमदार कोण? शिंदे गटाकडून दिलेली संपूर्ण यादी वाचा...
१. एकनाथ शिंदे
२. अनिल बाबर
३. शंभूराजे देसाई
४. महेश शिंदे
५. शहाजी पाटील
६. महेंद्र थोरवे
७. भरतशेठ गोगावले
८. महेंद्र दळवी
९. प्रकाश अबिटकर
१० डॉ. बालाजी किणीकर
११. ज्ञानराज चौगुले
१२. प्रा. रमेश बोरनारे
१३. तानाजी सावंत
१४. संदीपान भुमरे
१५. अब्दुल सत्तार नबी
१६. प्रकाश सुर्वे
१७. बालाजी कल्याणकर
१८. संजय शिरसाठ
१९. प्रदीप जयस्वाल
२०. संजय रायमुलकर
२१. संजय गायकवाड
२२. विश्वनाथ भोईर
२३. शांताराम मोरे
२४. श्रीनिवास वनगा
२५. किशोरअप्पा पाटील
२६. सुहास कांदे
२७. चिमणआबा पाटील
२८. लता सोनावणे
२९. प्रताप सरनाईक
३०. यामिनी जाधव
३१. योगेश कदम
३२. गुलाबराव पाटील
३३. मंगेश कुडाळकर
३४. सदा सरवणकर
३५. दीपक केसरकर
३६. दादा भुसे
३७. संजय राठोड
अपक्ष आमदार
१. बच्चू कडू
२. राजकुमार पटेल
३. राजेंद्र यड्रावकर
४. चंद्रकांत पाटील
५. नरेंद्र भोंडेकर
६. किशोर जोरगेवार
७. मंजुळा गावित
८. विनोद अग्रवाल
९. गीता जैन
महाविकास आघाडीतून शिवसेनेनं बाहेर पडलं पाहिजे आणि वेगळा विचार करायला पाहिजे, अशी इच्छा सर्व आमदारांची असेल. तर त्यांनी आधी महाराष्ट्रात यावं, मुंबईत यावं आणि त्यांची जी मागणी आहे, ती त्यांनी अधिकृतपणे शिवसना प्रमुख उद्धव ठाकरेंकडे मांडावी. त्यांच्या मागणीचा नक्की विचार केला जाईल. पण आधी मुंबईत यांची हिंमत दाखवावी.
संजय राऊत म्हणाले, "शिवसेना आमदार कैलास पाटील व नितीन देशमुख मुंबईत आले आहेत. यातील एक गुवाहाटीतून व एक सुरतमधून परत आलेत. शिवसेनेच्या आमदारांना अपहरण करून गुलाम करण्याचा प्रयत्न सुरू आहे. त्यांच्या ताब्यातील २१ आमदारांशी आमचा संपर्क झाला आहे. ते जेव्हा मुंबईत येतील तेव्हा ते २१ आमदार आमच्यासोबत असतील. एकूण ते २१ आणि हे २ असे २३ आमदार शिवसेनेसोबत आहेत."
गुवाहाटीत किती शिवसेना आणि अपक्ष आमदार उपस्थित? नव्या व्हिडीओने आकडेवारी समोर, गुवाहाटीतील रेडिसन ब्लू हॉटेलमध्ये शिवसेनेचे ३७ आमदार आणि ९ अपक्ष आमदार एकनाथ शिंदे यांच्यासोबत उपस्थित
गुवाहाटी : शिवसेना आमदार सदा सरवणकर, मंगेश कुडाळकर, दीपक केसरकर आणि रामटेकचे अपक्ष आमदार आशिष जैस्वाल गुवाहाटी येथील रेडीसन ब्लू हॉटेलमध्ये पोहोचले. एकनाथ शिंदे यांना आमदारांचा वाढता पाठिंबा
भंडारा शिवसेना जिल्हाप्रमुख संजय रेहपाडे म्हणाले, "मागील दोन ते तीन दिवसांपासून राज्यात जो गोंधळ सुरू आहे तो क्षणिक आहे. राज्यातील शिवसैनिक हा मुख्यमंत्री उद्धव ठाकरे यांच्याच बाजूने आहे."
Photos : “शिवसेनेचे आमदार गेले असले तरी…”; मुख्यमंत्र्यांनी ‘वर्षा’ सोडल्यानंतर शिवसैनिक भावूक
शिवसेना नेते एकनाथ शिंदे यांनी पुकारलेल्या बंडामुळे महाविकास आघाडी सरकार संकटात आले आहे. काल रात्री उद्धव ठाकरे यांनी ‘वर्षा’ या मुख्यमंत्री निवासस्थानावरून 'मातोश्री'वर मुक्काम हलवला. मुख्यमंत्र्यांना निरोप देण्यासाठी शिवसैनिकांनी हजारोंच्या संख्येने गर्दी केली होती.
फोटो पाहण्यासाठी लिंकवर क्लिक करा
नगरविकासमंत्री एकनाथ शिंदे यांच्या बंडाबद्दल मुख्यमंत्री किंवा शिवसेना पक्षप्रमुख उद्धव ठाकरे हे अनभिज्ञ होते, अशी चर्चा सुरू झाली असली तरी ठाकरे यांना गेल्या सहा महिन्यांपासून शिंदे यांच्या हालचालींची चाहूल लागली होती.
एकनाथ शिंदे व उद्धव ठाकरे (संपादित छायाचित्र)
महाराष्ट्रातील राजकीय संकट गंभीर होताना दिसत आहे. शिवसेना बंडखोर नेते एकनाथ शिंदे यांना शिवसेनेच्या आमदारांचा पाठिंबा वाढत आहे.
