Maharashtra Floor Test: शिंदे सरकारने विश्वासदर्शक ठराव जिंकला, अजित पवार विधानसभा विरोधी पक्षनेतेपदी

विधानसभेचं आजचं कामकाज संपलं आहे. राज्यपालांच्या निर्देशानुसार दोन दिवसीय अधिवेशनात विधानसभा अध्यक्ष निवडणूक पार पडली तसंच विश्वासदर्शक ठराव मांडण्यात आला. विधानसभा आता पुढील अधिवेशनापर्यंत स्थगित करण्यात आली आहे.

विरोधाला विरोध करणारे आम्ही नाही. सध्या लोकप्रिय निर्णय घेण्याकडे सगळ्यांचा कल आहे. पंजाब सरकारचं आपल्यासमोर उदाहरण आहे. फुकट मिळालं की चांगलं वाटतं, पण निधीत पैसा कमी पडेल याकडे लक्ष दिलं पाहिजे असा सल्ला अजित पवारांनी दिला.

करोनामुळे पहिल्या अधिवेशनानंतर अधिवेशन झालंच नाही. मागील अडीच वर्षात मंत्र्याना मतदारसंघातील कामांसाठी अपेक्षित वेळ मिळाला नाही असं अजित पवारांनी सांगितलं. शिवराज पाटील ४२ वर्षांचे असताना अध्यक्ष झाले होते, आम्ही चुकून तुम्ही सर्वात तरुण अध्यक्ष असल्याचा उल्लेख झाला असं अजित पवार यावेळी म्हणाले.

मी अनेक वर्ष सत्ताधारी पक्षातून काम केलं आहे. १९९० मध्ये मी, जयंत पाटील, आर आर पाटील आलो. अनेक नेत्यांनी विरोधी पक्षनेतेपदाची ताकद काय असते दाखवून दिलं आहे. लोकशाहीत विधीमंडळात मुख्यमंत्री, उपमुख्यमंत्री, अध्यक्ष या पदाप्रमाणे विरोधी पक्षनेतेपदही महत्वाचं असतं. महाराष्ट्रात कधी कुठे काय घडेल सांगता येत नाही. सध्या दुबार पेरणीचं संकट आलं आहे. धरणातील पाणीसाठा कमी झाला आहे. ठाण्याला पाणी पुरवठा करणाऱ्या धरणातही बिकट स्थिती आहे. कोणत्याही स्तरावरील लोकांसोबत काम करताना आम्हाला न्याय मिळाला पाहिजे अशी अपेक्षा असते. सत्ताधाऱ्यांकडून न्याय मिळाला नाही तर ते विरोधी पक्षाकडे जातात. राज्याच्या विकासात आपणही कसं योगदान देऊ शकतो याचं उदाहरण विरोधी पक्षनेत्यांनी दिलं आहे असं अजित पवार यांनी सांगितलं.

अजित पवारांकडे एक यशस्वी नेते म्हणून पाहिलं पाहिजे. एकदा गोव्यात मी अचानक भेटलो होतो, तेव्हा सुट्टीच्या दिवशीही सकाळी पावणे आठ वाजता बोलावलं होतं. त्यावेळीही त्यांनी फोन करुन आलो नसल्याचं विचारलं होतं. त्यांच्या या गुणांचा फायदा सभागृह चालवण्यात होईल अशी आशा विधानसभा अध्यक्ष राहुल नार्वेकर यांनी व्यक्त केली.

करोना काळात दक्षता घेत सगळ्यांची कामं करण्यासाठी एकमेव मंत्री उपस्थित असेल तर ते अजित पवार होते हे महाराष्ट्राला मान्य करावं लागेल असं भास्कर जाधव यांनी सांगितलं.

मी अजित पवारांना १९९० पासून पाहत आहे. काही काळ खासदार म्हणून त्यांनी काम केलं. ते तरुणांचं आवडतं व्यक्तिमत्व होते आणि आहे. ते अत्यंत स्पष्टवक्त, शिस्तीचे आहेत. जे काही ते समोर सांगून टाकतात. जमेल तेवढ्यांना न्याय देण्याचा त्यांचा प्रयत्न असतो. अजित पवारांना सगळ्या विभागांचा अभ्यास आहे असं बाळासाहेब थोरात म्हणाले. विरोधी पक्षनेता कसा होता हे बऱ्याच वर्षानंतरही चर्चेचा विषय असतो असंही त्यांनी सांगितलं.

राष्ट्रवादी काँग्रेसचे नेते अजित पवार यांची विधानसभा विरोधी पक्षनेतेपदी निवड करण्यात आली आहे. सभागृहातील सदस्यांकडून त्यांचं अभिनंदन करण्यात आलं.