सात जणांना ठार करणाऱ्या वाघाला नरभक्षक ठरवून पोंभुर्णा परिसरात मंगळवारी संध्याकाळी पोलीस नेमबाजांनी गोळ्या घालून ठार केले. मात्र आंबेधानोरा मार्गावर विसावलेला वाघ हाच नक्की नरभक्षक आहे की नाही याची कोणतीही खातरजमा न करता वाघाला ठार मारण्याचे आदेश देण्यात आल्याचा आरोप करीत या घटनेचा वन्यजीवप्रेमींनी तीव्र निषेध नोंदवला आहे. तसेच वनखाते व वाघाला ठार मारण्याची मागणी करणाऱ्या राजकीय नेत्यांवर गुन्हा दाखल करण्याची मागणी केली आहे, तर वाघाला ठार मारण्यात आल्याचे समजल्यानंतर गेले तीन महिने दहशतीच्या छायेत वावरणाऱ्या गावकऱ्यांनी मात्र सुटकेचा नि:श्वास सोडला आहे.
एक वाघीण व तिच्या दोन पिल्लांनी तीन महिन्यांत सात लोकांचे बळी घेतले. रविवारी वाघाने एका गावकऱ्याला ठार केल्यानंतर वाघाला ठार केले नाहीत तर आम्हीच मारू, अशी आक्रमक भूमिका गावकऱ्यांनी घेतली. येथील राजकीय नेत्यांनीही ही मागणी पूर्ण करण्याचा आग्रह धरल्याने प्रधान मुख्य वनसंरक्षक सर्जन भगत यांनी रविवारी वाघाला नरभक्षक ठरवून गोळ्या घालण्याचे आदेश दिले. नरभक्षक ठरवून जिल्ह्य़ात घेतला गेलेला वाघाचा हा दुसरा बळी. यापूर्वीही चंद्रपुरातच ब्रम्हपुरी वन विभागांतर्गत तळोधी येथे वाघाला अशाच प्रकारे नेमबाजांकडून ठार करण्यात आले होते.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
