“मला गोळी मारली जाऊ शकते”, छगन भुजबळांच्या दाव्यावर जरांगे-पाटील टीका करत म्हणाले…

छगन भुजबळ काय म्हणाले?

“माझ्यावर हल्ला करण्याची तयारी सुरू झाली आहे. प्रकाश सोळंके, संदीप क्षीरसागर यांची घरे जाळण्यात आली. कुणी बीडला जायला तयार नाही. आमचं सुद्धा हेच होईल. कुणी यावं अशी अपेक्षा नाही. माझी सुरक्षा वाढवण्यात आली आहे. याबद्दल पोलिसांनी सांगितलं की, ‘तुम्हाला गोळी मारली जाईल,’ असा अहवाल आलाय. मारा… हरकत नाही… मरायला मी तयार आहे. मराठा आरक्षणाला माझा विरोध नाही. मराठ्यांना वेगळं आरक्षण द्या. पण, ही झुंडशाही थांबवा,” असं वक्तव्य छगन भुजबळांनी केलं आहे.

“सरकारही भुजबळांना घाबरत आहे”

भुजबळांच्या विधानावर जरांगे-पाटलांनी टीका केली आहे. माध्यमांशी संवाद साधताना जरांगे-पाटील म्हणाले, “छगन भुजबळ काहीही वक्तव्य करत आहेत. माझ्या जीवाला धोका असल्याचं सांगून गुन्ह्यांतून बाहेर पडण्याचा प्रयत्न भुजबळांकडून केला जातोय. हेच देवेंद्र फडणवीसांच्या लक्षात येत नाही. सरकारही भुजबळांना घाबरत आहे.”

“भुजबळांना सुट्टी नाही”

“भुजबळ मंत्री असून त्यांनी चांगलं बोलावं. मराठ्यांबद्दल राग व्यक्त करू नये. आम्ही ओबीसी बांधवांबद्दल एक शब्द तरी काढतो का? भुजबळांवर मी आयुष्यभर बोलणार.. त्यांना सुट्टीच नाही,” असा इशारा जरांगे-पाटलांनी दिला आहे.

“भुजबळांना काहीही कळत नाही”

“छगन भुजबळ बधिर झाले आहे. त्यांचं वय झाल्यानं काहीही बोलत आहेत. त्यांना काहीही कळत नाही,” असं टीकास्रही जरांगे-पाटलांनी डागलं आहे.