Manoj Jarange : “बेगडी उपोषण करण्यापेक्षा…”, आंदोलन स्थगित करताना मनोज जरांगे असं का म्हणाले?

मनोज जरांगे पाटील म्हणाले, माझा हट्ट होता की मला सलाईन लावू नका, तसं केलं तर समाजाला मिळत आलेलं आरक्षण मिळणार नाही. हे उपोषण किंवा हे आंदोलन ही मराठा समाजाची शक्ती आहे, हे आपल्याकडे असलेलं शस्त्र आहे. या शक्तीचा मला पूर्ण उपयोग करायचा होता. सरकार माझं ऐकेल, त्यांना ऐकावं लागेल असं वाटत होतं. परंतु, माझं कोणी ऐकलं नाही, त्यांनी मला सलाईन लावलीच. मी त्यांना सांगत होतो, सरकार बेमुदत उपोषणाला घाबरतं, त्यांना खुर्ची गमावण्याची भीती असते. मात्र आता सलाईन लावली आहे. त्यामुळे मी आता ठरवलं आहे की असं सलाईन लावून बेगडी उपोषण करण्यात करण्याला काही अर्थ नाही, सलाईन लावून, एका जागेवर पडून राहून मी उपोषण करणार नाही. मी असं केलं तर तो बेगडीपणा ठरेल. अशा प्रकारचं उपोषण मी करू शकत नाही त्यापेक्षा मी असं उपोषण न केलेलं बरं या मातावर मी आता आलो आहे.

हे ही वाचा >> Sanjay Raut : “देवेंद्र फडणवीस हे अमित शाह यांच्या मनातले मुख्यमंत्री नाहीत, त्यामुळेच…”; संजय राऊत यांचा आरोप

उपोषण स्थगित केल्यानंतर मनोज जरांगे पुढे काय करणार?

जरांगे म्हणाले, सलाईन घेऊन इथे पडून राहण्यापेक्षा मी १०-१२ दिवस महाराष्ट्रात फिरेन. वेगवेगळ्या मतदारसंघात जाऊन तयारी करेन. तिथे मोर्चे आणि रॅली काढण्याची तयारी करेन. सरकारमधील लोकांचा जीव त्यांच्या खुर्चीत आहे, ती खुर्ची कशी धोक्यात येईल त्यासाठी काम करेन. मी इथे पडून काय करू? त्यामुळे माझ्या डोक्यात आलं की लोक मला सलाईन लावत राहणार आणि मी इथं पडून राहणार त्यामुळे मी ठरवलंय, आज (२४ जुलै) दुपारी मी उपोषण स्थगित करेन. कारण मी अशा प्रकारे उपोषण करणारा माणूस काही, त्याला काही अर्थ नाही. अशा उपोषणाने समाजाला न्याय मिळेल की नाही हे माहिती नाही. त्यामुळे मी निर्णय घेतला आहे की आपण हे उपोषण स्थगित करूया.