Manoj Jarange : बीडच्या मस्साजोगचे सरपंच संतोष देशमुख यांची अत्यंत क्रूरपणे हत्या करण्यात आली. या घटनेचे तीव्र पडसाद राज्यात उमटले. तसंच हिवाळी अधिवेशनाच्या दरम्यानही मुख्यमंत्री देवेंद्र फडणवीस यांना याबाबत स्पष्टीकरण द्यावं लागलं. या हत्या प्रकरणातील मुख्य संशयित वाल्मिक कराड मंगळवारी पोलिसांना शरण आला आहे. दरम्यान या प्रकरणातले काही आरोपी फरार आहेत. यावरुन मनोज जरांगेंनी देवेंद्र फडणवीस यांना रस्त्यावर उतरण्याचा इशारा दिला आहे.
काय म्हणाले मनोज जरांगे?
मस्साजोगचे सरपंच संतोष देशमुख यांची हत्या झाली. त्यांच्या कुटुंबीयांना मी भेटलो.या प्रकरणातील आरोपीला अजून अटक झालेली नाही याबाबत त्यांनी चर्चा केली. आमच्या सर्वांची इच्छा आहे, सर्व आरोपींना अटक झाली पाहिजे. त्यांना कठोर शिक्षा झाली पाहिजे. त्यासाठी आता राज्यभर मोर्चे सुरु झाले आहेत, असं जरांगे म्हणाले.
आत्ताच हे सगळं गृहमंत्र्यांचं अपयश आहे असं म्हणता येणार नाही-जरांगे
संतोष देशमुख हत्या प्रकरणातील आरोपींना अटक न होणे हे गृहमंत्र्यांचे अपयश आहे की नाही हे याबाबत आताच काही सांगता येणार नाही, राजकरणात, समाजकारणात काम करताना कोणी कोणाचे लाडकं नसतं, शत्रू नसतो, विरोधक नसतो. ज्या ज्या वेळेस चुका होतील त्या त्या वेळेस बोलावे लागेल. मुख्यमंत्री दिलेला शब्द पाळत असतील तर आम्ही अपेक्षा ठेवून आहोत. शब्द नाही पाळला तर आम्ही रस्त्यावर उतरणार असा इशारा मनोज जरांगेंनी दिला.
हे पण वाचा- Walmik Karad: वाल्मिक कराडला पोलीस कोठडी, पण युक्तिवादावेळी नेमकं काय घडलं? वाचा सविस्तर
धनंजय मुंडेंच्या राजीनाम्याच्या मागणीबाबत काय म्हणाले जरांगे?
मनोज जरांगे या प्रकरणातील संशयित वाल्मिक कराड हा मंत्री धनंजय मुंडे यांच्या जवळचा आहे. धनंजय मुंडेंच्या राजीनाम्याची मागणी होते आहे. याबाबत विचारलं असता जरांगे म्हणाले, “धनंजय मुंडे यांचा या हत्या प्रकरणात सहभाग आहे की नाही हे लवकरच सिद्ध होईल. आता चौकशी सुरु झाली आहे. काही आरोपी फरार आहेत. त्यांचे सीडीआर घेतले जातील. कॉल डिटेल्सवरुन सगळे समोर येईल. कोणी खंडणी मागितली, कोणी मागायला लावली, कोणी फोन करायला लावले, आरोपी कोणी फरार केले, आरोपींना सांभाळतं आहे? हे सगळं चौकशीतून समोर येईल. या प्रकरणातील आरोपींना मोक्का लागणार आहे. ३०२ चा गुन्हा लावला जाऊ शकतो. सरकारने हे केले नाही तर मराठे पुन्हा रस्त्यावर येतील, असा इशारा मनोज जरांगे यांनी दिला. आता या प्रकरणात आणखी काय काय होणार? हे पाहणं महत्त्वाचं असणार आहे.
