अलिबाग- सागरी वन्यजीवांची तस्करांना रोहा उपवन संरक्षक कार्यालयाच्या पथकाने जेरबंद केले आहे. त्यांच्याकडून ३५ टन कॅपिझ शेल सागरी वन्यजीव प्राण्यांचे अवशेष जेरबंद केले आहेत.
रोहा वनविभागातील उपवनसंरक्षक अप्पासाहेब निकत यांना या सागरी जीवांच्या अवशेषांच्या तस्करी बाबत खबर मिळाली होती. त्यानुसार म्हसळा तालुक्यातील देवघर येथे वनक्षेत्रपाल एस पांढरकामे यांच्या पथकाने धाड टाकली यावेळी घटनास्थळी एका ट्रक मध्ये प्लास्टीकच्या गोण्यामध्ये कॅपिझ शेल या सागरी वन्यजीवांचे अवशेष आढळून आले. स्थानिक भाषेत याला काजगा असे म्हणतात. आणि याची बाजारातील किंमत कोट्यावधीच्या घरात आहे. यावेळी काही जण या समुद्रजीवाच्या अवशेषांचा खरेदी विक्री व्यवहार करीत वनअधिकाऱ्यांच्या निदर्शनास आले.
कॅपिझ शेल हा सागरी वन्यजीव वन्यजीव संरक्षण अधिनियम १९७२ मधील सूची क्र चार अन्वये प्रतिबंधित केला आहे. त्यामुळे घटनास्थळी खरेदी विक्री व्यवहार करणाऱ्या मुरलीधर महादेव म्हामूणकर, धनंजय मारुती बनसोडे, रोहित अरविंद सादरे, गोपाळसिंग पिरसिंज राजपूत, प्रेमदास श्रवणदास (राहणार-राजस्थान) यांना वनविभागाच्या अधिकाऱ्यांनी ताब्यात घेतले. त्यानंतर त्यांच्या विरोधात वन्यजीव संरक्षण अधिनियम १९७२ चे कलम ९, ३९, ४४, ४८, ४८ (अ), ५० (१) सी, ५१ नुसार गुन्हा नोंद करण्यात आला आहे.
घटनास्थळी एकूण ३० ते ३५ टन मुद्देमाल वनविभागाच्या अधिकाऱ्यांनी जप्त केला आहे. या पाचही आरोपींना न्यायालयात हजर केले असता न्यायालयाने सर्वांना दोन दिवसांची पोलीस कोठडी सुनावली आहे. पुढील अधिक तपास रोहा उपवनसंरक्षक अप्पासाहेब निकत व सहायक वनसंरक्षक विश्वजीत जाधव यांच्या मार्गदर्शनाखाली सुरु आहे.
