सोलापूर : मराठा आरक्षण प्रश्नावर राज्य विधिमंडळाचे विशेष अधिवेशन तत्काळ बोलवावे, या मागणीसाठी बार्शीत भाजप पुरस्कृत अपक्ष आमदार राजेंद्र राऊत यांनी सुरू केलेले ठिय्या आंदोलन तिसऱ्या दिवशीही सुरूच होते. विधिमंडळाचे विशेष अधिवेशन बोलावण्यासंबंधी महायुती शासनाकडून अधिकृत निर्णय झाला नसला तरी हे विशेष अधिवेशन लवकरच होणार असल्याचे संकेत आमदार राऊत यांनी दिले आहेत. दरम्यान, सोलापूरचे पालकमंत्री चंद्रकांत पाटील यांनी बार्शी येथील आंदोलनस्थळी धाव घेऊन आमदार राऊत यांची भेट घेतली. यावेळी झालेल्या चर्चेतून फारसे काही साध्य झाले नसल्याचे कळते. बार्शीत छत्रपती शिवाजी महाराजांच्या पुतळ्यासमोर आमदार राऊत गेल्या तीन दिवसांपासून शेकडो समर्थकांसह ठिय्या आंदोलन करीत आहेत. मराठा आरक्षण प्रश्नावर सुरुवातीला त्यांनी आंदोलनाचे नेते मनोज जरांगे यांच्यावर टीकास्त्र सोडले. दुसरीकडे जरांगे यांनीही आमदार राऊत यांचा बोलविता धनी उपमुख्यमंत्री देवेंद्र फडणवीस हेच असल्याचा प्रत्यारोप करून त्यांचे आव्हान स्वीकारले आहे. दरम्यान मराठा आरक्षण प्रश्नावर आपली आणि जरांगे यांची भूमिका एकच असल्याचा दावा आमदार राऊत यांनी केला आहे. हेही वाचा >>>Nitin Gadkari : “तुम्ही पंतप्रधान होणार असाल तर आमचा पाठिंबा, त्या नेत्याने..”, नितीन गडकरींचं वक्तव्य चर्चेत ठिय्या आंदोलनस्थळी बोलताना आमदार राऊत यांनी मराठा आरक्षण प्रश्नावर विधिमंडळाचे विशेष अधिवेशन बोलावण्यासाठी सभापती राहुल नार्वेकर यांच्यासह उपमुख्यमंत्री देवेंद्र फडणवीस यांच्याशी चर्चा झाल्याचे सांगितले. सर्व पक्षांच्या आमदारांनाही निरोप दिला जात असून मराठा आरक्षण प्रश्नावर निर्णायक धोरण स्वीकारण्याची वेळ आल्याचे त्यांनी सांगितले.
