नवनीत राणा आणि रवी राणा यांना मुंबई पोलिसांनी नोटीस बजावली आहे. ८ जूनला राणा दाम्पत्याला चौकशीसाठी मुंबईत हजर राहण्याचे निर्देश देण्यात आले आहे. मुंबई पोलिसांनी नवनीत राणा आणि रवी राणांवर दोषारोपपत्रही दाखल केले आहे. सरकारी कामात अडथळा आणल्या प्रकरणी गुन्हा दाखल करण्यात आला होता. या प्रकरणीच मुंबई पोलिसांनी ही नोटीस बजावली आहे.
हनुमान चालिसा पठणाचे आव्हान
खासदार नवनीत राणा आणि आमदार रवी राणा यांनी मुख्यमंत्री उद्धव ठाकरे यांच्या मुंबईतील मातोश्री निवासस्थानाबाहेर हनुमान चालिसा पठण करणार असल्याचे आव्हान केले होते. त्यानंतर शिवसैनिक चांगलेच आक्रमक झाले होते. मातोश्री निवास्थानाबाहेर शिवसैनिकांनी पहारा दिला होता. तसेच राणा दाम्पत्याच्या वांद्रेतील निवासस्थानाबाहेरही मोठ्या प्रमाणात शिवसैनिक जमले होते.
राणा दामपत्यावर गुन्हा दाखल
राज्यातील कायदा आणि सुव्यवस्था बिघडवल्याच्या कारणाखाली राणा दामपत्यावर मुंबई पोलिसांनी आयपीसीच्या कलम ३५३ अंतर्गत गुन्हा दाखल केला होता. तसेच दोघांनी पोलिसांना सहकार्य न करता उलट आरेरावी केली असल्याचा आरोप मुंबई पोलिसांनी केला होता. याच प्रकरणी मुंबई पोलिसांनी नवनीत राणा आणि रवी राणा यांना नोटीस बजावली आहे. येत्या ८ जूनला दोघांना वांद्रे न्यायलयात हजर रहावे लागणार आहे.
