राष्ट्रवादीचे अध्यक्ष शरद पवार यांनी बॉलिवूडमध्ये मुस्लीम समाजाचे मोठे योगदान आहे. या योगदानाकडे दुर्लक्ष केले जाऊ शकत नाही, असे विधान केले आहे. तसेच अल्पसंख्याकांनी सर्वच क्षेत्रात आपले योगदान दिलेले आहे, असेही पवार म्हणाले. ते नागपुरात बोलत होते.
“आजघडीला कला, लेखन किंवा कविता असो या सर्वच क्षेत्रात योगदान देण्याची मोठी क्षमता अल्पसंख्याकांमध्ये आहे. बॉलिवडूमध्ये आतापर्यंत सर्वाधिक योगदान कोणी दिलेले आहे? बॉलिवूडच्या प्रगतीसाठी मुस्लीम समाजाने सर्वाधिक योगदान दिलेले आहे. याकडे आपण दुर्लक्ष करू शकत नाही,” असे शरद पवार म्हणाले. तसे वृत्त एएनआयने दिले आहे.
नागपुरात बोलत असताना त्यांनी मुस्लीम समाजातील वेगवेगळ्या समस्या आणि अडचणींवरही भाष्य केले. “देशातील एक मोठा घटक असूनही आम्हाला योग्य सोई-सुविधा मिळत नाहीत, अशी मुस्लीम समाजाची भावना आहे. या भावनेत तथ्य आहे. या सोई-सुविधा त्यांच्यापर्यंत कशा पोहोचतील हे सुनिश्चित करण्यासाठी विचारविनिमय व्हायला हवा,” अशी इच्छाही शरद पवार यांनी व्यक्त केली.
