काँग्रेसचे नेते नाना पटोले आता लोकसभा निवडणूक लढवल्यानंतर विधानसभेच्याही रिंगणात उतरले आहेत. काँग्रेसकडून त्यांना भंडाऱ्यातील साकोलीमधून उमेदवारी जाहीर करण्यात आली आहे. तर त्यांच्याविरोधात भाजपाने पालकमंत्री डॉ. परिणय फुके यांना उतरवले असल्याने, येथील लढत चुरशीची होणार असल्याचे दिसत आहे.
काँग्रेसकडून काल रात्री उशीरा नाना पटोले यांच्या उमेदवारीचे पत्रक जारी करण्यात आले आहे. पटोले हे काँग्रेसचे नेते असून साकोली विधानसभा त्यांचे गृहक्षेत्र असल्याने या क्षेत्रात त्यांचा प्रभाव आहे. शिवाय या अगोदर २००९ मध्ये साकोली मतदारसंघातुनच ते विधनासभेवर निवडून गेले होते. तर भाजपाचे उमेदवार डॉ.परिणय फुके यांना देखील मंत्रीपद मिळाल्यानंतर अल्पावधीतच भंडारा-गोंदिया ही जिल्हे पिंजून काढून येथील जनसंपर्क वाढवला आहे. त्यामुळे या दोन्ही उमेदवारांमधील लढत ही चुरशीची होणार असल्याची राजकीय वर्तुळात चर्चा आहे.
Nana Patole named as the Congress candidate from Sakoli assembly constituency, for the upcoming elections to the legislative assembly of Maharashtra. (file pic) #MaharashtraAssemblyPolls pic.twitter.com/SikAdnAFW3
— ANI (@ANI) October 3, 2019
लोकसभा निवडणुकीपूर्वी भाजपविरोधात बंड पुकारत नाना पटोले यांनी खासदारकीचा राजीनामा देत काँग्रेसमध्ये प्रवेश केला होता. यानंतर त्यांनी केंद्रीय मंत्री नितीन गडकरींविरोधात नागपूरमधून लोकसभा निवडणूक लवढवली. मात्र त्यांना पराभवास सामोरे जावे लागले होते. त्यानंतर आता पटोले पुन्हा विधानसभा निवडणुकीच्या रिंगणात उतरले आहेत.