लोकसभेतील पराभवानंतर नवनीत राणा राज्यसभेवर जाणार? दिल्लीत वरिष्ठांच्या भेटीनंतर राज्यात परतताच म्हणाल्या…

नवनीत राणा म्हणाल्या, “मी पराभूत होऊनही जिंकले आहे. कारण आमच्या नरेंद्र मोदी यांनी पुन्हा एकदा पंतप्रधानपदाची शपथ घेतली आहे. मी नक्कीच हरले आहे. परंतु, नरेंद्र मोदी जेव्हा शपथ घेत होते, तेव्हा माझ्या मनात जिंकल्याचीच भावनात येत होती.”

दरम्यान, नवनीत राणा यांना यावेळी विचारण्यात आलं की तुम्ही आता राज्यसभेवर जाणार आहात की महाराष्ट्रात काम करणार? यावर त्या म्हणाल्या, “मी माझ्या मतदारसंघात, माझ्या लोकांसाठी काम केलं. त्यामुळेच २०१९ च्या लोकसभा निवडणुकीत अमरावतीकरांनी मला अपक्ष उमेदवार म्हणून निवडून संसदेत पाठवलं. त्यानंतर खासदार झाल्यानंतर मी अजून कामं केली. परंतु, मला कळत नाही की माझ्या जनतेने मला का थांबवलं? मी सध्या भविष्याचा विचार करत नाही. मी एक कार्यकर्ती म्हणून आमच्या जिल्ह्यात, माझ्या मतदारसंघात काम करत राहीन. आमच्या नेत्यांबरोबर बोलून पुढची वाटचाल कशी करायची याची तयारी करेन.”

हे ही वाचा >> “मी पराभूत झालेय, उद्धव ठाकरेंनी आता तरी…”, नवनीत राणांचं वक्तव्य चर्चेत

नवनीत राणांच्या पराभवाला भाजपा जबाबदार असल्याची चर्चा मतदारसंघात होत आहे. यावरून राणा यांना प्रश्न विचारण्यात आला की, लोकसभा निवडणुकीत तुम्हाला जनतेने, कार्यकर्त्यांनी की महायुतीच्या नेत्यांनी थांबवलं? यावर नवनीत राणा म्हणाल्या, “मी २०१९ पासून आतापर्यंत खूप इमानदारीने जनतेसाठी काम केलं आहे. पक्षाची एक कार्यकर्ती म्हणून जी कामं करायला हवी होती ती सगळी कामं केली. आम्ही खूप लढलो. छत्रपती शिवाजी महाराजांच्या विचाराने मार्गक्रमण करत राहिलो. शिवाजी महाराजांचं एक वाक्य आहे की लढणारा कधीच मागे वळून पाहत नाही, त्याप्रमाणे मी देखील आता मागे वळून पाहणार नाही. पुढेच चालत राहीन.”