Chhagan Bhujbal : विधानसभेच्या निवडणुकीनंतर महाराष्ट्रात महायुतीचं सरकार स्थापन झालं. मात्र, महायुती सरकारच्या मंत्रिमंडळात अनेक दिग्गज नेत्यांना संधी देण्यात आलेली नाही. मंत्रिपद न मिळाल्यामुळे महायुतीमधील अनेकांनी नाराजी व्यक्त केली होती. यामध्ये राष्ट्रवादी काँग्रेस (अजित पवार) पक्षाचे नेते छगन भुजबळ यांचाही समावेश आहे. छगन भुजबळ यांनी तर जाहीर नाराजी बोलून दाखवत वेगळी भूमिका घेण्यासंदर्भात इशाराही दिला होता. एवढंच नाही तर जहां नहीं चैना, वहां नहीं रहना असं म्हणत छगन भुजबळांनी सूचक इशाराही दिला होता. तसेच अजित पवार, सुनील तटकरे यांच्याबाबत नाराजी व्यक्त करत अप्रत्यक्ष टीका केली होती.
दरम्यान, मध्यंतरी भुजबळांनी देवेंद्र फडणवीस यांची भेट देखील घेतली होती. त्यामुळे छगन भुजबळांच्या मनात नेमकं काय चाललंय? असे प्रश्न अनेकांनी उपस्थित केले होते. दरम्यान, आज छगन भुजबळ त्यांच्या मतदारसंघाच्या दौऱ्यावर होते. यावेळी माध्यमांशी बोलताना त्यांनी सूचक विधान केलं. ‘अनेकांचे पतंग कापले, पण माझा पतंग कुणीही कापलेला नाही’, असं सूचक विधान छगन भुजबळ यांनी केलं. त्यांच्या या विधानाची राजकीय वर्तुळात चर्चा रंगली आहे.
हेही वाचा : “…अन्यथा दंडासह रक्कम वसूल करण्यात येईल”, लाडकी बहीण योजनेबाबत छगन भुजबळांचं मोठं विधान
छगन भुजबळ काय म्हणाल्या?
“अनेकांचे पतंग कापले. आता आपल्या सहकाऱ्यांबरोबर पुन्हा पतंग उडवू”, असं मिश्किल विधान छगन भुजबळ यांनी माध्यमांशी बोलताना केलं. मात्र, भुजबळ यांच्या या विधानाला मंत्रिपद न मिळाल्याची किनार होती. याचवेळी माध्यमांच्या प्रतिनिधींनी भुजबळांना विचारलं की तुमचाही पतंग अडीच वर्षांसाठी कापला गेला आहे का? यावर उत्तर देताना भुजबळांनी म्हटलं की, “माझा पतंग कापलेला नाही. मी येवला मतदारसंघाचा पाचव्यांदा आमदार आहे. तुम्ही हे लक्षात घ्या की, माझा जन्म येवल्यात झालेला नाही. माझं घरदार किंवा कुटुंब येवल्यातील नाही. तरीही येवला आणि लासलगावच्या लोकांनी मला मागचे २० वर्ष आणि पुढच्या पाच वर्षांसाठी आमदारकी बहाल केलेली आहे”, असं छगन भुजबळ यांनी म्हटलं.
