Supriya Sule On Mahayuti : विधानसभेची निवडणूक तोंडावर येऊन ठेपली असल्यामुळे राज्यात राजकीय वातावरण तापलं आहे. विधानसभेच्या पार्श्वभूमीवर सर्वच राजकीय पक्षांच्या नेत्यांनी कंबर कसली आहे. राज्यातील विविध मतदारसंघात नेत्यांनी दौरे करत आढावा घेत आगामी रणनीती आखली आहे. दौऱ्यांच्या माध्यमातून विविध मतदारसंघाचा आढावा आणि उमेदवारांची चाचपणी केली जात आहे. एकीकडे महाविकास आघाडी तर दुसरीकडे महायुतीच्या सभांचा धडाका सुरु आहे. अशातच मुंबई विद्यापीठाच्या सिनेट निवडणुकीची राज्यभरात चर्चा रंगली होती. या सिनेट निवडणुकीसाठी २४ सप्टेंबर रोजी मतदान पार पडले. त्यानंतर शुक्रवारी (२७ सप्टेंबर) मुंबई विद्यापीठाच्या सिनेट निवडणुकीचा निकाल लागला.
या निवडणुकीत शिवसेना (Shivsena) ठाकरे गटाच्या युवासेनेने आपलं वर्चस्व कायम राखलं. १० पैकी १० जागा युवासेनेने जिंकल्या तर अखिल भारतीय विद्यार्थी परिषदेला एकही जागा जिंकता आली नाही. यावरूनच राष्ट्रवादी काँग्रेस शरद पवार गटाच्या खासदार सुप्रिया सुळे यांनी युवासेनेचं कौतुक करत राज्यातील सत्ताधारी महायुतीवर हल्लाबोल केला आहे. “स्थानिक स्वराज्य संस्थांच्या निवडणुकाही सत्ताधाऱ्यांनी अशाच पद्धतीने अडवून धरल्या आहेत. पण जेव्हा या निवडणुका होतील तेव्हा जनता चोख उत्तर देईल”, असं सुप्रिया सुळे (Supriya Sule) यांनी म्हटलं आहे.
मुंबई विद्यापीठाच्या सीनेट निवडणूकीत युवासेनेच्या उमेदवारांनी एकतर्फी विजय मिळविला. ही निवडणूक सत्ताधारी भाजपाकडून सातत्याने पुढे ढकलण्यात येत होती. राज्यातील स्थानिक स्वराज्य संस्थांच्या निवडणूकाही सत्ताधाऱ्यांनी अशाच पद्धतीने अडवून धरलेल्या आहेत. जेंव्हा या निवडणूका होतील… https://t.co/Y8F9RdYcep
— Supriya Sule (@supriya_sule) September 28, 2024
सुप्रिया सुळे यांनी काय म्हटलं?
“मुंबई विद्यापीठाच्या सीनेट निवडणुकीत युवासेनेच्या उमेदवारांनी एकतर्फी विजय मिळवला. ही निवडणूक सत्ताधारी भाजपाकडून सातत्याने पुढे ढकलण्यात येत होती. राज्यातील स्थानिक स्वराज्य संस्थांच्या निवडणुकाही सत्ताधाऱ्यांनी अशाच पद्धतीने अडवून धरलेल्या आहेत. जेव्हा या निवडणुका होतील तेंव्हा जनता त्यांना चोख उत्तर देईल. युवासेना आणि सर्व विजयी उमेदवारांचे हार्दिक अभिनंदन”, असं सुप्रिया सुळे यांनी म्हटलं आहे.
सुप्रिया सुळेंकडून युवासेनेचं कौतुक
मुंबई विद्यापीठाच्या सिनेट निवडणुकीचा (Mumbai University Senate Election) शुक्रवारी (२७ सप्टेंबर) निकाल लागला. या निवडणुकीत शिवसेना ठाकरे गटाच्या (Shiv Sena Thackeray Group) युवासेनेने जोरदार मुसंडी मारली. या सिनेट निवडणुकीसाठी २४ सप्टेंबर रोजी मतदान पार पडले होते. या निवडणुकीत युवासेना आणि अखिल भारतीय विद्यार्थी परिषदेमध्ये मोठी चुरस पाहायला मिळाली होती. मात्र, शिवसेना ठाकरे गटाच्या युवासेनेचा १० पैकी १० जांगावर विजय झाला तर अखिल भारतीय विद्यार्थी परिषदेला (ABVP) एकही जागा जिंकता आली नाही. दरम्यान, यावर प्रतिक्रिया देताना खासदार सुप्रिया सुळे यांनी शिवसेना ठाकरे गटाच्या युवासेनेच्या विजयी उमेदवारांचं अभिनंदन करत शुभेच्छा दिल्या आहेत.
