सांगलीत ‘जीबीएस’चे सहा रुग्ण आढळले, आरोग्य यंत्रणा सतर्क, उपचार सुरू

सांगली शहरातील चिंतामणीनगरमध्ये एका रुग्णाला जीबीएस आजाराची लक्षणे आढळून आली असून त्याच्यावर एका खासगी रुग्णालयात उपचार करण्यात येत आहेत. याशिवाय जिल्ह्यात बुधवारअखेर जीबीएसचे सहा संशयित रुग्ण आढळले असल्याची माहिती जिल्हा शल्य चिकित्सक डॉ. विक्रमसिंह कदम यांनी ‘लोकसत्ता’शी बोलताना दिली. संशयित रुग्णावर योग्य उपचार सुरू असून नागरिकांनी घाबरून जाऊ नये, असे आवाहन करत असताना पाणी उकळून पिण्याचे आणि स्वच्छतेबाबत दक्षता बाळगण्याचे आवाहन केले आहे.

डॉ. कदम यांनी सांगितले, हातापायामध्ये गोळे, मुंग्या येणे, अशक्तपणा, बोलताना, अन्न गिळताना अडचण आली तर तत्काळ वैद्यकीय उपचार करावेत. का आजार संसर्गजन्य नसल्याने घाबरण्याचे काही कारण नाही. सांगलीत आढळलेला रुग्ण अजमेर, आग्रा आदी ठिकाणी जाऊन आला असल्याने त्या ठिकाणी या आजाराची लागण झाली असल्याची शक्यता असल्याचे ते म्हणाले.

दरम्यान, महापालिकेचे वैद्यकीय अधिकारी डॉ. वैभव पाटील यांनी सांगितले, संबंधित रुग्णाच्या घरातील सात व्यक्तींची तपासणी केली असता ते सामान्य असल्याचे आढळले आहे. परिसरात ६०० घरांचे सर्व्हेक्षण आरोग्य विभागाच्या पथकामार्फत करण्यात आले असून सर्वांची प्रकृर्ती उत्तम आहे. या परिसरात वापरण्यात येणाऱ्या पाण्याची प्रयोगशाळेत तपासणीही करण्यात आली आहे. यामुळे नागरिकांनी कोणतीही भीती न बाळगता लक्षणे दिसताच घरीच न थांबता तत्काळ वैद्यकीय उपचार करून घ्यावेत, असे आवाहनही त्यांनी केले.