भरधाव वेगाने आलेल्या टँकरने रस्त्याकडेला उभ्या असलेल्या दोन महिलांना ठोकरल्याने एक महिला जागीच ठार झाली तर दुसरी महिला गंभीर जखमी झाली आहे. वेगवान टँकरने रस्त्याकडेला असलेल्या दोन दुचाकीचाही चुराडा केली असून हा विचित्र अपघात मंगळवारी सकाळी कराड- पंढरपूर मार्गावरील झरे (ता. आटपाडी) येथे घडला.
हेही वाचा- सांगली: सागरेश्वरमध्ये दोन हरणांचा मृत्यू
याबाबत माहिती अशी की झरे येथे भरघाव वेगाने आलेल्या टँकर (एमएच ५०-८८८८) चालकाचा वाहनावरील ताबा सुटला. टँकरने पारेकरवाडीचे मंगेश धोंडीराम दगडे यांच्या एका कृषी केंद्रासमोर लावलेल्या दुचाकीचा चुराडा केला. रस्त्यालगत थांबलेल्या राणी सुरेश पवार यांना टँकरने उडविले.या घटनेत ही महिला गंभीर जखमी झाली. तर संगीता प्रकाश पवार या पती नातलगाशी संवाद साधत असल्याने दुचाकीजवळ थांबलेल्या महिलेला जोरदार धडक दिली. यामध्ये सदरची महिला हवेत दहा ते पंधरा फूट उडून खाली पडल्याने जागीच ठार झाली.
या घटनेदरम्यान चौदा चाकी टँकरच्या मागील दोन चाकाची जोडी ट्रकच्या जॉईट मधून निसटली. ती वेगाने सचिन राजमाने यांच्या दुकानाच्या समोरील ब्रह्मचैतन्य चहा सेंटरच्या पाठीमागील दगडी भिंतीला जाऊन धडकली.त्यामुळे ही भिंत कोसळली. अपघातानंतर टँकर चालकाने कराड पंढरपूर रस्त्याने शेनवडीच्या (ता.माण) दिशेने पळ काढला. परंतु गावातील तरुणांनी पाठलाग करून चालकाला पकडून पोलिसांच्या ताब्यात दिले.