नगर परिषदेचे कामकाज ठप्प

पालघर : पालघर नगर परिषदेच्या संगणक प्रणालीचा मुख्य सव्‍‌र्हर गेल्या पंधरवडय़ापासून तांत्रिक बिघाडामुळे बंद असल्याने कामकाज ठप्प झाले आहे. पालघर नगरपरिषदेच्या निवडणुकीसाठी २८ फेब्रुवारीपासून नामनिर्देशन पत्र भरावयाचे आहे. अर्ज भरण्याचा कालावधी सुरू होत असूनही त्यासाठी वेगवेगळ्या प्रकारचे दाखले उपलब्ध होत नसल्याने इच्छुक उमेदवारांसमोर तसेच नागरिकांसमोर मोठी अडचण निर्माण झाली आहे.

पालघर नगर परिषदेमध्ये असलेल्या संपूर्ण संगणक प्रणालीचे मुख्य वीजपुरवठा यंत्र अर्थात यूपीएस प्रणालीमध्ये तांत्रिक बिघाड झाला होता. यासंदर्भात संगणक क्षेत्रातील अधिकाऱ्याने संबंधित अधिकाऱ्यांना सुचित करून त्यामध्ये दुरुस्ती करण्याचे विनंती केली होती. मात्र २४ मार्च रोजी होणाऱ्या नगर परिषदेच्या निवडणुकीच्या प्रारूप मतदारयादी अणि अंतिम मतदार यादी तयार करण्यास नगरपरिषदेचे सर्व वरिष्ठ अधिकारी व कर्मचारी व्यग्र राहिल्याने संगणक प्रणालीसाठी उपयुक्त ठरणाऱ्या यूपीएस प्रणालीच्या दुरुस्तीकडे दुर्लक्ष झाले.

पालघर शहराला होणाऱ्या वीजपुरवठय़ाचा दाब कमी-अधिक प्रमाणात होत असल्याने तसेच यूपीएस प्रणाली कार्यान्वित नसल्याने नगर परिषदेचा संगणक विभागाचा सव्‍‌र्हर बिघडून नादुरुस्त झाला. सव्‍‌र्हर नादुरुस्त असल्याने ऑनलाइन प्रणालीत समाविष्ट असलेल्या घरपट्टी व पाणीपट्टी विभागातील तसेच याला जोडून असलेल्या सर्व यंत्रणा बंद राहिल्या. याचा नाहक भुर्दंड नागरिकांसह उमेदवारी अर्ज भरणाऱ्या उमेदवारांना सहन करावा लागला आहे. परिणामी गेल्या १५ दिवसांपासून पालघर नगर परिषदेमध्ये संगणकाच्या आधारे होणारी सर्वच कामे ठप्प झाली आहेत. घरपट्टी,पाणीपट्टी, रहिवासी दाखले अशी महत्वाची कामे यामुळे खोळंबून राहिली आहेत. संगणक प्रणाली नादुरुस्त असल्याने उमदेवारी अर्ज भरणाऱ्यांना दाखले देणे अशक्य आहे.

देखभाल- दुरुस्तीकडे दुर्लक्ष

या प्रणालीसाठी पालघर नगरपरिषदेकडे ठेका पद्धतीने देखभाल केली जात आहे. दर महिन्याला सुमारे एक लाख रुपयांपेक्षा अधिक खर्च या संगणक देखभालीवर केला जातो. अशा परिस्थितीत संगणकासाठी आवश्यक ती प्रणाली योग्य वेळ दुरुस्ती व देखभाल करणे या ठेक्यात अपेक्षित आहे. तसे न केल्याने नगरपरिषदेची ही प्रणाली ठप्प झाली आहे.

निवडणूक जाहीर झाल्याने नगर परिषदेतील कोणताही प्रशासकीय अधिकारी नगर परिषद कार्यालयांत थांबत नाहीत. याउलट नगराध्यक्ष या नात्याने मी स्वत: थांबून नागरिकांच्या समस्या सोडवत आहे. इतक्या दिवसापासून हा तांत्रिक बिघाड असताना तसेच निवडणूक तोंडावर असताना प्रशासनाने या बाबींची तपासणी करून तो दुरुस्त करणे आवश्यक होते. यात नागरिकांसह उमेदवारांचे मोठे नुकसान होत आहे. याला जबाबदार प्रशासकीय अधिकारीच आहेत.

– उत्तम पिंपळे, नगराध्यक्ष, पालघर नगरपरिषद

पालघर नगरपरिषदेमधील संगणक सव्‍‌र्हर गेल्या काही दिवसांपासून नादुरुस्त आहे. त्यातील हार्डवेअरच्या दुरुस्तीचे काम पूर्ण झाले असून लवकरच अन्य दुरुस्तीचे काम पूर्ण होईल, अशी आशा आहे.

– प्रशांत ठोंबरे, मुख्याधिकारी, पालघर नगरपरिषद