‘‘मराठवाडय़ातील लोकांना मागास म्हणून संबोधले जाते. मात्र, या मागास भागातील लोकच अधिक जागरूक असतात. याचाच लाभ यूपीएससी परीक्षेत आपल्याला झाला,’’ अशी प्रतिक्रिया या परीक्षेत महाराष्ट्रात पहिला क्रमांक पटकावलेल्या कौस्तुभ दिवेगावकर याने व्यक्त केली.
लातूरच्या केशवराज विद्यालयात शालेय शिक्षण झालेल्या दिवेगावकरने यशवंतराव चव्हाण मुक्त विद्यापीठातून बीए मराठी, तर नांदेड विद्यापीठातून एमए मराठीची परीक्षा दिली. यूपीएससी परीक्षेवर लक्ष केंद्रित करून त्या दृष्टीने अभ्यास केला व घवघवीत यश संपादन केले. लातूर येथील युनिक अॅकॅडमीचे प्रवीण चव्हाण यांचे आपल्याला चांगले मार्गदर्शन लाभल्याचे दिवेगावकर याने सांगितले.
लातूरचीच क्षिप्रा आग्रे महाराष्ट्रात दुसरी आली. यूपीएससी परीक्षेसाठी तिने क्लासवर अवलंबून न राहता स्वत: मेहनत केली. आई-वडिलांनी पाठबळ दिले. त्यामुळे आपल्याला चांगले यश मिळाल्याचे क्षिप्राने सांगितले. लातूरची मुले प्रत्येक क्षेत्रात अग्रेसर असतात हे पुन्हा एकदा सिद्ध झाले असल्याचे क्षिप्राने सांगितले.
हजारपेक्षा जास्त प्रीमियम लेखांचा आस्वाद घ्या ई-पेपर अर्काइव्हचा पूर्ण अॅक्सेस कार्यक्रमांमध्ये निवडक सदस्यांना सहभागी होण्याची संधी ई-पेपर डाउनलोड करण्याची सुविधा
