पिंपरी-चिंचवडमध्ये बोअरवेलमधून पाण्याऐवजी येतंय पेट्रोल

पिंपरी-चिंचवड शहरातील डुडळगाव येथे एका शेतकऱ्याच्या बोअरवेलमधून चक्क पेट्रोल निघत आहे. या प्रकरणाचा व्हिडियो सोशल मीडियावर व्हायरल होत असल्याने ‘लोकसत्ता ऑनलाईन’ने याची पाहणी केली. ही बोअरवेल शिवाजी तळेकर यांची असून त्यांची भातशेती आहे. भाताला पाणी देत असताना तळेकर यांच्या पाण्याच्या पाईपमधून पेट्रोल येत असल्याची गोष्ट लक्षात आली. मग थोडा शोध घेतल्यानंतर शेजारी भारत पेट्रोलियमचा पेट्रोल पंप असून पेट्रोलची साठवणूक करणाऱ्या टाकीला गळती लागल्याने हे झाल्याचे लक्षात आले. पंपात जमिनीमध्ये असणाऱ्या टाकीतून पेट्रोल जमिनीमध्ये झिरपले. आणि मातीतून ते अवघ्या ९० ते १०० मीटर अंतरावर असलेल्या तळेकर यांच्या शेतातील बोअरवेलमधून पाण्यासोबत येऊ लागले.

आता हे पेट्रोल येणे बंद झाले असून पेट्रोलमुळे तळेकर यांची मोटार जाम झाली आहे. यामुळे भातशेतीचे मोठ्या प्रमाणावर नुकसान झाले असल्याचे तळेकर यांनी सांगितले आहे. पेट्रोल पंपात तांत्रिक बिघाड झाल्याने सध्या हा पेट्रोलपंप बंद ठेवण्यात आला आहे. गावातील नागरिकांनीही शेतातील बोअरवेलमधून येणारे पेट्रोल पाहण्यासाठी गर्दी केली होती.