सोलापुरात गारमेंट कारखान्यात १२ बांगलादेशी मजूर सापडले

या दोन घटनांनंतर इकडे सोलापुरात अक्कलकोट रोड एमआयडीसी भागात श्री जगदंबा महिला रेडिमेड ड्रेसेस विविध उत्पादन सहकारी औद्योगिक संस्थेच्या कारखान्यात शिलाई काम करणारे १२ बांगलादेशी तरुण सापडले. मोहम्मद नजीरउल्ला इस्लाम (वय ३०, रा. कोदंमपल्ली, जि. भोगूर), नासीर सरकार मो. बदी उज्जमान (वय २२, रा. तैगोरिया, जि. नाटोर), मोहम्मद मिजानूर रहेमान (वय २६, रा. नेत्रकोना), बाबूमियां सुलतान (वय २५), इम्रान नूरआलम हुसेन (वय २७, दोघे रा. कोदंलपूर), मोहम्मद रसूल अमीन खलील फोराजी (वय ३३), अलाल नूरइस्लाम मियां (वय ३५), मोहम्मद अलीमीन हनीफ बेफिरी (वय २९, तिघे रा. उत्तर परगणा), मोहम्मद हजरतअली पोलाश (वय ३१, रा. काझी बारा, जि. बेगुरगा), मोहम्मद हजरतअली पोलाश (वय ३१, रा. नारहट्टा, जि. बेगुरगा), मोहम्मद सोहेल जावेदअली सरदार (वय २२) आणि शफिक रशीद मोंडल (वय ३१, दोघे रा. ढाका) अशी या कारवाईत अटक करण्यात आलेल्या बांगला देशींची नावे आहेत. त्यांना पोलीस कोठडी सुनावण्यात आली आहे.

याबाबतची माहिती देताना पोलीस आयुक्त एम. राजकुमार यांनी हे सर्व बांगलादेशी नागरिक गेले १५ दिवस ते ८ महिन्यांपासून अक्कलकोट रोड एमआयडीसीमध्ये गारमेंट कारखान्यात काम करीत होते. या प्रत्येकाकडे बनवून घेतलेले स्वतःचे आधार कार्ड होते. त्यांना कोणी मदत केली ? त्यांचा सूत्रधार कोण आहे ? त्यांनी बांगलादेशातून भारतात कोणत्याही प्रकारचा वैध प्रवासी परवानगी आणि कागदपत्रे नसताना अशी घुसखोरी केली, यांचा तपास सुरू असल्याचे पोलीस आयुक्त राजकुमार यांनी सांगितले. पोलीस उपायुक्त विजय कबाडे, सहायक पोलीस आयुक्त प्रताप पोमण, पोलीस निरीक्षक प्रमोद वाघमारे यांनी ही कारवाई केली. पुढील तपास पोलीस निरीक्षक विजय खोमणे हे करीत आहेत.