लक्ष्मण माने यांना चौथ्या गुन्ह्य़ात पोलीस कोठडी

महिलांच्या लैंगिक छळप्रकरणी पोलिसांच्या ताब्यात असलेले माजी आमदार लक्ष्मण माने यांना चौथ्या गुन्ह्य़ासाठी पाच दिवसांची पोलीस कोठडी शुक्रवारी सुनावण्यात आली. माने व त्यांना या कृत्यात मदत करणाऱ्या मनीषा गुरव यांचा अटकपूर्व जामीनअर्जही न्यायालयाने फेटाळून लावला आहे.
साताऱ्यातील शारदाबाई पवार आश्रमशाळेतील सहा महिला कर्मचाऱ्यांनी माने यांच्याविरुद्ध लैंगिक अत्याचार केल्याची तक्रार दाखल केलेली आहे. याप्रकरणी एकेका गुन्ह्य़ात माने यांना अटक करून तपास केला जात आहे.
९ एप्रिलपासून लक्ष्मण माने पोलिसांच्या ताब्यात आहेत. त्यांना आत्तापर्यंत तीन गुन्ह्य़ात वेगवेगळ्या वेळी ताब्यात घेण्यात आले होते. शुक्रवारी त्यांना चौथ्या गुन्ह्य़ात पुन्हा अटक करण्यात आली.