“अजित पवार आज ना उद्या नक्कीच…”, प्रफुल्ल पटेलांचं मोठं वक्तव्य

अजित पवार मुख्यमंत्री होणार का? अजित पवार मुख्यमंत्री कधी होतील? असा प्रश्न राष्ट्रवादी काँग्रेस पार्टीच्या अजित पवार गटातील नेत्यांसमोर सातत्याने उपस्थित केला जात आहे. दरम्यान, अजित पवार गटातील वरिष्ठ नेते प्रफुल्ल पटेल यांनी काही वेळापूर्वी प्रसारमाध्यमांशी बातचित केली. यावेळी पटेल यांनाही हाच प्रश्न विचारण्यात आला. त्यावर प्रफुल्ल पटेल म्हणाले, अजित पवार आज ना उद्या मुख्यमंत्री होतील. परंतु आता ती जागा (मुख्यमंत्रीपद) रिकामी नाही तर मग यावर चर्चा कशासाठी करताय?

हे ही वाचा >> दोन भाऊ एकत्र येणार का? राज ठाकरेंबरोबरच्या युतीवर उद्धव ठाकरे स्पष्टच म्हणाले

प्रफुल्ल पटेल म्हणाले, आजच्या घडीला अजित पवार हे नक्कीच महाराष्ट्रातील एक वजनदार आणि लोकप्रिय नेते आहेत. ते गेल्या अनेक वर्षांपासून महाराष्ट्रात आमच्या पक्षाचं नेतृत्व करत आले आहेत. नेतृत्व ही काही नवीन गोष्ट नाही. कधी ना कधी ते मुख्यमंत्री होतील. ठीक आहे! काम करणाऱ्या माणसाला आज ना उद्या, उद्या नाहीतर परवा संधी नक्कीच मिळत असते. अनेक लोकांना ती संधी मिळाली आहे. त्यामुळे अजित पवारही आज नाहीतर उद्या नक्कीच मुख्यमंत्री होतील. उद्या म्हणजे उद्या नव्हे, कधीही, पुढच्या काळात कधी ना कधी त्यांना तशी संधी मिळेल. आम्ही त्या दिशेने काम करू.