अजित पवारांनी राष्ट्रवादी काँग्रेस पक्षात बंडखोरी केली. राष्ट्रवादीतले अनेक आमदार, खासदार, नेते अजित पवारांबरोबर आहेत. अजित पवार आणि त्यांच्याबरोबर राष्ट्रवादी काँग्रेसमधील नऊ आमदारांनी भाजपाशी हातमिळवणी करत (राष्ट्रवादी काँग्रेस पक्ष म्हणून) महायुतीत प्रवेश केला. तसेच मंत्रीपदाची शपथही घेतली. यावेळी शरद पवार यांचे अत्यंत विश्वासू समजले जाणारे माजी केंद्रीय मंत्री प्रफुल्ल पटेल हेदेखील अजित पवारांबरोबर दिसले. तसेच राष्ट्रवादी काँग्रेसचे खासदार सुनील तटकरेही अजित पवारांबरोबर दिसले. यामुळे अनेकांच्या भुवया उंचावल्या होत्या.
प्रफुल पटेल आणि सुनील तटकरे हे राष्ट्रवादी काँग्रेस पक्षाच्या कार्यकारिणीचे सदस्य होते. या दोन्ही नेत्यांना अलिकडेच पक्षात केंद्रीय नेतृत्वात मोठी पदं देण्यात आली होती. परंतु या दोन्ही नेत्यांनी बंडखोरी केल्यामुळे राष्ट्रवादी काँग्रेस पक्षाने त्यांच्यावर आता कारवाई केली आहे. या दोन्ही नेत्यांना राष्ट्रवादी काँग्रेस पक्षाच्या सदस्य नोंदणीतून काढून टाकण्यात आलं आहे. राष्ट्रवादी काँग्रेस पक्षाचे अध्यक्ष शरद पवार यांनी काही वेळापूर्वी ट्विटरवरून याबाबतची माहिती दिली आहे.
शरद पवार यांनी ट्वीट केलं आहे की, मी, राष्ट्रवादी काँग्रेस पक्षाचा राष्ट्रीय अध्यक्ष या नात्याने पक्षविरोधी कारवाया केल्याबद्दल सुनील तटकरे आणि प्रफुल्ल पटेल यांची नावे राष्ट्रवादी काँग्रेस पक्षाच्या सदस्य नोंदणीतून काढून टाकण्याचे आदेश देत आहे.
सुनील तटकरे हे पक्षाचे राष्ट्रीय महासचिव होते तसेच त्यांना ओदिशा, पश्चिम बंगालची जबाबदारी देण्यात आली होती. राष्ट्रीय स्तरावरील समितींच्या बैठका, संसद अधिवेशन, निवडणूक आयोग, अल्पसंख्याक विषयक मुद्दे त्यांच्याकडे सोपवण्यात आले होते.
हे ही वाचा >> राष्ट्रवादीत किती आमदार उरले? जयंत पाटलांनी सांगितली नेमकी आकडेवारी
प्रफुल पटेल हे पक्षाचे कार्यकारी अध्यक्ष होते. मध्य प्रदेश, गुजरात, राजस्थान, झारखंड, गोवा या राज्यांची जबाबदारी त्यांच्यावर सोपवण्यात आली होती. तसेच, राज्यसभेतील पक्षाचे कामकाज आणि आर्थिक घडामोडी यांसारखे मुद्दे पटेल यांच्याकडे सोपवण्यात आले होते.
