Praniti Shinde : प्रणिती शिंदेंचा आरोप, “लाडकी बहीण योजनेतील ९ लाख लाभार्थी महिलांना पैसे मिळणार नाहीत, हे…”

लाडकी बहीण योजनेबाबत १२ फेब्रुवारीला काय म्हणाले होते देवेंद्र फडणवीस?

लाडकी बहीण योजना सुरु केल्यानंतर ४० ते ४५ हजार कोटींचा भार बजेटवर आल्याने फिस्कल स्पेस कमी झाली आहे. मात्र लाडकी बहीण योजना बंद करणार, ही योजना बंद करणार, ती योजना बंद करणार आम्ही कुठलीही योजना बंद केलेली नाही. ज्या योजना सुरु आहेत त्या चालवणारच आहोत. मी हेदेखील अधिकाऱ्यांना सांगितलं की रिव्हर्स गणित मांडा की आपली प्रगती करण्यासाठी किती गुंतवणूक करायची आहे? किती करु शकतो? २५ हजार कोटींचा फरक पडत असेल तर ते आपण केंद्राकडून विविध योजनांमधून आणता येईल का? याचा विचार आम्ही करतो आहोत. इतर कुठल्या योजनांच्या माध्यमांतून निधी उभा राहिल हे आम्ही पाहतो आहोत. महसुली तूट वाढते आहे म्हणून भांडवली खर्च कमी करायचा या ट्रॅपमध्ये आम्हाला जायचं नाही असं देवेंद्र फडणवीस यांनी म्हटलं होतं. दरम्यान प्रणिती शिंदेंनी सरकारवर आरोप केला आहे.

लाडकी बहीण योजनेबाबत प्रणिती शिंदेंचा आरोप काय?

महाराष्ट्राची तिजोरीच अडचणींत सापडली आहे. ९ लाख लाभार्थी लाडक्या बहिणींना पैसे मिळणार नाहीत. हे होणार होतं हे माहीतच होतं. कारण लाडकी बहीण योजनेकडे पैसे वळवल्याने पी एम किसान योजना, संजय गांधी निराधार योजना या सगळ्या योजनांचे पैसे देणं बंद आहे. सरकारने एवढंही सांगितलं आहे एका योजनेचा लाभ घेत असाल तर दुसऱ्या योजनेचा लाभ देऊ शकणार नाही. या पातळीवर सरकारवर येऊन पोहचलं आहे. खरं तर ही एक शोकांतिका आहे. लाडकी बहीण योजना म्हणजे एक आयवॉश वगैरे सारखी होती. EVM मुळे जिंकले आहेत पण लाडकी बहीण योजनेमुळे जिंकलो असं सांगितलं जातं आहे. त्यासाठीच ही योजना आणली गेली. तळागाळातले लोक अडचणींत आहेत. सत्तेत असणारे लोक सत्तेचा उपभोग घेत आहेत. सत्तेचा गैरवापर कसा करायचा याचं ज्वलंत उदाहरण महायुती सरकारच्या रुपाने दिसतं आहे. असं प्रणिती शिंदे यांनी म्हटलं आहे.