कुवळेकर-कोठावळेंसह चौघांना प्रसाद वैद्यकीय प्रतिष्ठानचे पुरस्कार

नांदेड : येथील प्रसाद वैद्यकीय प्रतिष्ठानतर्फे मागील दोन दशकांपासून देण्यात येणार्‍या वाङ्मय पुरस्कारांची घोषणा करण्यात आली असून २०२३-२४ ह्या वर्षीच्या मानकर्‍यांमध्ये ज्येष्ठ पत्रकार आणि लेखक विजय कुवळेकर तसेच ललित मासिक आणि दीपावली दिवाळी अंकाचे मुख्य संपादक अशोक केशवराव कोठावळे यांचा समावेश आहे.

बन प्रतिष्ठानचे अध्यक्ष डॉ.अच्युत बन आणि पुरस्कार समितीचे निमंत्रक डॉ.सुरेश सावंत यांनी पुरस्कारांची नुकतीच घोषणा केली. यंदाच्या पुरस्कारांचे वितरण येत्या २२ मार्च रोजी नांदेडमध्ये एका विशेष समारंभात करण्यात येणार आहे.

मातुश्री पद्मिनीबाई बन साधना सन्मानाने यापूर्वी अनेक दिग्गज साहित्यिक-लेखकांना गौरविण्यात आले होते. यंदा निवड समितीने ज्येष्ठ पत्रकार आणि साहित्यिक विजय कुवळेकर यांची निवड केली. रोख ११ हजार, सन्मानचिन्ह व सन्मानपत्र असे या पुरस्काराचे स्वरूप आहे. प्रसाद बन वाङ्मय पुरस्कार पुणे येथील लेखक देवा झिंजाड यांच्या ‘एक भाकर : तीन चुली’ या कादंबरीला देण्यात येणार आहे.

प्रसाद बन राज्यस्तरीय ग्रंथगौरव पुरस्कारासाठी संभाजीनगरचे प्रख्यात डॉक्टर व लेखक अनंत कडेठाणकर तर नांदेड जिल्ह्यातील साहित्यिकाला देण्यात येणार्‍या पुरस्कारासाठी छाया बेले यांची निवड करण्यात आली. प्रसाद बन बालसाहित्य पुरस्कारासाठी कोल्हापूर जिल्ह्यातील लेखक डॉ.श्रीकांत पाटील यांच्या बहुरंगी, बहुढंगी नाट्यछटा या पुस्तकाची निवड झाली.

दिवाळी अंकांसाठी मागील काही वर्षांपासून सुरू करण्यात आलेल्या उत्कृष्ट अंकाचा पुरस्कार दीपावली अंक व संपादक अशोक कोठावळे यांना दिला जाणार आहे. सर्व मानकर्‍यांनी पुरस्कार स्वीकारण्यास संमती दिली असल्याचे डॉ.बन यांनी सांगितले.