दक्षिण मुंबई लोकसभेची जागा काँग्रेसला मिळणार नाही, हे स्पष्ट झाल्यानंतर मिलिंद देवरा यांनी काँग्रेस पक्षाचा राजीनामा दिला. त्यानंतर मुख्यमंत्री एकनाथ शिंदे यांच्या नेतृत्वाखालील शिवसेनेत देवरा यांनी रविवारी ( १४ जानेवारी ) प्रवेश केला. देवरांच्या शिंदे गटातील प्रवेशानंतर काँग्रेसला मोठा फटका बसल्याची चर्चा केली जात आहे. यावर माजी मुख्यमंत्री, काँग्रेस नेते पृथ्वीराज चव्हाण यांनी भाष्य केलं आहे.
“काँग्रेसच्या राजकारणात मिलिंद देवराचांना फारसा सहभाग दिसला नाही. शिंदे गटात जाणं हा देवरांचा व्यक्तिगत निर्णय आहे. त्यामुळे कुणीही पक्ष सोडून गेलं, तर नुकसान होतेच. पण, आता किती नुकसान होईल, हे मुंबई काँग्रेसचे नेते ठरवतील,” असं पृथ्वीराज चव्हाणांनी सांगितलं आहे. ते ‘एबीपी माझा’शी संवाद साधत होते.
हेही वाचा : “पंतप्रधानांनी काँग्रेसला चांगलं म्हटलं, तरी…”, शिवसेनेत प्रवेश करताच मिलिंद देवरांची टीका
“काँग्रेसच्या राजकारणात देवरांचा सहभाग दिसला नाही”
“मिलिंद देवरांना दक्षिण मुंबईतून लोकसभा निवडणूक लढवायची होती. पण, तीन पक्षांची आघाडी झाल्यानं ती जागा मिळणं शक्य नव्हतं. राज्यसभेसाठी देवरांनी प्रयत्न केले होते. पण, संसदेत जाण्याचा विचार करूनच देवरा राजकारण करत होते. काँग्रेसच्या राजकारणात देवरांचा सहभाग दिसला नाही. हा देवरांचा व्यक्तीगत निर्णय आहे. याची फार व्यापक चर्चा करण्याची गरज नाही,” असं पृथ्वीराच चव्हाणांनी म्हटलं.
“कुणीही पक्ष सोडून गेलं, तर नुकसान होतेच”
“दक्षिण मुंबई ही हक्काची जागा असल्याचं देवरांना वाटत होते. पण, आघाडीच्या वाटपात ती मिळणं शक्य नव्हतं. तेव्हापासून देवरा पक्ष सोडतील हे अपेक्षित होतं. कुणीही पक्ष सोडून गेलं, तर नुकसान होतेच. आता किती नुकसान होईल, ते मुंबई काँग्रेसचे नेते ठरवतील,” असं चव्हाणांनी सांगितलं.
हेही वाचा : मिलिंद देवरांनी शिंदेंच्या शिवसेनेचा ‘धनुष्यबाण’ घेतला हाती; म्हणाले, “मी काँग्रेस सोडेन वाटलं नव्हतं, पण…”
“मिलिंद देवरांना पक्षानं खजिनदार केलं होतं”
“दक्षिण मुंबईची जागा शिवसेनेनं दोन वेळा जिंकली आहे. त्यामुळे शिवसेनेला ही जागा सोडा असं सांगा हे व्यवहारिक नव्हतं. मिलिंद देवरांना पक्षानं खजिनदार केलं होतं. पण, त्यातून त्यांचं समाधान झालं नाही,” असंही चव्हाण म्हणाले.
“काहीजण पक्ष सोडून गेले, तर…”
हा राहुल गांधींना धक्का आहे का? या प्रश्नावर पृथ्वीराज चव्हाणांनी म्हटलं, “देवरांनी पक्ष सोडल्यामुळे राहुल गांधींना धक्का वगैरे काही बसला नाही. काही दोन-चार लोक गेलं, तर पक्षात काहीजण आले सुद्धा.”
