अकोल्यात ‘प्रॉपर्टी ब्रोकर’ची निर्घृण हत्या

अकोला : शैक्षणिक संस्थेच्या वादातून खडकी येथील ‘प्रॉपर्टी ब्रोकर’ व व्यावसायिक किसनराव हुंडीवाले यांची सोमवारी दुपारी १२ वाजताच्या सुमारास सार्वजनिक न्यास नोंदणी कार्यालयातच निर्घृण हत्या करण्यात आली. यावेळी आरोपींनी हुंडीवाले यांचे वकील अ‍ॅड. नितीन धूत यांनाही मारहाण केल्याने ते गंभीर जखमी झाले आहेत. भाजपच्या माजी महापौर सुमन गावंडे यांचे कुटुंबीय व हुंडीवाले यांच्यात शैक्षणिक संस्थेवरून वाद होता. त्यातूनच ही घटना घडल्याची माहिती पोलिसांनी दिली. या घटनेमुळे शहरात खळबळ उडाली आहे.

कौलखेड येथील एका शैक्षणिक संस्थेच्या कामानिमित्त राष्ट्रीय महामार्ग क्रमांक ६ वरील मूर्तिजापूर मार्गावर असलेल्या सार्वजनिक न्यास नोंदणी व सहायक संस्था निबंधक कार्यालयात सोमवारी दुपारी १२ वाजता किसनराव हुंडीवाले उपस्थित होते. यासोबतच याच संस्थेच्या कामासाठी आरोपी व त्यांचे साथीदार न्यास नोंदणी कार्यालयात आले होते. या शैक्षणिक संस्थेच्या वादातून हुंडीवाले व आरोपींमध्ये शाब्दिक चकमक उडाली. या वादाचे पर्यवसान मारहाणीत झाले. आरोपींनी किसनराव हुंडीवाले यांच्या डोक्यावर कार्यालयात बाजूच्या भिंतीवर असलेले अग्निरोधक सिलिंडर काढून त्याने हल्ला केला. आरोपींच्या साथीदारांनी टेबल व खुर्चीने हुंडीवाले यांना मारहाण केली. सिलिंडरने तीन वेळा त्यांच्या डोक्यावर वार केल्याने हुंडीवाले रक्ताच्या थारोळ्यात खाली कोसळले. या प्राणघातक हल्ल्यात त्यांचा घटनास्थळीच मृत्यू झाला. अ‍ॅड. नितीन धूत यांच्यावरही हल्ला करण्यात आल्याने ते गंभीर जखमी झाले आहेत. त्यांच्यावर रुग्णालयात उपचार सुरू आहेत. या घटनेची माहिती मिळताच पोलिसांनी तात्काळ घटनास्थळ गाठले. वरिष्ठ पोलीस अधिकाऱ्यांनीही घटनास्थळाला भेट देऊन पाहणी केली. श्वानपथक व ठसेतज्ज्ञ पथकाला घटनास्थळी पाचारण करण्यात आले होते. याप्रकरणी प्रवीण हुंडीवाले यांनी सिव्हिल लाईन्स पोलीस ठाण्यात तक्रार दिली असून, आरोपींविरुद्ध गुन्हा दाखल करण्यात आला आहे.

हुंडीवाले आणि भाजपच्या माजी महापौर सुमन गावंडेंच्या कुटुंबात शैक्षणिक संस्थेवरून गेल्या पाच वर्षांपासून वाद होता. या वादातूनच सुमन गावंडे यांचे पती श्रीराम गावंडे, मुले रणजीत, प्रवीण, विक्रम यांच्यासह १५ ते २० जणांनी ही हत्या केल्याची माहिती जिल्हा पोलीस अधीक्षक एम. राकेश कलासागर यांनी दिली. सर्व आरोपी फरार असून त्यांचा शोध घेण्यासाठी पोलीस पथके रवाना करण्यात आली आहेत. आरोपी श्रीराम गावंडे हे सहायक पोलीस निरीक्षक म्हणून सेवानिवृत्त झाले आहेत, तर विक्रम गावंडे भारतीय जनता युवा मोर्चाचा प्रदेश उपाध्यक्ष आहे. मृत किसनराव हुंडीवाले गवळी समाज संघटनेचे प्रदेशाध्यक्ष होते. केंद्रीय गृहराज्यमंत्री हंसराज अहीर यांचे ते जवळचे नातेवाईक होते. या घटनेची माहिती मिळताच हंसराज अहीर चंद्रपूरवरून अकोल्याकडे निघाले असून, ते रात्री अकोल्यात दाखल होणार आहेत.