भाजप नेते पाशा पटेल यांच्या अश्लील वक्तव्याविरोधात कर्जत जामखेड मध्ये महिलांचा एल्गार, पुतळा जाळून निषेध

जामखेड येथे भाजपा महायुतीचे उमेदवार प्रा राम शिंदे यांच्या प्रचारार्थ गुरुवारी संध्याकाळी भाजपाचे नेते माजी आमदार पाशा पटेल यांची सभा झाली. भर सभेत महिला-भगिनी समोर उपस्थित असताना पाशा पटेल यांनी अश्लील भाषा वापरली. तसेच सभेत अनेकदा अश्लील हातवारे केले. या कृत्याचा मतदारसंघातील महिलांनी शुक्रवारी दुपारी तीव्र भाषेत निषेध व्यक्त केला. यावेळी पाशा पटेलांच्या प्रतिकात्मक पुतळ्यास महिला पदाधिकाऱ्यांनी जोडे मारत दहन केला.  या प्रसंगी बोलताना राणी कानगुडे म्हणाल्या की, भर सभेत महिला-भगिनी उपस्थित असताना भाजपा उमेदवार राम शिंदेंच्या उपस्थितीमध्ये भाजपाचे नेते पाशा पटेल महिलांच्या बाबतीत अश्लील भाषा वापरत होते. अशा लोकांचा कडेलोट करायला हवा. जे अशी भाषा वापरत आहे त्यांना आई-बहीण आहेत की नाही ? असा प्रश्न पडतो. महिलांबद्दल भाजपा नेते कायम वादग्रस्त बोलत आहे.

हेही वाचा >>>Raj Thackeray Health Update : “माझी प्रकृती नाजूक…”, राज ठाकरेंनी दोन मिनिटांत आटोपलं भाषण!

तरी त्यांचे नेते त्यांना समज देत नाही याचे दुर्दैव वाटते.  आगामी निवडणुकीत याच लाडक्या महिला-भगिनी या वाचाळवीरांना त्यांची लायकी दाखवल्याशिवाय गप्प बसणार नाहीत. यावेळी कर्जत जामखेड मधील महिला भगिनी तसेच राष्ट्रवादी शरदचंद्र पवार पक्षाच्या महिला आघाडीच्या पुजा सुर्यवंशी, अर्चनाताई राळेभात, राजश्रीताई मोरे,  मीनाक्षी साळुंके, उषा राऊत, मनीषा सोनमाळी, प्रतिभा भैलुमे, हर्षदा काळदाते, पूजा मेहेत्रे, छाया शेलार, ज्योती शेळके, लंका खरात, प्रीती जेवरे, माधुरी पाटील, सुवर्णा सुपेकर, स्वाती कानगुडे, सोनाली वाघमोडे, उषा खुरंगे यांच्यासह मतदारसंघातील महिला मोठ्या संख्येने उपस्थित होत्या. सर्व महिला पदाधिकाऱ्यांनी कर्जत आणि जामखेडमध्ये पोलीस ठाण्यात जात पोलीस निरीक्षकांना  पाशा पटेल यांच्या विरोधात कठोर कारवाई करण्याची मागणी निवेदन देवून केली आहे.