मुंबई-पुणे मार्गावरील डेक्कन क्वीन आणि इंद्रायणी तसेच मुंबई-मडगाव मार्गावरील कोकणकन्या आणि मांडवी एक्स्प्रेसला एलएचबी (लिकें हाँफमन बुश) डबे जोडण्याचा निर्णय मध्य रेल्वेने घेतला आहे. यामुळे या एक्स्प्रेसना ताशी 130 किमी वेगाने धावण्याची क्षमता प्राप्त होणार आहे. प्रवाशांना अधिक सुरक्षित आणि आरामदायी प्रवास घडविण्यासाठी ‘एलएचबी’ तंत्रज्ञानाचे हायफाय डबे लावण्यात येणार आहेत. जर्मन तंत्रज्ञानाचे अशा प्रकारचे आधुनिक डबे पंचवटी एक्प्रेससह मध्य रेल्वेच्या 24 गाडय़ांना बसविण्यात आले आहेत.
ट्रेन क्र. 10111/2 सीएसएमटी ते मडगाव कोकणकन्या एक्प्रेस आणि ट्रेन क्र. 10103/4 सीएसएमटी ते मडगाव मांडवी एक्प्रेसला 10 जून ते 31 ऑगस्टदरम्यान एलएचबीचे 22 डबे लावण्यात येणार आहेत. याची संरचना प्रथम, द्वितीय श्रेणी एक एसी डबा, द्वितीय श्रेणीचा एक डबा, तृतीय श्रेणीचे 4 एसी डबे, 11 स्लीपर क्लास, 2 सामान्य डबे आणि एक पँट्री डबा अशी असेल. तर, मुंबई-पुणे मार्गावर धावणाऱ्या डेक्कन क्वीन आणि इंद्रायणी एक्स्प्रेसच्या डब्यांच्या जागी अपघातरोधक डबे (एलएचबी) बसविण्याला रेल्वे मंडळाची मंजुरी मिळालेली आहे. एलएचबी डब्यांमुळे या दोन्ही एक्स्प्रेसमध्ये ताशी 130 किमी धावण्याची क्षमता येईल. या कामाला मंजुरी मिळाली असून सहा ते आठ महिन्याच्या आत दोन्ही एक्स्प्रेस एलएचबी डब्यांसह मार्गस्थ होतील, अशी माहिती रेल्वे अधिकाऱ्यांनी दिली.
नव्या डब्यांमुळे प्रवाशांना गाडीतून फिरण्यास जास्त जागा मिळेल. डब्यामधील बेसिन, टॉयलेट यांच्या रचनेत सुधारणा केली आहे. यासह दरवाजातील जुनी चिंचोळी जागा वाढविली आहे. त्यामुळे आता गाडीत चढताना तसेच उतरताना प्रवाशांना धक्काबुकी, गर्दीला सामोरे जावे लागणार नाही. या डब्यांची लांबी आणि रुंदी जास्त असल्याने प्रवाशांचा प्रवास आरामदायी होईल.
रेल्वेने जुन्या पारंपरिक ‘आयसीएफ’ कोचची निर्मिती आता पूर्णपणे बंद केली आहे. त्याची जागा आता जर्मन तंत्रज्ञानाचे लिंफे-हॉफ मॅन- बुश (एलएचबी) कोच घेणार आहेत. या डब्यांचे वजन पारंपरिक डब्यांपेक्षा हलके असून अपघातात त्यामुळे कमीत कमी जीवितहानी होते. तसेच उच्च तंत्रज्ञानामुळे अपघातात हे डबे एकमेकांवर आपटून डब्यांवर डबे चढत नाहीत.
