अंधेरी पोटनिवडणुकीसाठी राज ठाकरेंचे फडणवीसांना पत्र, ऋतुजा लटकेंनीही दिली प्रतिक्रिया; म्हणाल्या “विरोधी पक्षाच्या…”

अंधेरी पोटनिवडणुकीच्या पार्श्वभूमीवर राज्यात राजकीय घडामोडींना वेग आला आहे. एकनाथ शिंदे गट-भाजपाच्या वतीने मुरजी पटेल यांनी आपला उमेदवारी अर्ज दाखल केला आहे. तर उद्धव ठाकरे गटाकडून ऋतुजा लटके या मैदानात आहेत. दोन्ही बाजूंनी जोमात प्रचार केला जात असताना मनसेचे अध्यक्ष राज ठाकरे यांनी उपमुख्यमंत्री देवेंद्र फडणवीस यांना पत्र लिहून ही निवडणूक लढवू नये, अशी विनंती केली आहे. या सर्व घडामोडी घडत असताना उद्धव ठाकरे गटाच्या उमेदवार ऋतुजा लटके यांनी प्रतिक्रिया दिली आहे. मला वाटले होते की, ही निवडणूक बिनविरोध होईल. मात्र विरोधी पक्षाचा तसा विचार नाहीये, असे त्या म्हणाल्या आहेत. अंधेरी पूर्व मतदारसंघात प्रचार करताना त्या माध्यम प्रतिनिधींशी बोलत होत्या.