Rajya Sabha Election 2022 Updates : मतांवरील आक्षेपांवर निर्णय झाल्यानंतर मतमोजणी पुन्हा सुरू होणार, अस्लम शेख यांची माहिती

महाविकासआघाडी एकसंघ असून आमचा विजय सुनिश्चित आहे. आम्ही संपूर्ण कर्तव्यदक्ष पणाने या निवडणुकीकडे लक्ष ठेवून आहोत. ज्या प्रकारे भाजपाने कोंडी करण्याचा प्रयत्न केला आहे, त्यामध्ये ते सफल होणार नाहीत. एमआयएमने कोणाला पाठिंबा द्यावा हा त्यांच्या पक्षाचा विषय आहे महाविकासआघाडी म्हणून आम्ही एकत्र आहोत. असं ऊर्जामंत्री नितीन राऊत म्हणाले आहेत.

भाजपा-१०६ , शिवसेना -५५ , राष्ट्रवादी- ५३, काँग्रेस-४४, अपक्ष व छोटे पक्ष -२९

प्रफुल्ल पटेल (राष्ट्रवादी), संजय राऊत (शिवसेना), पीयूष गोयल (भाजपा), इम्रान प्रतापगढी (काँग्रेस), अनिल बोंडे (भाजपा), संजय पवार (शिवसेना), धनंजय महाडिक (भाजपा)

राज्यसभेसाठी खुल्या पद्धतीने मतदान होते. त्यानुसार राजकीय पक्षांच्या आमदारांना आपल्या पक्षाच्या प्रतोदाला दाखवून मतदान करावे लागते. आमदाराने पक्षादेश धुडकावल्यास त्या आमदाराच्या विरोधात पक्षाला पक्षांतरबंदी कायद्याखाली कारवाई करता येते. अपक्षांना मात्र मतपत्रिका दाखविण्याचे बंधन नसते.

राज्यसभा निवडणुकीसाठी मतदान करण्यासाठी शिवसेनेचे आमदार घोषणाबाजी करत विधानभवनात दाखल झाले आहेत.

राज्यसभेच्या सहा जागांसाठी आज होणाऱ्या निवडणुकीत राज्यात कमालीची चुरस निर्माण झाली आहे. घोडेबाजाराच्या आरोपामुळे गाजलेल्या या निवडणुकीत भाजपा, शिवसेना की काँग्रेसचा उमेदवार ‘सातवा’ म्हणजे पराभूत होणार याकडे साऱ्यांचे लक्ष लागले आहे. ‘एमआयएम’ची दोन मते शिवसेनेसाठी अडचणीची ठरणार असल्याचे म्हटले जात आहे. यादरम्यान एमआयएमचे खासदार इम्तियाज जलील यांनी आपण महाविकास आघाडीला पाठिंबा देणार असल्याचं जाहीर केलं आहे.

सविस्तर बातमी

पुण्यातील भाजपाचे आमदार लक्ष्मण जगताप गंभीर आजाराने त्रस्त असतानाही मतदान प्रक्रियेत सहभागी होणार आहेत. प्रकृतीच्या कारणास्तव लक्ष्मण जगताप मतदान प्रक्रियेत सहभागी होणार की नाही असा प्रश्न गेल्या काही दिवसांपासून होता. अखेर ते रुग्णवाहिकेतून मुंबईसाठी रवाना झाले आहेत.

सविस्तर बातमी

राज्यसभा निवडणुकीतील भाजपाचे उमेदवार अनिल बोंडे यांनी १०० टक्के विजयी होऊ असा विश्वास व्यक्त केला आहे. १०० टक्के आत्मविश्वास आहे, आमच्या मनात अजिबात धाकधूक नाही असं अनिल बोंडे यांनी विधीमंडळ परिसरात प्रसारमाध्यमांशी बोलताना म्हटलं आहे. महाभारतात ज्याप्रमाणे अश्वत्थामा गेला तसं या निवडणुकीत कोणीतरी संजय जाणार हे नक्की आहे असंही विधान यावेळी त्यांनी केलं.

सविस्तर बातमी

राष्ट्रवादी नंतर काँग्रेसने देखील कोटा वाढवला असून, तो ४४ केला आहे. याचबरोबर शिवसेनेच्या दुसऱ्या उमेदवारास धोका वाढल्याचं दिसत आहे.

काँग्रेसकडून मतदान प्रतिनिधी म्हणून बाळासाहेब थोरात आणि नाना पटोले आहेत. तर मतमोजणीसाठी सुनील केदार आणि सतेज पाटील हे प्रतिनिधी आहेत.

आतापर्यंत या निवडणुकीसाठी भाजपाच्या आठ आमदारांचं मतदान झालं असल्याची माहिती समोर आली आहे. याशिवाय, भाजपाच्या आमदारांची चौथी बस विधानभवनात दाखल झाली आहे.

राज्यसभा निवडणुकीसाठी महाविकासआघाडी आणि विरोधी पक्षाचे आमदार विधीमंडळात पोहचत आहेत. विरोधी पक्षनेते देवेंद्र फडणवीस हे विधानभवनात दाखल झाले आहेत.

राज्यसभा निवडणुकीसाठी आज होत असलेल्या मतदानात सर्वप्रथम राष्ट्रवादी काँग्रेसच्या आमदारांचं मतदान सुरु आहे. छगन भुजबळ, हसन मुश्रीफ यांच्यासह राष्ट्रवादीच्या २० आमदारांचं आतापर्यंत मतदान झालं आहे.

राज्यसभा निवडणुकीसाठी अगोदर राष्ट्रवादी काँग्रेसच्या आमदार मतदान करणार असून, त्यानंतर शिवसेनेचे आमदारा मतदान करणार आहेत.

राज्यसभा निवडणुकीसाठी एमआयएमचा महाविकासआघाडीला पाठिंबा मिळाला आहे. एमआयएमचे खासदार इम्तियाज जलील यांनी याबाबत घोषणा केली आहे.

राष्ट्रवादी काँग्रेसचे राज्यमंत्री दत्तात्रय भरणे यांनी सर्वात अगोदर मतदानाचा हक्क बजावला.

राज्यसभा निवडणुकीसाठी सर्वपक्षीय आमदार विधानभवनात दाखल होण्यास सुरुवात झाली आहे.

राज्यसभा निवडणुकीच्या मतदानाला सुरुवात झाली आहे.