रत्नागिरीतील संगमेश्वर येथे नांगरणी स्पर्धेदरम्यान बैल उधळल्याची जीवघेणी घटना समोर आली आहे. संगमेश्वर तालुक्यातील पाटगाव येथे ही नांगरणी स्पर्धा आयोजित करण्यात आली होती. यावेळी स्पर्धा सुरु असताना बैलांची जोडी उधळली आणि स्पर्धा पाहण्यासाठी जमलेल्या लोकांच्या अंगावर गेली. काहीजण बैलांना अडवण्याचा प्रयत्न करत होते, तेदेखील या घटनेत जखमी झाले. ही घटना कॅमेऱ्य़ात कैद झाला असून व्हिडीओ पाहून तुमच्याही अंगावर काटा येईल.
स्पर्धा सुरु असताना शेपटी पिरगळण्यात आल्याने बैल उधळले असं सांगण्यात येत आहे. बैल इतके चिडले होते की, त्यांनी शेतकऱ्याला फरफटत नेलं. नंतर त्यांनी सुरक्षेसाठी लावलेलं लोखंडी रेलिंगही सोबत ओढत नेलं. बैल अचानक धावत आल्याने उपस्थितांची धावपळ सुरु झाली. बैल अंगावरुन गेल्याने अनेकजण जखमी झाले आहेत. मिळालेल्या माहितीनुसार, आठ ते दहा जण जखमी झाले असून तिघांची प्रकृती गंभीर आहे.
या घटनेनंतर प्राणीप्रेमी संघटनांकडून संताप व्यक्त केला जात आहे. ज्याप्रमाणे बैलगाडा स्पर्धेवर बंदी आणण्यात आली त्याप्रमाणे या नांगरणी स्पर्धेवरही बंदी आणली जावी अशी मागणी केली जात आहे.
